Music Zone လူနာနှင့်ထိတွေ့ခဲ့သူ နတ်မောက်က ၁ ဦးတွင် ကိုဗစ်-၁၉ ရောဂါပိုး တွေ့ရှိ
DVB
·
September 17, 2020
မကွေးတိုင်းဒေသကြီး နတ်မောက်မြို့နယ်မှာ သင်္ဃန်းကျွန်းမြို့နယ် Music Zone KTV က အလုပ်လုပ်ပြီး ပြန်လာတဲ့ အတည်ပြုလူနာတွေနဲ့ ကားအတူစီးလာတဲ့ အမျိုးသားတစ်ဦးမှာ စက်တင်ဘာ ၁၆ ရက်နေ့ညပိုင်းက ကိုဗစ်-၁၉ ရောဂါပိုးတွေ့ရှိခဲ့တယ်လို့ သိရပါတယ်။
အသက် ၃၂ နှစ်အရွယ် အမျိုးသားတဦးမှာ ကိုဗစ်-၁၉ ရောဂါပိုးတွေ့ရှိခဲ့တာလို့ မကွေးတိုင်း ပြည်သူ့ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာခင်မောင်သန်းက ပြောပါတယ်။
"နတ်မောက်မြို့နယ်မှာ စက်တင်ဘာ ၁၀ ရက်နေ့က Music Zone KTV မှာအလုပ်လုပ်ပြီး ပြန်လာတဲ့ အမျိုးသား ၂ ဦး၊ စက်တင်ဘာလ ၁၂ ရက်နေ့မှာလည်း Music Zone ပြန်အမျိုးသား ၁ ဦးမှာ ကိုဗစ်-၁၉ ရောဂါပိုးတွေ့ရှိခဲ့ပြီးတော့ သူတို့နဲ့အတူကားစီးလာတဲ့ ရန်ကုန်ပြန် အမျိုးသား ၁ ဦးမှာ ရောဂါပိုးတွေ့ရှိခဲ့ပြီး နတ်မောက်မြို့ရဲ့ စတုတ္ထမြောက်လူနာဖြစ်တယ်” လို့ ပြောပါတယ်။
လူနာကို မကွေးမြို့ သင်ကြားရေး ဆေးရုံကြီး အထူးကြပ်မတ်ကုသဆောင်မှာ ကုသပေးမှာဖြစ်ပြီး သူနဲ့ ဆက်စပ်ခဲ့တဲ့သူတွေကိုလည်း နှာခေါင်းတို့ဖတ်၊ အာခေါင်တို့ဖတ်တွေရယူပြီး ဓာတ်ခွဲနမူနာပေးပို့ စစ်ဆေးသွားမယ်လို့ ဆိုပါတယ်။
မကွေးတိုင်းအတွင်းက မြို့နယ် ၇ မြို့နယ်မှာ ကိုဗစ်-၁၉ အတည်ပြုလူနာ ၁၃ ဦးတွေ့ရှိခဲ့ပြီး ၃ ဦးရောဂါပိုးကင်းစင်၊ ၁ ဦးဆေးရုံဆင်းခွင့်ရရှိပြီး ၉ ဦးကတော့ ဆေးဝါးကုသမှုခံယူနေတယ်လို့ တိုင်းဒေသကြီးပြည်သူ့ကျန်းမာရေးဦးစီးဌာနက သိရပါတယ်။
သတင်း-မင်းထီး
