ကိုဗစ်လူနာသစ် ၁,၃၅၂ ဦးတွင် ရန်ကုန်က ၆၀၃ ဦး၊ မန္တလေးက ၃၅၂ ဦးဖြင့် အများဆုံးတွေ့ရှိ
DVB
·
December 13, 2020
မနေ့ညက ထုတ်ပြန်တဲ့ ကိုဗစ်-၁၉ ပိုးတွေ့လူနာအသစ် ၁,၃၅၂ ယောက်ထဲမှာ ရန်ကုန်တိုင်း က ၆၀၃ ယောက်၊ မန္တလေးတိုင်းက ၃၅၂ ယောက်နဲ့ အများဆုံးတွေ့ရှိတယ်လို့ ကျန်းမာရေးနဲ့ အားကစားဝန်ကြီးဌာနက ဒီကနေ့ည ၆ နာရီ ၁၅ မိနစ် ထုတ်ပြန်ပါတယ်။
ရန်ကုန်တိုင်းက အတည်ပြုလူနာတွေထဲမှာ မင်္ဂလာဒုံ ၅၆ ယောက်၊ ရွှေပြည်သာ ၅၂ ယောက်၊ မရမ်းကုန်း ၃၆ ယောက်၊ သင်္ဃန်းကျွန်းနဲ့ မှော်ဘီ ၃၅ ယောက် စီနဲ့ အများဆုံး တွေ့ရှိခဲ့ပြီး စုစုပေါင်း မြို့နယ် ၄၁ ခုပါဝင်နေတာ ဖြစ်ပါတယ်။
တိုင်းနဲ့ ပြည်နယ်တွေအလိုက် ကိုဗစ်-၁၉ ရောဂါပိုးတွေ့ရှိမှုအနေနဲ့ မန္တလေးတိုင်းမြို့နယ် ၂၂ ခုမှာ ၃၅၂ ယောက်၊ မကွေးတိုင်း မြို့နယ် ၁၈ ခုမှာ ၁၀၁ ယောက်၊ ပဲခူးတိုင်းမြို့နယ် ၁၅ ခုမှာ ၆၈ ယောက်၊ ရခိုင်ပြည်နယ်မြို့နယ် ၅ ခုမှာ ၅၈ ယောက်၊ မွန်ပြည်နယ်မြို့နယ် ၇ ခုမှာ ၄၃ ယောက်၊ ကရင်ပြည်နယ် မြို့နယ် ၂ ခုမှာ ၃၃ ယောက်၊ ဧရာဝတီတိုင်း မြို့နယ် ၆ ခုမှာ ၂၄ ယောက်၊ ရှမ်းပြည်နယ်မြို့နယ် ၆ ခုမှာ ၁၅ ယောက်၊ စစ်ကိုင်းတိုင်းမြို့နယ် ၅ ခုမှာ ၁၅ ယောက်၊ နေပြည်တော် မြို့နယ် ၃ ခုမှာ ၁၄ ယောက်၊ ကချင်ပြည်နယ်မြို့နယ် ၃ ခုမှာ ၁၁ ယောက်၊ ချင်းပြည်နယ် မြို့နယ် ၃ ခုမှာ ၁၀ ယောက်၊ တနင်္သာရီတိုင်း မြို့နယ် ၂ ခုမှာ ၄ ယောက်၊ ကယားပြည်နယ် လွိုင်ကော်မြို့မှာ ၁ ယောက်စီ အသီးသီး တွေ့ရှိခဲ့ပါတယ်။
ဓာတ်ခွဲအတည်ပြုလူနာသစ်တွေထဲမှာ အနံ့မရရှိသူ ၃၀၂ ယောက် ပါဝင်တယ်လို့ ကျန်းမာရေး နဲ့ အားကစားဝန်ကြီးဌာနက ထုတ်ပြန်ထားပါတယ်။
မြန်မာနိုင်ငံမှာ ဒီဇင်ဘာ ၁၂ ရက် ည ၈ နာရီအထိ ကိုဗစ်-၁၉ အတည်ပြုလူနာစုစုပေါင်း ၁၀၇,၂၁၅ ယောက်၊ သေဆုံးသူ ၂,၂၄၅ ယောက်နဲ့ ဆေးရုံက ဆင်းခွင့်ရသူပေါင်း ၈၅,၄၀၆ ယောက်ရှိပြီလို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
ကမ္ဘာတဝန်းမှာတော့ ဒီနေ့ညနေအထိ ကိုဗစ်-၁၉ အတည်ပြုလူနာသန်း ၇၂ သန်းကျော်၊ သေဆုံးသူ ၁ ဒသမ ၆ သန်းကျော်နဲ့ ရောဂါသက်သာပျောက်ကင်းသူ သန်း ၅၀ ကျော် ရှိနေပြီ ဖြစ်ပါတယ်။
ဓာတ်ပုံ - မန္တလေးမြို့၊ ဧရာဝတီစင်တာ ကိုဗစ်-၁၉ အထူးကြပ်မတ် ကုသဆောင် (ICU)