မော်လမြိုင်တရားရုံးဝင်းအတွင်း ရှေ့နေအမျိုးသမီး ၁ ဦး ဝက်အူလှည့်ဖြင့် အထိုးခံရ

မွန်ပြည်နယ်၊ မော်လမြိုင်မြို့နယ် တရားရုံးဝင်းအတွင်း သြဂုတ် ၁၃ ရက် ညနေပိုင်းမှာ တရားလွှတ်တော်ရှေ့နေ အမျိုးသမီးတစ်ဦး ဝက်အူလှည့်နဲ့ အထိုးခံခဲ့ရပါတယ်။ ဝက်အူလှည့်နဲ့ထိုးခဲ့တဲ့အမျိုးသားဟာ  ရှေ့နေအမျိုးသမီးရဲ့အစ်မတဝမ်းကွဲ တော်စပ်သူရဲ့ ခင်ပွန်းဖြစ်ပါတယ်။ သူတို့ လင်မယားကွဲအောင် ရှေ့နေအမျိုးသမီးက ဆောင်ရွက်ခဲ့တယ်ဆိုပြီး မကျေနပ်လို့ လက်သီးနဲ့ထိုးကာ ဝက်အူလှည့်နဲ့ ထိုးသွင်းခဲ့တာ ဖြစ်တယ်။ တရားခံဖြစ်သူကို ဖမ်းဆီးရမိထားပြီလို့   မော်လမြိုင်မြို့နယ် ရဲတပ်ဖွဲ့မှူး ရဲမှူး မျိုးညီညီက ဒီဗွီဘီကို ပြောပါတယ်။ အခုဖြစ်စဉ်ကြောင့် ရှေ့နေအမျိုးသမီးဟာ ယာဘက်မေးစေ့ ပွန်းပဲ့ဒဏ်ရာ၊ ဝဲယာဘက် လက်မောင်းပွန်းပဲ့ဒဏ်ရာနဲ့ ဝဲဘက်လက်ကောက်ဝတ် ပွန်းပဲ့ဒဏ်ရာအပြင် ယာဘက်ဝမ်းဗိုက် ထိုးသွင်းဒဏ်ရာ အသီးသီး ရရှိခဲ့ပြီး မစိုးရိမ်ရဘူးလို့ ဆိုပါတယ်။ လက်ရှိမှာတော့ ရှေ့နေအမျိုးသမီးကို ဝက်အူလှည့်နဲ့ ထိုးသွင်းခဲ့တဲ့ ကိုဝင်းမြင့်ကို မော်လမြိုင်မြို့မရဲစခန်းမှာ ရာဇသတ်ကြီး ဥပဒေပုဒ်မ ၃၀၇ နဲ့ အမှုဖွင့် အရေးယူထားပါတယ်။ သတင်း - ဇော်လွင်ထွဋ် 

//
More News
Up