မြန်မာက ကိုဗစ်လူနာအရေအတွက် တရုတ်ကို ကျော်တက်
DVB
·
November 28, 2020
ကိုဗစ်-၁၉ ရောဂါဒုတိယလှိုင်းကာလအတွင်းမှာ မြန်မာနိုင်ငံက ရောဂါဖြစ်ပွားမှု စတင်ရာ အိမ်နီးချင်း တရုတ်နိုင်ငံထက် ရောဂါကူးစက်ခံရသူအရေအတွက် ကျော်လွန်သွားပြီး အာဆီယံဒေသတွင်း ကိုဗစ်-၁၉ ရောဂါကူးစက်ခံရမှုနှုန်း အမြင့်ဆုံး ၃ နိုင်ငံစာရင်းထဲ ပါဝင်လာပါတယ်။
လက်ရှိအချိန်ထိ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူဦးရေ ၈၆,၅၀၁ ယောက်နဲ့ ခုရက်ပိုင်းအတွင်း သေဆုံးသူအရေအတွက် ထပ်တိုးမလာခဲ့ဘဲ ၄,၆၃၄ ယောက်ရှိနေခဲ့တာဖြစ်ကာ ပြန်လည်ပျောက်ကင်းသက်သာလာသူ အရေအတွက်ကတော့ ၈၁,၅၈၂ ယောက် ရှိနေတာ ဖြစ်ပါတယ်။
မြန်မာနိုင်ငံမှာတော့ နိုဝင်ဘာ ၂၇ ရက် ည ၈ နာရီအထိ ရောဂါကူးစက်ခံရသူဦးရေ ၈၆,၆၃၃ ယောက်၊ သေဆုံးသူ ၁,၈၆၅ ယောက်နဲ့ ဆေးရုံက ဆင်းခွင့်ရသူ စုစုပေါင်း ၆၅,၉၇၂ ယောက် ရှိနေတာ ဖြစ်ပါတယ်။
ပြီးခဲ့တဲ့ မတ်လ ၂၃ ရက်နေ့က ကိုဗစ်-၁၉ အတည်ပြုလူနာကို မြန်မာနိုင်ငံမှာ စ တင်တွေ့ရှိခဲ့ပြီး ရခိုင်ပြည်နယ်က တကျော့ပြန်စတင်ခဲ့တဲ့ ဒုတိယ လှိုင်းကာလအတွင်းမှာတော့ ရောဂါကူးစက်ခံရသူအရေအတွက်ဟာ သိသိသာသာမြင့်တက်လာခဲ့ပြီး သေဆုံးသူ အရေအတွက်လည်း မြင့်တက်နေခဲ့တာပါ။
လတ်တလောမှာလည်း အစိုးရက ပြည်သူတွေကို ကိုဗစ်-၁၉ ရောဂါကူးစက်ပြန့်ပွားမှု ထပ်တိုးမလာစေဖို့ မကြာမီရောက်လာတော့မယ့် ပွင့်လင်းရာသီပိတ်ရက်တွေမှာ ပြည်သူတွေအနေနဲ့ မလိုအပ်ဘဲ ခရီးသွားလာတာတွေ၊ လူစုလူဝေးပြုလုပ်တာတွေ မလုပ်ကြဖို့၊ တတ်နိုင်သမျှ နေအိမ်ထဲမှာသာ နေထိုင်ကြဖို့ ကျန်းမာရေးနဲ့ အားကစားဝန်ကြီးဌာနက နိုဝင်ဘာ ၁၉ ရက်စွဲနဲ့ ပန်ကြားထားပါတယ်။ မြန်မာနိုင်ငံမှာ ကိုဗစ်-၁၉ ဓာတ်ခွဲ အတည်ပြုလူနာတွေရဲ့ ၇၅ ရာခိုင်နှုန်းဟာ ဆေးရုံက ဆင်းခွင့်ရခဲ့ကြောင်း ဖော်ပြထားပါတယ်။
ပြီးခဲ့တဲ့ ၂၀၁၉ ခုနှစ်ကုန်ပိုင်းမှာ တရုတ်နိုင်ငံအလယ်ပိုင်း ဝူဟန်မြို့က စတင်ခဲ့တဲ့ ကိုဗစ်-၁၉ ရောဂါကူးစက်ပျံ့နှံ့မှုဟာ ကမ္ဘာ့နိုင်ငံတွေအနှံ့ ကပ်ရောဂါတခုအသွင် ဆောင်လာခဲ့ပြီး တကမ္ဘာလုံးအတိုင်းအတာနဲ့ ရောဂါကူးစက်ခံရသူစုစုပေါင်း ၆၂ သန်းကျော်နဲ့ သေဆုံးသူအရေအတွက် ၁ ဒသမ ၄ သန်းကျော်လွန်လာခဲ့ပြီ ဖြစ်ပါတယ်။
ရောဂါဖြစ်ပွားမှု အမြင့်ဆုံးနိုင်ငံတွေထဲမှာတော့ အမေရိကန်နိုင်ငံက ကူးစက်ခံရသူ ၁၃ သန်းကျော်၊ သေဆုံးသူ ၂၇၁,၀၂၉ ယောက်၊ အိန္ဒိယနိုင်ငံက ကူးစက်ခံရသူ ၉ ဒသမ ၃ သန်းကျော်၊ သေဆုံးသူ ၁၃၆,၂၃၈ ယောက်၊ ဘရာဇီးနိုင်ငံက ကူးစက်ခံရသူ ၆ ဒသမ ၂ သန်းကျော်၊ သေဆုံးသူ ၁၇၁,၉၉၈ ယောက်စီနဲ့ ထိပ်ဆုံး ၃ နိုင်ငံအနေနဲ့ အသီးသီး ရပ်တည်နေပါတယ်။
အဲဒီ ၃ နိုင်ငံနောက်မှာတော့ ကိုဗစ်-၁၉ ရောဂါသန်းနဲ့ချီကူးစက်ခံရတဲ့ နိုင်ငံ တွေအဖြစ် ရုရှား၊ ပြင်သစ်၊ စပိန်၊ ယူကေ၊ အီတလီ၊ အာဂျင်တီးနား၊ ကိုလံဘီယာ၊ မက္ကဆီကို၊ ဂျာမနီနိုင်ငံတွေက အစဉ်လိုက် ရှိနေခဲ့တာပါ။
အာရှဒေသတွင်း နိုင်ငံတွေထဲမှာတော့ ကိုဗစ်-၁၉ ရောဂါကူးစက်ပြန့်ပွားမှု အမြင့်ဆုံး အိန္ဒိယ နိုင်ငံပြီးပါက အီရန်၊ တူရကီနဲ့ အီရတ်နိုင်ငံတွေက ကူးစက်ခံရသူဦးရေ ၉၂၂,၃၉၇ ယောက်၊ ၅၄၈,၂၄၄ ယောက်၊ ၅၄၇,၂၁၅ ယောက်စီနဲ့ အသီးသီး ရှိနေပါတယ်။
မြန်မာနဲ့ အိမ်နီးချင်းနိုင်ငံတနိုင်ငံဖြစ်တဲ့ ဘင်္ဂလားဒေ့ရှ်နိုင်ငံမှာတော့ ကိုဗစ်-၁၉ ရောဂါကူး စက်ခံရသူဦးရေ ၄၆၀,၆၁၉ ယောက်နဲ့ သေဆုံးသူ ၆,၅၈၀ ယောက် ရှိနေတာ ဖြစ်ပါတယ်။
အာဆီယံနိုင်ငံတွေထဲမှာတော့ အင်ဒိုနီးရှားနဲ့ ဖိလစ်ပိုင်နိုင်ငံတွေက ကိုဗစ်-၁၉ ရောဂါကူး စက်ခံရသူဦးရေ ၅၂၇,၉၉၉ ယောက်၊ ၄၂၇,၇၉၇ ယောက်စီနဲ့ ထိပ်ဆုံးမှာရှိနေပြီး တတိယနေရာမှာတော့ မြန်မာနိုင်ငံက ရှိနေပါတယ်။
လက်ရှိအချိန်ထိ ကျန်းမာရေးနဲ့ အားကစားဝန်ကြီးဌာနက အချိန် ၈ လကျော် ကာလအတွင်း ဓာတ်ခွဲစစ်ဆေးမှု စုစုပေါင်း ၁ ဒသမ ၁ သန်းကျော် ပြုလုပ်ခဲ့ပြီးဖြစ်ကာ စောင့်ကြည့်လူနာပေါင်း ၁၅,၅၈၁ ယောက် ရှိနေတယ်လို့ ဝန်ကြီးဌာန ဝက်ဘ်ဆိုက်ဒ်မှာ ဖော်ပြထားပါတယ်။
စင်ကာပူနိုင်ငံကတော့ ရောဂါကူးစက်ခံရသူအရေအတွက် ၅၈,၂၀၅ ယောက်နဲ့ သေဆုံးသူ အရေအတွက် ထပ်တိုးမလာဘဲ ၂၈ ယောက် ရှိနေတာ ဖြစ်ပါတယ်။
မလေးရှားနိုင်ငံမှာတော့ ကိုဗစ်-၁၉ ရောဂါ ကူးစက်ခံရသူ အရေအတွက် ၆၁,၈၆၁ ယောက်နဲ့ သေဆုံးသူ ၃၅၀ ယောက် ရှိပါတယ်။
မြန်မာနဲ့ အိမ်နီးချင်းနိုင်ငံတနိုင်ငံဖြစ်တဲ့ ထိုင်းနိုင်ငံမှာတော့ ကိုဗစ်-၁၉ ရောဂါကူး စက်ခံရသူ အရေအတွက် ၃,၉၆၆ ယောက်နဲ့ ခုရက်ပိုင်းအတွင်း သေဆုံးသူအရေအတွက် ထပ်တိုးမလာဘဲ အယောက် ၆၀ ယောက် ရှိနေပါတယ်။
ဗီယက်နမ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၁,၃၃၉ ယောက်နဲ့ သေဆုံးသူအရေအတွက် ခုရက်ပိုင်းမှာ တိုးမလာဘဲ ၃၅ ယောက် ရှိနေပြီး ဘရူ နိုင်းနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၁၅၀ ယောက်နဲ့ သေဆုံးသူ ၃ ယောက် ရှိနေတာပါ။
ကမ္ဘောဒီးယားနဲ့ လာအိုနိုင်ငံတွေမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၃၀၈ ယောက်နဲ့ ၃၉ ယောက် အသီးသီးရှိနေပေမယ့် သေဆုံးလူနာ ခုချိန်ထိ မရှိသေးပါဘူး။