တပ်မတော် တပ်စခန်းများရုပ်သိမ်းပေးရန် ဖာပွန်ဒေသခံ ၄၀၀၀ ကျော်ဆန္ဒပြတောင်းဆို
နော်နိုရင်း
·
July 28, 2020
ကရင်ပြည်နယ်၊ ဖာပွန်မြို့နယ်ရှိ တပ်မတော် တပ်စခန်းတွေပြန်ရုပ်သိမ်းပေးဖို့နဲ့ နော်မူနော် အသတ်ခံရတဲ့ကိစ္စနဲ့ပတ်သက်ပြီး ထိရောက်စွာအရေးယူဖို့ ဒီကနေ့ ဇူလိုင် ၂၈ ရက် မနက်ပိုင်းက ဖာပွန်ဒေသခံ ၄၀၀၀ ကျော် ဆန္ဒထုတ်ဖော်ခဲ့ တောင်းဆိုကြပါတယ်။
ဖာပွန်မြို့နယ် တောင်သုံးလုံးတပ်စခန်းကနေ ကဒိုင်တိအထိ ချီတက်ဆန္ဒထုတ်ဖော်ခဲ့ကြ သလို ညနေပိုင်းမှာလည်း ကမမောင်းအနီးဆန္ဒပြခဲ့ကြတယ်လို့ ဆန္ဒပြပွဲမှာ ပါဝင်သူတဦးဖြစ်တဲ့ စောဘီက ပြောပါတယ်။
“ကျနော်တို့က စစ်တပ်ရဲ့ ပြည်သူလူထုကို မတရားသတ်ဖြတ်မှုတို့၊ ပြီးတော့ ရွာတွေကို လက်နက်ကြီးကျည်ကျတာတို့၊ ပြီးတော့ စစ်ရေးလှုပ်ရှားမှုအမျိုးမျိုးပေါ့နော် ကျနော်တို့ လက်မခံနိုင်တဲ့အတွက်ကြောင့် ကျနော်တို့ ဆန္ဒထုတ်ဖော်တာ။ အဓိက တောင်းဆိုချက်က ရှင်းရှင်းပြောရရင်တော့ စစ်တပ်စခန်းတွေကို ကျနော်တို့ နေထိုင်တဲ့ကျေးရွာဒေသတွေကနေ မလိုချင်ဘူး။မရှိစေချင်ဘူး။ ဘာဖြစ်လဲဆိုတော့ ကျနော်တို့ ကျေးရွာပြည်သူတွေ ဘဝလုံခြုံမှုမရှိဘူး။ သူတို့ရှိတဲ့အတွက်ကြောင့်၊ အဲဒါကြောင့် ကျနော်တို့ ဒီပေါ်မူတည်ပြီး ကျနော်တို့ဆန္ဒပြကြတာ။”
အဆိုပါဆန္ဒပြပွဲမှာ ဖာပွန်ခရိုင်နဲ့ ကမမောင်းဒေသက ကျေးရွာအုပ်စု ၆ စု ကျေးရွာပေါင်း ၃၀ လောက်က ဒေသခံပြည်သူ ၄၆၅၀ ဦး ပူးပေါင်းပါဝင် ဆန္ဒထုတ်ဖော်ခဲ့ကြတာဖြစ်ပါတယ်။
လူထုကို သတ်ဖြတ်မှုကို မကျေနပ်ကြောင်း၊ ကျေးရွာအပေါ်လွှမ်းမိုးချုပ်ကိုင်ဖိနှိပ်ခြင်းကို မကျေနပ်ကြောင်းစတဲ့ ကြွေးကြော်သံတွေနဲ့ ဆန္ဒထုတ်ဖော်ခဲ့လို ပိုစတာတွေကိုပြီး ဒေသခံတွေက ဆန္ဒပြခဲ့ကြပါတယ်။
ကရင်လူမျိုးတွေ နေထိုင်ရာ ဒေသနယ်မြေမှာ တပ်စွဲထာတဲ့ အစိုးရတပ်မတော်စစ်ကြောင်း အထိုင်စခန်း ဖြစ်တဲ့ တောင်သုံးလုံးစခန်း၊ ကူးဆိပ်စခန်းတွေ ပြန်လည် ဆုတ်ခွာပေးရေးနဲ့ ဒေသခံ တွေ အပေါ် သတ်ဖြတ်မှုတွေအထွက် ထိရောက်စွာ အရေးယူ ဆောင်ရွက်ပေးရေး စတာတွေ တောင်းဆိုကာ စီတန်းလှည့်လည်ခဲ့ကြပါတယ်
ကရင်ပြည်နယ်၊ ဖာပွန်မြို့နယ်၊ ပိုလိုထကျေးရွာမှာ ဇူလိုင် ၁၆ ရက်နေ့က အမျိုးသမီးတစ်ဦးအား ပစ္စည်းလုယက်၊ သတ်ဖြတ်မှုကျူးလွန်ခဲ့တဲ့ စစ်သည်နှစ်ဦးကို ဖမ်းဆီးထားပြီး ထိရောက်ပြင်းထန်စွာအရေးယူ သွားမယ်လို့ တပ်မတော်က သတင်းထုတ်ပြန် ထားပါတယ်။
Photo - Saw Tar Tu / MPA