ပခုက္ကူမြို့၌ တရားမဝင်ဖွင့်ထားသည့် အနှိပ်ခန်းတခုအား ရဲတပ်ဖွဲ့ ဝင်ရောက်ဖမ်းဆီး
DVB
·
September 6, 2020
မကွေးတိုင်း၊ ပခုက္ကူမြို့မှာ ကိုဗစ်-၁၉ ကာလ တရားမဝင်ဖွင့်လှစ်ထားတဲ့ အနှိပ်ခန်းအား စက်တင်ဘာလ ၅ ရက်နေ့ ညနေပိုင်းက ဖမ်းဆီးအရေးယူထားတယ်လို့ သိရပါတယ်။
ပခုက္ကူမြို့ ဥတ္တရဟိုတယ်မှာ တရားမဝင် အနှိပ်ခန်းဖွင့်လှစ်နေတယ်လို့ သတင်းရတာကြောင့် မြို့နယ်ရဲတပ်ဖွဲ့မှူး ရဲမှူးကျော်ဌေး ဦးဆောင်တဲ့အဖွဲ့က ဝင်ရောက်ရှာဖွေခဲ့ရာ မန်နေဂျာ အပါအဝင် အမျိုးသား ၄ ဦးနဲ့ အမျိုးသမီး ၃ ဦး ဖမ်းဆီးရမိတာလို့ မကွေးတိုင်းဒေသကြီး ရဲတပ်ဖွဲ့မှူး ရဲမှူးကြီးလှိုင်တင့်က DVB ကို ပြောပါတယ်။
လာရောက်အနှိပ်ခံတဲ့ အမျိုးသား ၃ ဦးကတော့ ထွက်ပြေးလွတ်မြောက်သွားခဲ့ပြီး တရားမဝင် အနှိပ်ခန်းပြုလုပ်ရာမှာ အသုံးပြုတဲ့ ဆက်စပ်ပစ္စည်းတွေကို သိမ်းဆည်းခဲ့တယ်လို့ ဆိုပါတယ်။
အဲဒီလို တရားမဝင် အနှိပ်ခန်းပြုလုပ်တဲ့ မန်နေဂျာအပါဝင် အမျိုးသား ၄ ဦးနဲ့ အမျိုးသမီး ၃ ဦးကို ဘေးအန္တရာယ်ဆိုင်ရာ စီမံခန့်ခွဲမှု ဥပဒေပုဒ်မ ၂၅ နဲ့ အမှုဖွင့်အရေးယူထားတယ်လို့ သိရပါတယ်။
မကွေးတိုင်းဒေသကြီး ရဲတပ်ဖွဲ့အနေနဲ့ ကိုဗစ်-၁၉ ကာလအတွင်း လူစုလူဝေးမဖြစ်ပွားအောင် KTV၊ အနှိပ်ခန်း၊ စင်တင်တွေကို စစ်ဆေးတာတွေ လုပ်ဆောင်နေပြီး စက်တင်ဘာ ၄ ရက်နေ့ မနက်ပိုင်းကလည်း မကွေးမြို့ ဟိုတယ်တခုက တရားမဝင်အနှိပ်ခန်းတခုကို ဖမ်းဆီးအရေးယူထားတယ်လို့ သိရပါတယ်။
သတင်း-မင်းထီး
