ရန်ကုန်-မန္တလေးအမြန်လမ်းတွင် express ကား ၂ စီးပေါ်က ထိန်းချုပ်ဓာတုပစ္စည်းများဖမ်းမိ
DVB
·
December 15, 2020
မန္တလေးတိုင်း၊ မိတ္ထီလာမြို့နယ်၊ ရန်ကုန်-မန္တလေးအမြန်လမ်းမကြီး သီးကုန်းဂိတ်မှာ ဒီဇင်ဘာ ၁၄ ရက်မနက်က express ကား ၂ စီးပေါ်က ထိန်းချုပ်ဓာတုပစ္စည်း အမိုနီယမ် နိုက်ထရိတ်အိတ် ၇၀ အလေးချိန် ကီလိုဂရမ် ၂၆၀၀ကျော် ဖမ်းဆီးမိခဲ့ပါတယ်။
မိတ္ထီလာအမှတ်(၅၅)မူးယစ်တပ်ဖွဲ့စု ဒုရဲမှူးခင်မောင်ဆွေမင်းက "ပထမဆုံးဖမ်းမိတာ ဒဂုံမန်း express ကားပေါ်က မူးယစ်ဆေးဝါးလုပ်ရာမှာသုံးတဲ့ ထိန်းချုပ်ဓာတုပစ္စည်း အမိုနီယမ်နိုက်ထရိတ်အိတ် ၂၀ ကီလိုဂရမ်ဆိုရင် ကီလိုဂရမ် ၉၀၀လောက်ပါ ယာဉ်မောင်းအပါ ၄ ဦးကို ဖမ်းဆီးမိပါတယ်။ ဒုတိယကတော့ ရာဇာအောင် express ကားပေါ်က အိတ် ၅၀ ကီလိုဂရမ် ၁၇၅၀ကို ဖမ်းဆီးမိတယ်။ ယာဉ်မောင်းအပါ ၃ ဦးကိုလည်း ဖမ်းမိပါတယ်။ စစ်ဆေးပေါ်ပေါက်တဲ့ ကွင်းဆက်တရားခံ မော်လမြိုင်ကားဂိတ်မှူး ၂ ဦးကိုလည်း ဖမ်းထားပါတယ်။"လို့ ပြောပါတယ်။
အမိုနီယမ်နိုက်ထရိတ် ၁ ကီလိုဂရမ်ကို ခန့်မှန်းကာလပေါက်စျေး ကျပ် ၁၁၀၀ လောက် ရှိတယ်လို့ သိရပါတယ်။
မော်လမြိုင်ဘက်မှ မန္တလေးဘက်ကို သန်းမြတ်စိုး မောင်းတဲ့ ဒဂုံမန်း ခရီးသည်တင် အမြန်ယာဉ်ကို ရှာဖွေရာ အဖြူရောင်ပီနံအိတ်နဲ့ ထည့်ထားတဲ့ အမိုနီယမ်နိုက်ထရိတ်လို့ ယူဆရတဲ့ အဖြူရောင်အခဲ ၁ အိတ်မှာ ၄၅ကီလိုဂရမ်ပါ အိတ် ၂၀ ကီလိုဂရမ် ၉၀၀ ကို ယာဉ်မောင်း သန်းမြတ်စိုး၊ ရန်နိုင်လွင်၊ ပြည့်ဖြိုးကျော်၊ အောင်ကိုဝင်းတို့ ၄ ဦးနဲ့အတူ ကနဦး ဖမ်းဆီးမိခဲ့တာပါ။
ကွင်းဆက်တရားခံအဖြစ် မော်လမြိုင်မြို့ လှိုင်ရပ်ကွက် မြေနီကုန်းကားဝန်းအနီးနေ ဒဂုံမန်း ကားဂိတ်မှူး ဦးသိန်းဇော်က မန္တလေးပို့ဖို့ တင်ပေးလိုက်ကြောင်း စစ်ဆေးသိရှိရပြီး ဦးသိန်းဇော် ကိုလည်း ဖမ်းဆီးပါတယ်။
ဒါ့အပြင် မော်လမြိုင်ဘက်မှ မန္တလေးဘက်ကို ဇော်မင်း မောင်းလာတဲ့ ရာဇာအောင်ခရီးသည်တင်ကားပေါ်က အဖြူရောင်ဆာလာအိတ်နဲ့ ထည့်ထားတဲ့ အမိုနီယမ်နိုက်ထရိတ်လို့ ယူဆရတဲ့ အဖြူရောင်အခဲ ၁ အိတ်မှာ ၃၅ ကီလိုဂရမ်ပါ အိတ် ၅၀ ကီလိုဂရမ် ၁၇၅၀ကို ယာဉ်မောင်း ဇော်မင်း၊ ချမ်းဝင်းအောင်၊ ထွန်းထွန်းဝင်းတို့ ၃ ဦးနဲ့အတူ ဖမ်းဆီးမိပါတယ်။
ကွင်းဆက်တရားခံအဖြစ် မော်လမြိုင်မြို့ လှိုင်ရပ်ကွက် မြေနီကုန်းကားဝန်းနေ ရာဇာအောင်ကားဂိတ်မှူး သူရကျော် (ခ)ကိုပြည့် က မန္တလေးပို့ဖို့ တင်ပေးလိုက်ကြောင်း စစ်ဆေးသိရှိရပြီး သူရကျော်(ခ)ကိုပြည့် ကိုလည်း ဖမ်းဆီးပါတယ်။
အဆိုပါ အမြန်ယာဉ် ၂ စီးပေါ်က အမိုနီယမ်နိုက်ထရိတ် အိတ်ပေါင်း ၇၀ ကီလိုဂရမ် ၂၆၀၀ကျော် ခန့်မှန်း ကာလတန်ဖိုး သိန်း ၃၀နီးပါးကို မော်လမြိုင်ကားဂိတ်မှူး ၂ ဦးအပါ ၉ ဦးကို ဖမ်းမိခဲ့တာပါ။
မော်လမြိုင်ကားဂိတ်မှူး ၂ ဦးအပါ ၉ ဦးကို အမြင့်ဆုံး ထောင်ဒဏ် ၁၀ နှစ်ချမှတ်နိုင်တဲ့ မူးယစ်ဆေးဝါးနဲ့ စိတ်ကိုပြောင်းလဲစေသောဥပဒေပုဒ်မ ၁၆(ခ) နဲ့ အားပေးကူညီမှုပုဒ်မ ၂၁ တို့နဲ့ မိတ္ထီလာသီးကုန်းအမြန်လမ်းရဲစခန်းမှာ ဖမ်းဆီးအမှုဖွင့် ထားပါတယ်။
သတင်း၊ ဓာတ်ပုံ - မောင်မောင်လင်း