Homeမြန်မာသတင်း
ဧရာ၀တီတိုင်းတွင် ကိုယ်စားမဲပေးမှု ၃ မှုနှင့် ၁ ဦးတည်း မဲနှစ်ကြိမ်ပေးမှု ၁၀ မှုဖြစ်
ဧရာ၀တီတိုင်းတွင် ကိုယ်စားမဲပေးမှု ၃ မှုနှင့် ၁ ဦးတည်း မဲနှစ်ကြိမ်ပေးမှု ၁၀ မှုဖြစ်
DVB
·
November 12, 2020
ဧရာဝတီတိုင်းမှာ ရွေးကောက်ပွဲအတွင်း ၁ ဦးတည်း မဲနှစ်ကြိမ်ပေးမှု ၁၀ မှုဖြစ်ပွားခဲ့ပြီး ကိုယ်စားမဲပေးမှုက ၃ မှုမှာ အသက်မပြည့်သေး ၂ ဦး ပါဝင်တယ်လို့ သိရပါတယ်။
၁ ဦးတည်း မဲနှစ်ကြိမ်ပေးခဲ့မှုက မအူပင်မြို့နယ်မှာ ၄ မှု၊ အင်္ဂပူမြို့နယ်မှာ ၂ မှု၊ ကန်ကြီးထောင့်၊ မော်လမြိုင်ကျွန်း၊ ဓနုဖြူ၊ ကျောင်းကုန်းနဲ့ လပွတ္တာမြို့နယ်တွေမှာ ၁ မှုစီ ဖြစ်ပွားခဲ့တယ်လို့ ဧရာ၀တီတိုင်း ရွေးကောက်ပွဲကော်မရှင် မှတ်တမ်းတွေအရ သိရပါတယ်။
တိုင်းရွေးကောက်ပွဲကော်မရှင် အဖွဲ့ခွဲဥက္ကဋ္ဌ ဦးအောင်မြင့်က "ဆန္ဒမဲပေးပိုင်ခွင့်ရှိသူ မဲစာရင်းထဲမှာ ပါမှပေးရမယ်။ အဲ့ဒါတော့ လူတိုင်းသိမယ်ထင်တယ်။ အခုလာပေးတဲ့ သူတွေဟာ မသိလို့ မဲပေးမိတယ်ဆိုတာ မဖြစ်နိုင်ဘူး။ အဲ့ဒါကြောင့် ရဲစခန်းကို တိုင်လိုက်တယ်" လို့ ပြောပါတယ်။
တစ်ဦးကို မဲတစ်ကြိမ်ပဲပေးရမယ်ဆိုတာ မသိတာဆိုတာ မဖြစ်နိုင်တဲ့အတွက် ရဲတပ်ဖွဲ့ကို တိုင်ကြားခဲ့သလို ရဲစခန်းကလည်း အမှုဖွင့်စစ်ဆေးတာတွေပြုလုပ်နေတယ်လို့ ဆိုပါတယ်။
မဲနှစ်ကြိမ်ပေးခဲ့လို့ အမှုဖွင့်ခံရသူတွေထဲမှာ ကျောင်းဆရာ ၁ ဦးနဲ့ ကျောင်းဆရာမ ၁ ဦးအပါအ၀င် အမျိုးသား ၄ ဦး၊ အမျိုးသမီး ၆ ဦးတို့ အမှု့ဖွင့်ခံခဲ့ရပြီး ကြိုတင်မဲပေးရာမှာ ဖြစ်ပွားခဲ့တာ ၈ မှုအထိ ပါ၀င်တယ်လို့ ဆိုပါတယ်။
ဒါ့အပြင် အသက်မပြည်သေးသူ ၂ ဦးအပါအဝင် ကိုယ်စားမဲပေးမှု ၃ မှုဖြစ်ခဲ့ပြီး မြန် အောင်မြို့နယ်နဲ့ လေးမျက်နှာမြို့နယ်က အသက် ၁၆ နှစ်အရွယ် မိန်းကလေးငယ် ၂ ဦးပါ၀င်နေတယ်လို့ ဧရာ၀တီတိုင်းဒေသကြီး ရွေးကောက်ပွဲကော်မရှင် အဖွဲ့ခွဲက သိရပါတယ်။
"ဒါမျိုးက ၂၀၁၅ တုန်းကလည်း ဖြစ်ဘူးပါတယ်၊ အမေဖြစ်သူမအားလို့ သမီးဖြစ်သူက စလစ်ပြားယူပြီးလာပေးတာမျိုးတွေရှိပါတယ် အမှုဖွင့်ထားပါတယ် " လို့ ရွေးကောက်ပွဲကော်မရှင် အဖွဲ့ခွဲဥက္ကဌ ဦးအောင်မြင့်က ပြောပါတယ်။
အသက်မပြည့်သေးသူ ၂ ဦးမှာ ထိုင်းနိုင်ငံမှာ ရောက်နေတဲ့ အစ်မဖြစ်သူကိုယ်စားမဲပေးခဲ့သူနဲ့ အမေဖြစ်သူထမင်းချက်နေစဉ် ကိုယ်စားမဲပေးခဲ့ တာကြောင့် အမှုဖွင့်ခံထားရတယ်လို့ ဆိုပါတယ်
နောက်ထပ်ကိုယ်စားမဲပေးခဲ့တဲ့အမှုကတော့ ကျိုက်လတ်မြို့နယ်က ဒေါ်ဌေးဆိုသူ အမျိုးသမီး ကိုယ်စား အခြားအမျိုးသမီးက မဲလာပေးတာဖြစ်ပြီး တာဝန်ရှိသူတွေက လိမ်လည်မှုနဲ့အမှုဖွင့်ထားတယ်လို့ သိရပါတယ်။
ဒါ့ပြင် တံဆိပ်တုံးအတုနဲ့ မဲပေးမှု ၁ မှု၊ မဲလက်မှတ် ဖျက်ဆီးမှု ၁ မှုနဲ့ မဲရုံဖျက်ဆီးမှု ၁ မှုတို့ ဖြစ်ပွားခဲ့တယ်လို့ ရွေးကောက်ပွဲကော်မရှင် အဖွဲ့ခွဲစာရင်းတွေအရ သိရပါတယ်။
သတင်း - မင်းထက်မုန်း (ပုသိမ်)