Home
မြန်မာသတင်း
“အကောင်းဆုံးကို မျှော်လင့်သလို အဆိုးဆုံးကို ရင်ဆိုင်ဖို့ ပြင်ဆင်နေတယ်”- ဒေါက်တာကျော်စွာဦး
DVB
·
February 3, 2021

တတိယအကြိမ် လွှတ်တော်အစည်းအဝေးတက်ရောက်ဖို့ နေပြည်တော်မှာ  ရောက်ရှိနေကြတဲ့ ပြည်ထောင်စုလွှတ်တော် ကိုယ်စားလှယ်တွေဟာ ဖေဖော်ဝါရီ ၁ ရက်နေ့ စစ်တပ်က အာဏာသိမ်း ပြီးနောက်  နေပြည်တော်စည်ပင်ဧည့်ရိပ်သာမှာ အပြင်ထွက်ခွင့်မရဘဲ တားဆီးပိတ်ပင် ခံထားရပါတယ်။

စည်ပင်ဧည့်ရိပ်သာအတွင်းရှိ ကိုယ်စားလှယ်တွေ  ၂၄ နာရီအတွင်း ထွက်ခွာပေးဖို့ ညွှန်ကြားထားတယ်လို့လည်း သတင်းတွေထွက်နေပါတယ်။   စည်ပင်ရိပ်သာမှာရှိနေတဲ့ အန်အယ်လ်ဒီပါတီဝင်  သင်္ဃန်းကျွန်းမြို့နယ်  ပြည်သူ့လွှတ်တော်ကိုယ်စားလှယ် ဒေါက်တာကျော်စွာဦးကို ဒီဗွီဘီက ဆက်သွယ်မေးမြန်းထားပါတယ်။  

မေး ။ ။ စည်ပင်ဧည့်ရိပ်သာကနေ ၂၄ နာရီအတွင်း ထွက်ခွာခိုင်းနေတာနဲ့ ပတ်သက်ပြီး ဘယ်လိုအခြေအနေရှိပါသလဲ။

ဖြေ ။ ။ တိုကိရိုက်ကျနော်တို့ကို လာပြီးပြောတာတော့ မဟုတ်ဘူး။ စည်ပင်ဧည့်ရိပ်သာမှာဆိုရင် အရွေးချယ်ခံ လွှတ်တော်ကိုယ်စားလှယ်တွေထဲမှာ ကျနော်တို့ စီအီးစီ သုံးယောက်ရှိတာပေါ့နော် ။ အဲဒီ စီအီးစီ ခေါင်းဆောင်တွေဆီကို ဆက်သွယ်‌ပြောကြားလာတာတွေကိုပဲ သိရတယ်။ ကျနော်တို့လည်း  တိုင်းဒေသကြီး ၊ ပြည်နယ်တွေမှာ တာ၀န်ခံတွေလေ။ သူတို့ကနေတဆင့် သိရတာပေါ့လေ။

မေး ။ ။ ဒီအခြေအနေပေါ်မှာ ဘာလုပ်မယ်ဆိုတာမျိုး အခြေအနေသိရပြီလား။

ဖြေ ။ ။ အခု ကျနော်တို့ သိရပြီး နားလည်သလောက်ကတော့ ကျနော်တို့ ကြေညာချက်တစ်ခု ထွက်မှာပါခင်ဗျာ။ ဒီအပေါ်မှာ ကြေညာချက်တစ်ခုထွက်မယ် ပြီးလို့ရှိရင် ကျနော်တို့ အခု ပြန်ဖို့ကိစ္စ တွေကို ပစ္စည်းတွေကို သိမ်းထားတာပေါ့။ လောလောဆယ်တော့ ဘယ်သူမှတော့ မပြန်သေးဘူးပေါ့လေ။ ပစ္စည်းသိမ်းရတဲ့ အခြေအနေပါ။

အဓိကကတော့ မိဘပြည်သူတွေကို ပြောချင်တာက အမြဲတမ်း တာ၀န်ကျေခဲ့ပါတယ်။ မေတ္တာထားတယ် ၊ စေတနာထားတယ် တာ၀န်လည်း ကျေပါတယ်။ ခုအချိန်ထိလည်း ကျနော်တို့ကို စိတ်ပူနေကြတယ်။ ကျနော်တို့ကလည်း ပါတီခေါင်းဆောင်တွေရဲ့ လမ်းညွှန်မှုနဲ့အတူ ပြည်သူလူထုနဲ့ တစ်သားတည်းဆိုတာ စကားပါးချင်ပါတယ်။ Civil disobedience လုပ်နေတဲ့ ကျန်းမာရေး၀န်ထမ်းတွေနဲ့ သက်ဆိုင်ရာဌာနအသီးသီးက လှုပ်ရှားမှု အားလုံးကို အလေးအနက် အပြည့်အ၀ ထောက်ခံတယ်။ လေးလည်း လေးစားပါတယ်။ ဂုဏ်လည်း ဂုဏ်ယူပါတယ်။

မေး ။ ။ လုံခြုံရေး အခြေအနေကရော ဘယ်လိုရှိနေလဲ ခုအချိန်မှာ။

ဖြေ ။ ။ လုံခြုံရေးကတော့ ဒီအထဲမှာရှိတဲ့ ရဲတပ်ရင်းကတော့ ကျနော်တို့ မတွေ့တော့ဘူး။ သို့သော်လည်းပဲ အပြင်မှာတော့ တပ်မတော်က ကင်းပုန်းယူထားတာတော့ ကြားသိရပါတယ်။

မေး ။ ။ ဖြည့်ပြီးပြောချင်တာများ ရှိသေးလား။

ဖြေ ။ ။ ကျနော်တို့ အနေနဲ့ အကောင်းဆုံးကိုမျှော်လင့်ထားသလို အခုအချိန်မှာတော့ အဆိုးဆုံးကို မျှော်လင့်ပြီးတော့ ရင်ဆိုင်ဖို့ ပြင်ဆင်နေကြပါတယ်။

ကျေးဇူးတင်ပါတယ်။ ။

Photo Credit- Kyaw Swar Oo Oo

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024