Homeမြန်မာသတင်း
ဘယ်ကကူးမှန်းမသိသည့် ရန်ကုန်ကပိုးတွေ့သင်္ဘောသားနှင့် ထိတွေ့သူ ၁၀ ဦးကျော်ကို ကွာရတင်းထားရန်စီစဉ်
ဘယ်ကကူးမှန်းမသိသည့် ရန်ကုန်ကပိုးတွေ့သင်္ဘောသားနှင့် ထိတွေ့သူ ၁၀ ဦးကျော်ကို ကွာရတင်းထားရန်စီစဉ်
ညီငယ်
·
August 26, 2020
ရန်ကုန်တိုင်း၊ တောင်ဥက္ကလာပ ၁၂ ရပ်ကွက် မာဃ ၆ လမ်းနေ ပိုးတွေ့သင်္ဘောသားရဲ့ မိသားစုအပါအဝင် ထိတွေ့သူ စုစုပေါင်း ၁၀ ယောက်ကျော်ကို ကွာရတင်းစင်တာပို့ဖို့ စီစဉ်နေပြီလို့ တောင်ဥက္ကလာပမြို့နယ် အုပ်ချုပ်ရေးမှူး ဦးငြိမ်းချမ်းအောင်က ဒီဗွီဘီကို ပြောပါတယ်။
"အလွှာ ၆ လွှာမှာ ၄ လွှာမှာအထိ လူနေတာပေါ့။ တစ်ဦးချင်းစာရင်းတော့ ကျန်းမာရေးဌာနကို ပေးလိုက်ပါပြီ။ အားလုံး ၁၀ ဦးကျော်ရှိပါတယ်။”လို့ သူကပြောပါတယ်။
ပိုးတွေ့လူနာဟာ ရပ်ကွက်ထဲမှာနေတာကြောင့် သူသွားခဲ့တဲ့ လက်ဖက်ရည်ဆိုင်၊ အလုပ်တို့ ရှိနိုင်ပြီး သူသွားခဲ့တဲ့နေရာတွေ များမယ့်သဘောတော့ ရှိနိုင်တယ်လို့ ဆိုပါတယ်။
လက်ရှိမှာတော့ တောင်ဥက္ကလာမှာသူနေထိုင်ခဲ့တဲ့ မာဃ၆လမ်းအိမ်နဲ့ လမ်းကို လော့ဒေါင်း လုပ်ထားပြီး သူဖွင့်ထားတဲ့ သံသုမာလမ်း မြင်သာစျေးနားက အရက်ဖြူဆိုင်ကိုလည်း ပိတ်ထားကာ ဆိုင်ဝန်ထမ်းတစ်ဦးကိုလည်း ကျန်းမာရေးဌာနက ခေါ်ဆောင်သွားကြောင်း ၅ ရပ်ကွက် အုပ်ချုပ်ရေးမှူးက ပြောပါတယ်။
ဒီကနေ့မွန်းလွဲပိုင်းမှာ ကိုဗစ်- ၁၉ လူနာအမှတ် ၅၀၆ အနေနဲ့ ကျန်းမာရေးနဲ့ အားကစားဝန်ကြီးဌာနရဲ့ ထုတ်ပြန်တဲ့စာရင်းထဲမှာ တောင်ဥက္ကလာက ပိုးတွေ့သင်္ဘောသားလည်း ပါလာတာတွေ့ ရပါတယ်။
အသက် ၃၀ ကျော် ပိုးတွေ့သင်္ဘောသားဟာ လွန်ခဲ့တဲ့ ၂ နှစ်လောက်က သင်္ဘောတက်ဖူးပြီး အခုရက်ပိုင်းသင်္ဘောတက်ဖို့ ဆေးစစ်ရာကနေ ကိုဗစ်-၁၉ ရောဂါတွေ့ရှိခဲ့တာ ဖြစ်ပြီး သူဘယ်က ကူးစက်ခံရတယ်ဆိုတာ မသိရသေးပါဘူး။
