ရွေးကောက်ပွဲရလဒ်ကို အယုံအကြည်မရှိကြောင်း ကြံ့ခိုင်ရေးပါတီဝန်းရံသူများ ဆန္ဒထုတ်ဖော်
နေဖြိုးဝင်း
·
November 15, 2020
ကျင်းပပြီးစီးခဲ့တဲ့ ၂၀၂၀ ပြည့်နှစ် နိုဝင်ဘာလ ၈ ရက်နေ့က အထွေထွေရွေးကောက်ပွဲမှာ ထွက်ပေါ်လာတဲ့ ရလဒ်တွေနဲ့ ပြည်ထောင်စုရွေးကောက်ပွဲကော်မရှင်ကို အယုံအကြည်မရှိကြောင်း ကြံ့ခိုင်ရေးပါတီ ဝန်းရံသူတွေက နေပြည်တော်မှာ ဒီနေ့မနက် ဆန္ဒထုတ်ဖော်ခဲ့ကြပါတယ်။
နေပြည်တော်ကောင်စီနယ်မြေအတွင်းရှိ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ ဝန်းရံသူတွေ အင်အား ၁ ထောင်လောက် နိုဝင်ဘာလ ၁၅ ရက်နေ့ မနက်ပိုင်းက ဥတ္တရသီရိမြို့နယ် ရွှေနံ့သာဘောလုံးကွင်းမှာ စု ဝေးဆန္ဒထုတ်ဖော်ခဲ့ကြတာပါ။
ရွေးကောက်ပွဲကော်မရှင် အယုံအကြည်မရှိ၊ ရွေးကောက်ပွဲရလဒ် အယုံအကြည်မရှိ၊ ကိုဗစ်ငွေကြေး မဲဝယ်ပေး အလိုအရှိ စတဲ့အချက်သုံးချက်ကို ကြွေးကြော်ပြီး ရွေးကောက်ပွဲ စတင်ပြင်ဆင်တာကနေ ရွေးကောက်ပွဲရလဒ်ထွက်ပေါ်တဲ့အထိ ဆောင်ရွက်ခဲ့တဲ့ တရားမဲ့ပြုကျင့်မှုတွေကို သုံးသပ်ခြင်းဆိုပြီး ဆွေးနွေးမှုတွေလည်း ပြုလုပ်ခဲ့ပါတယ်။
၂၀၂၀ ပြည့်နှစ် နိုဝင်ဘာ ၈ ရက်နေ့ ရွေးကောက်ပွဲမှာ တနိုင်ငံလုံးအတိုင်းအတာအနေနဲ့ အန်အယ်လ်ဒီပါတီက ကိုယ်စားလှယ်အယောက် ၉၂၀၊ ကြံ့ခိုင်ရေးပါတီက ၇၁ ဦး၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်က ၄၂ ဦး၊ ရခိုင်အမျိုးသားပါတီက ၁၅ ဦး အများဆုံး အနိုင်ရရှိခဲ့ကြပါတယ်။