မကွေးတိုင်းတွင် အတည်ပြုလူနာ အယောက် ၆၀ ထပ်မံတွေ့ရှိ
DVB
·
December 13, 2020
မကွေးတိုင်းဒေသကြီးမှာ မနေ့ညနဲ့ ဒီနေ့မနက် ကိုဗစ်-၁၉ အတည်ပြုလူနာ အယောက် ၆၀ ထပ်မံတွေ့ရှိတယ်လို့ တိုင်းကျန်းမာရေး ဦးစီးဌာနက ထုတ်ပြန်ပါတယ်။
မနေ့ညက အတည်ပြုလူနာသစ် ၅၄ ဦး တွေ့ရှိခဲ့ပြီး တောင်တွင်းကြီး ၇ ဦး၊ ဂန့်ဂေါနဲ့ မြိုင်မြို့နယ်တို့မှာ ၁ ဦးစီ၊ ပွင့်ဖြူ ၄ ဦး၊ ရေနံချောင်း ၂ ဦး၊ မင်းဘူး ၁ ဦး၊ ပခုက္ကူ ၅ ဦး၊ နတ်မောက် ၉ ဦး၊ ချောက် ၁ ဦး၊ မြို့သစ် ၆ ဦး၊ စလင်း ၁၀ ဦး၊ မကွေး ၇ ဦးတို့ ဖြစ်ပါတယ်။
ဒီနေ့မနက်မှာတော့ အတည်ပြုလူနာ ၆ ဦး ထပ်မံတွေ့ရှိခဲ့ပြီး နတ်မောက် ၂ ဦး၊ မြိုင်၊ ပခုက္ကူ ချောက်နဲ့ မကွေးမြို့တို့မှာ ၁ ဦးစီ တွေ့ရှိခဲ့ပါတယ်။
ပိုးတွေ့လူနာများအနက် မင်းဘူးက ၁ ဦး၊ စလင်း ၈ ဦး နဲ့ မကွေးမှ ၂ ဦးနဲ့ နတ်မောက်က ၁ ဦးတို့မှာ ပိုးတွေ့အတည်ပြုလူနာနဲ့ ထိတွေ့မှုရှိသောကြောင့် အသွားအလာကန့်သတ်ထားသူတွေ ဖြစ်ပြီး ကျန်သူတွေက ကွာရန်တင်းစင်တာတွေက ဖြစ်ပါတယ်။
မကွေးတိုင်းဒေသကြီးအတွင်း ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၁၈၂၇ ဦးနဲ့ သေဆုံးသူ ၄ ဦးရှိတယ်လို့ တိုင်းကျန်းမာရေးဦးစီးဌာနက ထုတ်ပြန်ထားပါတယ်။
မကွေးတိုင်းအတွင်း ပိုးတွေ့အတည်ပြုလူနာတွေနဲ့ ထိတွေ့မှုရှိသူတွေဆီကနေ ပိုးတွေ့လူနာတွေ ထပ်တိုးလာတာကြောင့် ပြည်သူတွေအနေနဲ့ အထူးသတိပြုဆင်ခြင် ပြုမှုနေထိုင်ကြဖို့နဲ့ ကျန်းမာရေးဝန်ကြီးဌာနက ထုတ်ထားတဲ့ ကိုဗစ်-၁၉ ရောဂါ ကာကွယ်တားဆီးရေးဆိုင်ရာ လမ်းညွှန်ချက်တွေကို တိကျစွာ လိုက်နာဆောင်ရွက်ကြေဖို့ တိုင်းကျန်းမာရေးဦးစီးဌာနက တိုက်တွန်းထားပါတယ်။
ဒါ့အပြင် Mask စနစ်တကျ အသုံးပြုကြဖို့အတွက် တိုင်းအတွင်းမှာ Mask တွေ လိုက်ဝေတာနဲ့ အသိပညာပေးတာတွေလည်း လုပ်ဆောင်နေတယ်လို့ သိရပါတယ်။