မကွေးတိုင်း လွှတ်တော်တွင်ထားမည့် ဗိုလ်ချုပ်ရုပ်တု ထုဆစ်မှု ပြီးစီး
977
မကွေးတိုင်း လွှတ်တော်မှာထားရှိမယ့် ဗိုလ်ချုပ်အောင်ဆန်း ရုပ်တုကို ထုဆစ် ပြီးစီးသွားပြီလို့ မကွေးတိုင်းဒေသကြီးလွှတ်တော် ဥက္ကဋ္ဌ ဦးတာက ပြောပါတယ်။
"ဗိုလ်ချုပ်က တိုင်းပြုပြည်ပြု လွှတ်တော်ကို ကောင်းကောင်းတက်နေတဲ့ပုံ၊ ပုံမှာ တောင်ရှည်ပုဆိုးနဲ့ တိုက်ပုံနဲ့၊ တောင်ရှည်ပုဆိုးကို လက်တဖက်က မထားတဲ့ပုံမျိုးပေါ့။ တောင်ရှည်ပုဆိုးက ထူးထူးခြားခြားပေါ့။ မောက်ကျက်သရေ ခေါင်းပေါင်းပါတယ်။ ဗိုလ်ချုပ်အောင်ဆန်းအနေနဲ့ တက်တာမဟုတ်ဘူး။ ဦးအောင်ဆန်းအနေနဲ့ တက်တဲ့ပုံမျိုး။ ပထမဆုံး လွှတ်တော်မှာ တိုင်းပြုပြည်ပြုလွှတ်တော်မှာ ဗိုလ်ချုပ်ဦးဆောင်ကျင်းပတဲ့ လွှတ်တော်မှာ ပထမဆုံး စတတ်တဲ့ပုံ။"
မကွေးတိုင်းဒေသကြီး လွှတ်တော်မှာ ထားရှိမယ့် ဗိုလ်ချုပ်အောင်ဆန်းရုပ်တုကို အများကဲ့သို့ ကြေးသွန်းရုပ်တုပြုလုပ်ကာ မထားချင်တဲ့အတွက် တတုံးတည်း စကျင်ကျောက်ကို ရှာဖွေထုဆစ်ရတာ ဖြစ်ပြီး အချိန်ကာလ တစ်နှစ်ခွဲ ဝန်းကျင်ကြာခဲ့တယ်လို့ ဆိုပါတယ်။
အမြင့် ၁၆ ပေရှိတဲ့ ဗိုလ်ချုပ်အောင်ဆန်းရုပ်တုကို အလေးချိန် တန် ၃၀ ရှိ တစ်တုံးတည်း စကျင်ကျောက်ကို မန္တလေးတိုင်းဒေသကြီး မတ္တရာမြို့နယ်ရှိ စကျင်ကျောက်တွေ ထုဆစ်တဲ့ စကျင်ရွာမှာ ရုပ်ပုံထုဆစ်ပုံဖော်ခြင်းလုပ်ငန်း ပြီးစီးပြီဖြစ်လို့ သယ်ယူနိုင်ဖို့ စီစဉ်ဆောင်ရွက်နေတယ်လို့ ဆိုပါတယ်။
အဆိုပါ လွှတ်တော်မှာ ထားရှိမယ့် ဗိုလ်ချုပ်အောင်ဆန်း စကျင်ကျောက်ရုပ်တုပုံကို နိုင်ငံတော် အစိုးရငွေ သုံးစွဲပြုလုပ်ခြင်းမဟုတ်ဘဲ စေတနာရှင်အလှူငွေတွေနဲ့ ဆောင်ရွက်ထားရှိကြောင်း၊ ရုပ်တုကုန်ကျစရိတ်ကို မတွက်ချက်ရသေးရတာကြောင့် မသိရသေးဘူးလို့လည်း လွှတ်တော်ဥက္ကဋ္ဌက ပြောပါတယ်။
ကိုလင်း(ချောက်)
