ရခိုင်ပြည်နယ်အတွင်း ထုတ်ထားသည့် အမိန့်ညွှန်ကြားချက်များ မလိုက်နာပါက အရေးယူမည်
1K
ရခိုင်ပြည်နယ် မြို့နယ်အားလုံး Stay At Home အစီအစဉ် အကျုံးဝင်ကြောင်း ကျန်းမာရေးနဲ့အားကစားဝန်ကြီးဌာနက အမိန့်ထုတ်ထားတဲ့အပြင် ပြည်နယ်အတွင်း ခရီးမသွားကြဖို့နဲ့ ပြည်နယ်ပြင်ပသွားရင်လည်း ခွင့်ပြုချက်ယူရမှာဖြစ်ပြီး ထုတ်ပြန်ထားတဲ့ အမိန့်ညွှန်ကြားချက်တွေကိုမလိုက်နာရင် အရေးယူမယ်လို့ ကိုဗစ်-၁၉ ကာကွယ်ထိန်းချုပ် ကုသရေး အမျိုးသားအဆင့် ဗဟိုကော်မတီက ထုတ်ပြန်ပါတယ်။
ရခိုင်ပြည်နယ်မှာ လိုအပ်တဲ့ ကျန်းမာရေးစောင့်ရှောက်တာတွေ၊ စာနပ်ရိက္ခာ ထောက်ပံ့တာတွေ၊ ရောဂါကာကွယ်တားဆီးထိန်းချုပ်ရေးဆိုင်ရာကိစ္စရပ်တွေကို အစိုးရက ဖြည်းဆည်းဆောင်ရွက်ပေးမှာဖြစ်လို့ ရခိုင်ပြည်နယ်အတွင်း နေထိုင်သူတွေအနေနဲ့ ကိုယ့်နေရပ်မှာပဲ နေထိုင်ဖို့နဲ့ ပြည်နယ်တွင်း ခရီးသွားလာတာနဲ့ ပြည်နယ်ပြင်ပ တခြားဒေသတွေကို ခရီးသွားလာတာတွေ မလိုအပ်ဘဲ မပြုလုပ်ကြဖို့လည်း ဗဟိုကော်မတီက အသိပေးထားပါတယ်။
တကယ်လို့ ရခိုင်ပြည်နယ်နေ ပြည်သူတွေအနေနဲ့ တခြားတိုင်းဒေသကြီး ဒါမှမဟုတ် ပြည်နယ်တွေကို ကျန်းမာရေးကိစ္စနဲ့ တခြားအရေးပေါ်ကိစ္စရပ်တွေအတွက် ခရီးသွားဖို့ရှိရင်လည်း သက်ဆိုင်ရာအဖွဲ့အစည်းရဲ့ ခွင့်ပြုချက်ရပြီးမှ သွားရောက်ကြဖို့နဲ့တိုက်တွန်းထားပါတယ်။
ဒါ့အပြင် ကိုယ်ရောက်ရှိတဲ့နေရာမှာ ကျန်းမာရေးစစ်ဆေးတာကို ကြည်ဖြူစွာခံယူပြီး ကျန်းမာရေး ညွှန်ကြားချက်နဲ့အညီ သတ်မှတ်ထားတဲ့ Community Based Facility Quarantine ၂၁ ရက် နေထိုင်ကြဖို့နဲ့ ထုတ်ပြန်ထားတဲ့ ကိုဗစ်-၁၉ ရောဂါ ကာကွယ်ထိန်းချုပ်ရေးဆိုင်ရာ ကိစ္စရပ်တွေကို အမိန့်နဲ့ညွှန်ကြားချက်တွေနဲ့အညီ တိကျစွာလိုက်နာကြဖို့ ပန်ကြားထားပါတယ်။
ထုတ်ပြန်ထားတဲ့ အမိန့်ညွှန်ကြားချက်တွေကို လိုက်နာဖို့ပျက်ကွက်ရင် သဘာဝဘေးအန္တရာယ်ဆိုင်ရာ စီမံခန့်ခွဲမှုဆိုင်ရာဥပဒေနဲ့ အရေးယူခံရမယ်လို့ အသိပေးထားပါတယ်။
မြန်မာနိုင်ငံမှာ ဩဂုတ် ၂၇ ရက်မနက်အထိ ကိုဗစ်-၁၉ အတည်ပြုလူနာပေါင်း ၅၈၆ ဦးရှိနေပြီး ဒီအထဲမှာ ရခိုင်ပြည်နယ်ဟာ ပိုးတွေ့လူနာ ၂၀၀ နီးပါးလောက်နဲ့ ဒုတိယအများဆုံး ဖြစ်လာပါတယ်။
ဒါ့အပြင် ရခိုင်ပြည်နယ်မှာ ကိုဗစ်-၁၉ တည်ပြုလူနာများပြားလာတာကြောင့် ဒီကနေ့မနက်ကစပြီး ပြည်နယ်တစ်ခုလုံးမှာ ရောဂါကာကွယ် ထိန်းချုပ်နိုင်ဖို့အတွက် နေအိမ်မှာနေထိုင်ရေး (Stay At Home)အစီအစဉ် အကျုံးဝင်ကြောင်း အမိန့်ထုတ်ပြန် ထားပါတယ်။
