Homeမြန်မာသတင်း
စစ်တွေတွင် ပြည်ပခရီးသွားရာဇဝင်မရှိသည့် ကိုဗစ်-၁၉ လူနာသစ် ၁၆ ဦး ထပ်တွေ့၊ စုစုပေါင်း ၄၄ ဦးရှိလာ
စစ်တွေတွင် ပြည်ပခရီးသွားရာဇဝင်မရှိသည့် ကိုဗစ်-၁၉ လူနာသစ် ၁၆ ဦး ထပ်တွေ့၊ စုစုပေါင်း ၄၄ ဦးရှိလာ
DVB
·
August 22, 2020
ရခိုင်ပြည်နယ် စစ်တွေမြို့မှာ ပြည်ပခရီးသွားရာဇဝင်မရှိတဲ့ ကိုဗစ်-၁၉ အတည်ပြုလူနာ ၁၆ ဦး ထပ်မံတွေ့ရှိတယ်လို့ ကျန်းမာရေးနဲ့ အားကစားဝန်ကြီးဌာနက ဒီနေ့မနက် ၈ နာရီ ထုတ်ပြန်ပါတယ်။
သြဂုတ် ၂၁ ရက်နေ့အတွက် ဒုတိယသုတ်အဖြစ် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၆၄၅ ခု စစ်ဆေးခဲ့ပြီး ကိုဗစ်-၁၉ လူနာသစ် ၁၆ ဦး တွေ့ရှိခဲ့တာပါ။
လူနာသစ်အားလုံးဟာ စစ်တွေမြို့မှာ အသွားအလာ ကန့်သတ်ထားသူတွေဖြစ်ပြီး ကိုဗစ်-၁၉ အတည်ပြုလူနာတွေနဲ့ ထိတွေ့မှုရှိခဲ့သူတွေ ဖြစ်တယ်လို့ ဆိုပါတယ်။ သူတို့ကို စစ်တွေမြို့ ပြည်သူ့ဆေးရုံကြီးမှာ ဆေးကုသမှု ခံယူစေမယ်လို့ ဆိုပါတယ်။
မနေ့ညက ပထမသုတ်အဖြစ် ဓာတ်ခွဲနမူနာ ၉၆၄ ခုအား စစ်ဆေးခဲ့ရာမှာလည်း စစ်တွေမြို့နေ ပြည်ပ ခရီးသွားရာဇဝင်မရှိတဲ့ လူနာသစ် ၁၀ ဦး တွေ့ရှိခဲ့တယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
သြဂုတ် ၁၆ ရက်ကနေ ဒီနေ့မနက်အထိ ရခိုင်ပြည်နယ်၊ စစ်တွေမြို့မှာ ကိုဗစ်-၁၉ အတည်ပြုလူနာ ၄၄ ဦးနဲ့ မြောက်ဦးမှာ ၁ ဦး တွေ့ရှိခဲ့ပါတယ်။ သူတို့အားလုံးဟာ ပြည်ပခရီးသွားရာဇဝင်မရှိဘူးလို့ သိရပါတယ်။
မြန်မာနိုင်ငံမှာ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၄၃၅ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ ၃၃၇ ဦးအနက် ဆေးရုံမှ ဆင်းခွင့်ပြုခဲ့ပြီးသူ ၃၃၁ ဦးနဲ့ စောင့်ကြည့်လူနာအသစ် ၄၅ ဦးရှိပါတယ်။
ကမ္ဘာတဝန်းမှာတော့ ဒီနေ့ညအထိ ကိုဗစ်-၁၉ အတည်ပြုလူနာ ၂၃ သန်းကျော်၊ သေဆုံးသူ ၈ သိန်း ကျော်နဲ့ ရောဂါပိုးကင်းစင်လာသူ ၁၅ ဒသမ ၇ သန်းကျော် ရှိပြီလို့ သိရပါတယ်။