မအူပင်နှင့် ဘိုကလေးက ကိုဗစ်-၁၉ လူနာ ၄ ဦးအနက် Music Zone ဝန်ထမ်း ၂ ဦးပါဝင်
DVB
·
September 10, 2020
ဧရာဝတီတိုင်းမှာ ကိုဗစ် - ၁၉ ရောဂါ အတည်ပြုလူနာ ၉ ဦးထိတွေ့ရှိခဲ့ပြီး ပိုးတွေ့ လူနာတွေကတော့ ဖျာပုံ၊ မအူပင်၊ ဘိုကလေး စတဲ့မြို့နယ်တွေက ဖြစ်တယ်လို့ ကျန်းမာရေးနဲ့ အား ကစားဝန်ကြီးဌာန သတင်းထုတ်ပြန်ချက်အရ သိရပါတယ်။
အတည်ပြုလူနာတွေ့ရှိခဲ့တဲ့ မအူပင်မြို့နယ်က ၃ ဦးနဲ့ ဘိုကလေးမြို့နယ်က ၁ ဦးထဲမှာ ရန်ကုန်မြို့ Music Zone မှာ အလုပ်လုပ်တဲ့ ဝန်ထမ်း ၂ ဦး ပါဝင်လာတယ်လို့ ကျန်းမာရေး တာဝန်ရှိသူတွေထံက သိရပါတယ်။ Music Zone ဟာ ရန်ကုန် သင်္ဃန်းကျွန်းမြို့နယ် သုမင်္ဂလာလမ်းမှာ စားသောက်ဆိုင်၊ စင်တင်တေးဂီတနဲ့ KTV တွဲဖွင့်ထားတဲ့ဆိုင်ဖြစ်ပြီး ကိုဗစ်-၁၉ ပိုးတွေ့လူနာ ၇၃ ယောက် စစ်ဆေးတွေ့ရှိထားတဲ့ နေရာဖြစ်ပါတယ်။
မအူပင်ခရိုင် ပြည်သူ့ကျန်းမာရေး ဦးစီးဌာနမှူး ဒေါက်တာခင်မာစိုးက "မအူပင်မြို့နယ်က ရောဂါပိုးတွေ့ရှိခဲ့သူ ၃ ဦးမှာ လူနာအမှတ် ၁၃၉၅ နဲ့ ထိတွေခဲ့သူ ၁ ဦးနဲ့ Music Zone မှာ အလုပ်သွားလုပ်ပြီး ပြန်လာသူ ၁ ဦးနဲ့ သူ့ရဲ့ သမီးတို့မှာ ရောဂါပိုးတွေ့ရှိခဲ့တာပါ၊ ခုတော့ ဆေးရုံမှာ ကုသတာတွေ လုပ်ပေးနေပါပြီ" လို့ ပြောပါတယ်။
ပိုးတွေ့ခဲ့တဲ့အတည်ပြုလူနာ Music Zone ဝန်ထမ်းဟာ စက်တင်ဘာ ၁ ရက်နေ့က မအူပင်ကို ပြန်လာတာဖြစ်ပြီး တာဝန်ရှိသူတွေက သတင်းရသွားရောက်ပြီး နေအိမ်ပြင်ပ သွားလာတာမျိုး မလုပ်ဖို့ ပြောခဲ့ပြီး ၇ ရက်နေ့မှာ အနံ့ မရတော့လို့ ဓာတ်ခွဲစစ်ဆေးချိန်မှာ အမေရော သမီးမှာပါ ရောဂါပိုး တွေ့ရှိခဲ့တာဖြစ်ပါတယ်။
သူနဲ့ထိတွေ့ခဲ့သူတွေကို လိုက်လံစုံစမ်းနေပြီး ပြန်ရောက်ကတည်းက အိမ်ထဲက အိမ်ပြင်မထွက်အောင်သတိပေးထားလို အိမ်လာလည်တဲ့ အမျိုးတော်စပ်သူ ၁၆ ဦးလောက်ကိုတော့ စုံစမ်းနေတယ်လို့ တာဝန်ရှိသူတွေက ပြောပါတယ်။
ဘိုကလေးမြို့မှာ ပထမဆုံးပိုးတွေ့ရှိခဲ့တဲ့ ကိုဗစ် - ၁၉ အတည်ပြုလူနာဟာလည်း စက်တင်ဘာ ၁ ရက်က အငှားကားနဲ့ ပြန်လည်ရောက်ရှိတဲ့ Music Zone ဝန်ထမ်းအမျိုးသမီး ၁ ဦး ဖြစ်တယ်လို့ မြို့နယ် Quarantine Officer ဦးအေးသောင်းက ပြောပါတယ်။
"သူ့ကို ပြန်ရောက်ကတည်းက ဆေးရုံကိုတင်ထားတာ၊ သူက အနံ့သိပ်မရဘူးလို့ပြောတယ်၊ ကျနော်တို့ ရောက်လာတဲ့အချိန် လိုအပ်တဲ့ ကျန်းမာရေးစစ်ဆေးတာတွေ ယူပြီး စစ်ဆေးခဲ့တာ ပါ၊ သူ့မိသားစုနဲ့ ထိတွေ့ခဲ့သူ ၇ ဦးလောက်ကို ခု Quarantine လုပ်ထားပါပြီး၊ သူနဲ့ပြန်လာတဲ့ ယာဉ်မောင်းကိုတော့ လိုက်ပြီးရှာဖွေနေပါတယ် "
ဘိုကလေးနဲ့ မအူပင်မှာ ကိုဗစ်-၁၉ ရောဂါပိုးတွေရှိခဲ့တဲ့ လူနာ ၄ ဦးကို သက်ဆိုင်ရာမြို့နယ် ဆေးရုံတွေမှာ ဆေးကုသပေးနေပြီး အားလုံး ကျန်းမာရေးကောင်းမွန်တယ်လို့ ဆေးရုံတာဝန်ရှိသူက ပြောပါတယ်။
သတင်း - မင်းထက်မုန်း (ပုသိမ်)
