Email This Story :
ရွေးကောက်ပွဲ မတိုင်ခင်ကတည်းက ဖမ်းဆီးထိမ်းသိမ်းခံထားရတဲ့ တောင်ကုတ်မြို့နယ် အမျိုးသားဒီမိုကရေစီအဖွဲ့ချုပ် ( အန်အယ်လ်ဒီ) ကိုယ်စားလှယ်လောင်း ၃ ဦးကို ဒီကနေ့ ပြန်လွှတ်ပေးဖို့ ရှိနေတယ်လို့ ရက္ခိုင့်တပ်တော်(အေအေ) ကပြောပါတယ်။
အေအေအဖွဲ့ ပြောရေးဆိုခွင့်ရှိသူ ခိုင်သူခက “တောင်ကုတ်က အန်အယ်လ်ဒီအဖွဲ့ဝင်တွေဖြစ်တဲ့ ဦးမင်းအောင်၊ ဒေါ်နီနီမေမြင့်၊ ဒေါ်ချစ်ချစ်ချောတို့ သုံးယောက်ကို ကျနော်တို့၂၀၂၁ ခု ဇန်နဝါရီ လ ၁ ရက်နေ့မှာ ရခိုင်ပြည်နယ် မင်းပြားမြို့နယ် ၊ မိချောင်းတက်ရွာမှာ ကျနော်တို့ လွှတ်ပေးဖို့ စီစဉ်ထားတာရှိတယ်ဗျ၊ အဲဒီမှာ ရက္ခိုင့်တပ်တော်ရဲ့ လွှဲပြောင်းရေးအဖွဲ့ကနေပြီးတော့မှ မြန်မာစစ်တပ်ရဲ့ လက်ခံရေးအဖွဲ့ ခေါင်းဆောင် ဗိုလ်မှူးချုပ် စိုးတင့် ဦးဆောင်တဲ့ အဖွဲ့ဆီကို ကျနော်တို့ ကောင်းကောင်းမွန်မွန် ပြန်လည် လွှဲပြောင်းအပ်နှံပြီးတော့မှ လွှတ်ပေးမှာဖြစ်တယ်ဗျ”လို့ ဒီဗွီဘီကို ပြောပါတယ်။
ရခိုင်လက်နက်ကိုင်အဖွဲ့ ခေါင်းဆောင်နဲ့ တပ်မတော်ဆွေးနွေးရေးအဖွဲ့ခေါင်းဆောင်တို့ ဒီဇင်ဘာလ ၃၀ ရက်က ပြုလုပ်တဲ့ ဒုတိယအကြိမ် အွန်လိုင်းဆွေးနွေးပွဲ ရလဒ်အရ ခုလိုလွှတ်ပေးလိုက်တာလို့လည်း ပြောပါတယ်။
ပြည်သူ့လွှတ်တော်ကိုယ်စားလှယ်ဒေါ်နီနီမေမြင့်၊ ပြည်နယ်လွှတ်တော်ကိုယ်စားလှယ် ဦးမင်းအောင်နဲ့ အမျိုးသားလွှတ်တော်ကိုယ်စားလှယ်လောင်း ဒေါ်ချစ်ချစ်ချောတို့ဟာ တောင်ကုတ်မြိုနယ်ဆောင်းခါးကျေးရွာကို မဲဆွယ်စည်းရုံးရေး လုပ်ငန်းတွေ ဆောင်ရွက်ရင်း အောက်တိုဘာ ၁၄ ရက်နေ့မှာ ဖမ်းဆီးခံရတာပါ။
အေအေအဖွဲ့ရဲ့ ဖမ်းဆီးခံထားရတဲ့ တောင်ကုတ်မြို့နယ်က အန်အယ်လ်ဒီ ကိုယ်စားလှယ်လောင်း ၃ ဦးကို အမြန်ဆုံးပြန်လွှတ်ပေးဖို့ အတွက် အမျိုးသားဒီမိုကရေစီအဖွဲ့ချုပ်က တောင်းဆိုထားပါတယ်။
