ကိုဗစ်လူနာသစ် ၁၂၆၆ ဦးတွင် ရန်ကုန်က ၉၂၄ ဦးဖြင့် အများဆုံးဖြစ်၊ အနံ့မရရှိသူ ၃၅၀ ပါဝင်
DVB
·
November 11, 2020
မနေ့ညက ထုတ်ပြန်တဲ့ ကိုဗစ်-၁၉ ပိုးတွေ့လူနာအသစ် ၁,၂၆၆ ယောက်ထဲမှာ ရန်ကုန်တိုင်း က ၉၂၄ ယောက်၊ မန္တလေးတိုင်းက ၁၀၁ ယောက်နဲ့ အများဆုံးပါဝင်တယ်လို့ ကျန်းမာရေးနဲ့ အားကစားဝန်ကြီးဌာနရဲ့ ဒီကနေ့ညနေ ၅ နာရီ ထုတ်ပြန်ချက်အရ သိရပါတယ်။
ရန်ကုန်တိုင်းက အတည်ပြုလူနာတွေထဲမှာ လှိုင်သာယာမြို့နယ်က ၉၄ ယောက်၊ မင်္ဂလာဒုံမြို့ နယ်က အယောက် ၈၀နဲ့ မြောက်ဉက္ကလာပမြို့နယ်က ၇၃ ယောက် စီနဲ့ အများဆုံးတွေ့ရှိခဲ့ပြီး စုစုပေါင်းမြို့နယ် ၄၁ ခု ပါဝင်နေတာ ဖြစ်ပါတယ်။
တိုင်းနဲ့ ပြည်နယ်တွေအလိုက် ကိုဗစ်-၁၉ ရောဂါပိုးတွေ့ရှိမှုအနေနဲ့ မန္တလေးတိုင်း မြို့နယ် ၁၂ ခုမှာ ၁၀၁ ယောက် ၊ ဧရာဝတီတိုင်းမြို့နယ် ၁၂ ခုမှာ ၅၇ ယောက်၊ တနင်္သာရီတိုင်း မြို့နယ် ၂ ခုမှာ ၄ ယောက်၊ ရခိုင်ပြည်နယ်မြို့နယ် ၇ ခုမှာ ၅၈ ယောက်၊ ပဲခူးတိုင်းမြို့နယ် ၁၁ ခုမှာ အယောက် ၄၀၊ မကွေးတိုင်းမြို့နယ် ၁၁ ခုမှာ ၄၇ ယောက်၊ စစ်ကိုင်းတိုင်းမြို့နယ် ၅ ခု မှာ ၁၇ ယောက်၊ မွန်ပြည်နယ်မြို့နယ် ၆ ခုမှာ ၁၀ ယောက်၊ ကရင်ပြည်နယ် မြို့နယ် ၂ ခုမှာ ၃ ယောက်၊ ရှမ်းပြည်နယ်တောင်ကြီးမှာ ၁ ယောက်၊ နေပြည်တော်မြို့နယ် ၂ ခုမှာ ၃ ယောက်၊ ချင်းပြည်နယ် တီးတိန်မြို့နယ်မှာ ၁ ယောက်စီ အသီးသီး တွေ့ရှိခဲ့ပါတယ်။
ဓာတ်ခွဲအတည်ပြုလူနာသစ်တွေထဲမှာ အနံ့မရရှိသူ အယောက် ၃၅၀ ပါဝင်တယ်လို့ ကျန်းမာ ရေးနဲ့ အားကစားဝန်ကြီးဌာနက ထုတ်ပြန်ထားပါတယ်။
မြန်မာနိုင်ငံမှာ နိုဝင်ဘာ ၁၀ ရက် ည ၈ နာရီအထိ ကိုဗစ်-၁၉ အတည်ပြုလူနာစုစုပေါင်း ၆၃,၂၄၁ ယောက်၊ သေဆုံးသူ ၁၄၆၁ ယောက်နဲ့ ဆေးရုံက ဆင်းခွင့်ရသူပေါင်း ၄၇,၄၁၁ ယောက်ရှိပြီလို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
ကမ္ဘာတဝန်းမှာတော့ ဒီနေ့ညနေ ၅ နာရီအထိ ကိုဗစ်-၁၉ အတည်ပြုလူနာ ၅၁ ဒသမ ၉ သန်းကျော်၊ သေဆုံးသူ ၁ ဒသမ ၂ သန်းကျော်နဲ့ ရောဂါသက်သာပျောက်ကင်းသူ ၃၆ ဒသမ ၄ သန်းကျော် ရှိနေပြီ ဖြစ်ပါတယ်။