ရန်ကုန်တိုင်းက ၄၃ ဦး၊ မြင်းခြံက ၁၇ ဦးအပါအဝင် ကိုဗစ်-၁၉ လူနာသစ် ၆၆ ဦး တွေ့ရှိခဲ့ပြီး လူနာအမှတ် ၁၂၃၆ မနေ့ညနေက သေဆုံးခဲ့တယ်လို့ ကျန်းမာရေးနဲ့အားကစားဝန်ကြီးဌာနက ဒီနေ့မနက် ၈ နာရီခွဲက ထုတ်ပြန်ပါတယ်။ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၈၉၇ ခု၊ ဆေးသုတေသနဦးစီးဌာနက ၂၀၅ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) က ၃၅၇ ခု၊ ပြည်သူ့ဆေးရုံကြီး မြ၀တီမြို့က ၁၄ ခု၊ ပြည်သူ့ဆေးရုံကြီး တောင်ငူမြို့က ၁ ခု စုစုပေါင်း ၁,၄၇၄ ခုအား ဒုတိယသုတ်အဖြစ် စစ်ဆေးပြီးစီးခဲ့ပြီး ကိုဗစ်-၁၉ လူနာသစ် ၆၆ ဦး တွေ့ရှိခဲ့တာပါ။ သင်္ဃန်းကျွန်းစံပြဆေးရုံကြီးမှာ တက်ရောက်ကုသနေတဲ့ အသက် ၄၆ နှစ်အရွယ် ဓာတ်ခွဲအတည်ပြုလူနာ အမှတ် ၁၂၃၆ ဟာ ပြင်းထန်အဆုတ်ရောင်ရောဂါကြောင့် ရုတ်တရက်အသက်ရှူလမ်းကြောင်းပျက်စီးတာ၊ နာတာရှည်ကျောက်ကပ်ပျက်စီးတာနဲ့ ဆီးချိုရောဂါ အခံ ရှိပြီး မနေ့ ညနေ ၂:၅၅ နာရီအချိန်က သေဆုံးခဲ့ပါတယ်၊ ရန်ကုန်တိုင်းက ၄၃ ဦးကတော့ သင်္ဃန်းကျွန်း ၁၁ ဦး၊ ကျောက်တံတား ၅ ဦး၊ ကြည့်မြင်တိုင် နဲ့ အင်းစိန်က ၃ ဦးစီ၊ ဒဂုံမြို့သစ်အရှေ့ပိုင်း၊ မင်္ဂလာဒုံ၊ ဗဟန်းနဲ့ ကမာရွတ်တို့က ၂ ဦးစီ၊ ပုဇွန်တောင်နဲ့ မရမ်းကုန်းက ၄ ဦးစီ၊ ဒဂုံဆိပ်ကမ်း၊ သာကေတ၊ လှိုင်သာယာ၊ လှိုင်နဲ့ ဒေါပုံက ၁ ဦးစီတို့ ဖြစ်ပါတယ်။  မန္တလေးတိုင်း မြင်းခြံမြို့နယ်က ၁၇ ဦး၊ ရခိုင်ပြည်နယ်က သံတွဲ ၁ ဦး၊ တောင်ကုတ်က ၂ ဦး၊ ကရင်ပြည်နယ်က ကော့ကရိတ် ၁ ဦး၊ ဧရာဝတီတိုင်း ငပုတောနဲ့ ဖျာပုံက ၁ ဦးစီတို့ ဖြစ်ပါတယ်။ မနေ့ညက ဓာတ်ခွဲနမူနာ ၁,၆၉၁ခု အား စစ်ဆေးရာမှာလည်း ရန်ကုန်တိုင်းက ၂၇ ဦး အပါအဝင် ကိုဗစ်-၁၉ လူနာသစ် ၃၇ ဦး တွေ့ရှိတယ်လို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။ မြန်မာနိုင်ငံမှာ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၁,၃၁၉ ဦး၊ သေဆုံးသူ ၈ ဦး၊ နှစ် ကြိမ်ဆက်တိုက် ပိုးမတွေ့ရှိသူ ၃၇၁ ဦးအနက် ဆေးရုံမှ ဆင်းခွင့်ပြုခဲ့ပြီးသူ ၃၆၆ ဦးနဲ့ စောင့်ကြည့်လူနာအသစ် (၁၁၉) ဦးရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။ ဓာတ်ခွဲအတည်ပြုလူနာသစ်တွေရဲ့ သတင်းအချက်အလက်တွေကို ပြုစုနေပြီး ထပ်မံထုတ်ပြန်သွားမယ်လို့ ဆိုပါတယ်။ ကမ္ဘာတဝန်းမှာတော့ ဒီနေ့မနက်ပိုင်းအထိ ကိုဗစ်-၁၉ အတည်ပြုလူနာ ၂၇ သန်းကျော်၊ သေဆုံးသူ ၈၈၀၀၀၀ ကျော်နဲ့ ရောဂါသက်သာပျောက်ကင်းလာသူ ၁၉ သန်းကျော် ရှိပြီလို့ သိရပါတယ်။