ကိုဗစ်-၁၉ လူနာသစ် ၂၁၆ ဦး၊ သေဆုံးသူ ၁ ဦးထပ်တိုးလာ
DVB
·
September 23, 2020
ကိုဗစ်-၁၉ လူနာသစ် ၂၁၆ ဦး၊ သေဆုံးသူ ၁ ဦးထပ်တိုးလာပြီး မြန်မာနိုင်ငံမှာ အတည်ပြုလူနာပေါင်း ၆,၉၅၉ ဦးနဲ့ သေဆုံးသူ ၁၁၆ ဦးရှိသွားပြီလို့ ကျန်းမာရေးနဲ့ အားကစားဝန်ကြီးဌာနရဲ့ ဒီနေ့ မနက် ထုတ်ပြန်ချက်အရ သိရပါတယ်။
သေဆုံးသွားသူကတော့ ဖောင်ကြီး ကိုဗစ်-၁၉ ကုသရေးဌာနမှာ တက်ရောက်ဆေးကုသမှု ခံယူနေရတဲ့ (လူနာအမှတ်- ၄၅၈၁ ) အသက် ၄၃ နှစ်အရွယ်အမျိုးသမီးတစ်ဦးဖြစ်ပြီး မနေ့ည ၉ နာရီ ၂၀ မိနစ်က သေဆုံးသွားတာဖြစ်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်) (NHL) မှ (ဒုတိယအသုတ်) ဓာတ်ခွဲ နမူနာ ၁,၃၁၁ ခု၊ ဆေးသုတေသနဦးစီးဌာန(DMR) မှ (ဒုတိယအသုတ်) ဓာတ်ခွဲနမူနာ ၁၉၀ ခု၊ ရန်ကုန်မြို့၊ အမှတ်(၁) တပ်မတော်ဆေးရုံကြီး (ခုတင်-၁၀၀၀) မှ ဓာတ်ခွဲနမူနာ ၁,၁၈၉ ခု အပါအဝင် စုစုပေါင်း ဓာတ်ခွဲနမူနာ ၃,၀၈၃ ခုတို့ကို ထပ်မံ စစ်ဆေးပြီးစီးခဲ့ရာ လူနာသစ် ၂၁၆ ဦးတွေ့ရှိတာဖြစ်ပါတယ်။
စက်တင်ဘာ ၂၂ ရက်အတွက် ဓာတ်ခွဲနမူနာ စုစုပေါင်း ၅,၅၈၂ ခုကို စစ်ဆေးခဲ့ရာမှာ မနေ့ညက ၂၇၃ ဦး ဒီနေ့မနက် ၂၁၆ ဦး၊ စုစုပေါင်း ကိုဗစ်-၁၉ ရောဂါ ဓာတ်ခွဲအတည်ပြုလူနာ သစ် ၄၈၉ ဦး တွေ့ရှိခဲ့တာဖြစ်ပါတယ်။
စက်တင်ဘာ ၂၃ ရက် မနက် ၈ နာရီအထိ မြန်မာနိုင်ငံမှာ ကိုဗစ်-၁၉ ရောဂါ ဓာတ်ခွဲအတည်ပြုလူနာပေါင်း ၆,၉၅၉ ဦး၊ သေဆုံးသူ ၁၁၆ ဦး၊ ဆေးရုံမှ ဆင်းခွင့်ပြုခဲ့သူ ၁,၉၅၁ ဦးနဲ့ စောင့်ကြည့်လူနာအသစ် ၃၇၂ ဦးရှိပါတယ်။
