ရှမ်းပြည်နယ်တောင်ပိုင်းတွင် ကိုဗစ်-၁၉ လူနာသစ် ၁၂ ဦး တွေ့ရှိ
DVB
·
October 8, 2020
ရှမ်းပြည်နယ်၊ တောင်ပိုင်းမှာ အောက်တိုဘာ ၇ ရက်နေ့က ကိုဗစ်-၁၉ လူနာသစ် ၁၂ ဦး တွေ့ရှိတယ်လို့ ပြည်နယ်ပြည်သူ့ကျန်းမာရေးဦးစီးဌာနက သိရပါတယ်။
ရှမ်းပြည်နယ် (တောင်ပိုင်း) ပြည်သူ့ကျန်းမာရေးဓာတ်ခွဲမှုဆိုင်ရာဌာန (တောင်ကြီးမြို့)က အောက်တိုဘာ ၇ ရက်နေ့က နှာခေါင်း၊ အာခေါင်တို့ဖတ် နမူနာ အခု ၂၈၀ အား စစ်ဆေးချက်အရ လူနာသစ် ၁၂ ဦးတွေ့ရှိခဲ့တာပါ။
ကိုဗစ်-၁၉ လူနာတွေနဲ့ ထိတွေ့ခဲ့သူ ၄ ဦးနဲ့ ရန်ကုန်က ပြန်လာသူတွေဖြစ်ပြီး Qurantine center တွေမှာ ထားရှိထားသူတွေလို့ ဆိုပါတယ်။
လူနာသစ်တွေထဲမှာ ကလောမြို့ ရေယားရွာ စစ်ဆေးရေးဂိတ်မှာ ပထမဆုံး Rapid Test Kit နဲ့ ပိုးတွေ့ခဲ့တဲ့ လူနာအမှတ် ၁၈၇၇၀ ယာဉ်မောင်း နဲ့ ထိတွေ့ခဲ့တဲ့ ယာဉ်နောက်လိုက် ၁ ဦး ပါတယ်လို့ သိရပါတယ်။
ပြည်နယ်ပြည်သူ့ကျန်းမာရေးဦးစီးဌာနက ဒေါက်တာ ဇဝနကိုက “ဒီစပါယ်ယာက အောက်တိုဘာ ၃ ရက်နေ့က test kit နဲ့ စစ်တော့ နက်ဂတစ်ထွက်ပါတယ်။ ဒါပေမယ့် ကျနော်တို့က စိတ်ချရအောင် ကွာရန်တင်းထားပြီး အောက်တိုဘာ ၇ နေ့က PCR စက်ကြီးနဲ့ စစ်တော့မှ ပေါ့စတစ်ထွက်သွားတာပါ။ အေးသာယာက ပိုးတွေ့ခဲ့တဲ့ အနံ့ ပျောက် လူနာရဲ့ ယာဉ်မောင်းနဲ့ သူတို့နဲ့ထိတွေ့ခဲ့တဲ့ လူတွေထဲက ပဲဖြစ်ပါတယ်။ ၁၂ ယောက်လုံး အမျိုးသားတွေချည်းပါပဲ။”
ကလောမြို့နယ် စစ်ဆေးရေးဂိတ်မှာ RDT နဲ့ ၉၂ ဦးအား စစ်ဆေးရာတော့ ကိုဗစ်-၁၉ ပိုးတွေ့ရှိသူ မရှိဘူးလို့ ပြည်နယ်ကုသရေးနှင့် ပြည်သူ့ကျန်းမာရေးဦးစီးဌာနက ထုတ်ပြန်ထားပါတယ်။
ရှမ်းပြည်တောင် တောင်ပိုင်းမှာ အောက်ဘာ ၆ ရက်နေ့အထိ ကိုဗစ်-၁၉ အတည်ပြုလူနာ ၂၈ ဦးနဲ့ သေဆုံးသူ ၁ ဦး ရှိတယ်လို့ ပြည်သူ့ကျန်းမာရေးဦးစီးဌာနက ထုတ်ပြန်ထားပါတယ်။
