အမေရိကန်ကပြန်လာသည့် အမျိုးသား ၁ ဦးတွင် ကိုဗစ်-၁၉ ရောဂါပိုး တွေ့ရှိ
DVB
·
July 26, 2020
အမေရိကန်နိုင်ငံက ပြန်လာတဲ့ ဖျာပုံမြို့နယ်နေ အသက် ၅၀ အရွယ် အမျိုးသားတဦးမှာ ကိုဗစ်-၁၉ ရောဂါပိုး တွေ့ရှိခဲ့တယ်လို့ ကျန်းမာရေးနှင့်အားကစားဝန်ကြီးဌာနက ဒီနေ့ည ၈ နာရီ ထုတ်ပြန်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၂၈၂ ခု၊ ဆေးသုတေသနဦးစီးဌာနက ဓာတ်ခွဲနမူနာ ၂၄၀ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) က ဓာတ်ခွဲနမူနာ ၁၆၀ ခုနဲ့ ရန်ကုန်မြို့၊ အမှတ် (၁) တပ်မတော်ဆေးရုံကြီး ခုတင် (၁၀၀၀) က ဓာတ်ခွဲနမူနာ ၁၈၆ ခု၊ စုစုပေါင်း ၈၆၈ ခု အား စစ်ဆေးပြီးစီးခဲ့တာပါ။
အတည်ပြုလူနာသစ် အမှတ် ၃၅၀ ဟာ အမေရိကန်က ပြန်လာပြီးနောက် မင်္ဂလာဒုံမြို့နယ်မှာ အသွားအလာ ကန့်သတ်ထားတာဖြစ်ပြီး ကိုဗစ်-၁၉ အတည်ပြုလူနာတွေနဲ့ ထိတွေ့မှုမရှိဘူးလို့ ဆိုပါတယ်။ သူ့ကို ဝေဘာဂီအထူးကုဆေးရုံကြီးမှာ ကုသမှုခံယူစေမယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
မြန်မာနိုင်ငံမှာ ဒီနေ့ည ၈ နာရီအထိ အတည်ပြုလူနာ ၃၅၀ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ ၂၉၀ ဦး၊ အဲဒီထဲက ဆေးရုံမှ ဆင်းခွင့်ပြုခဲ့ပြီးသူ ၂၇၂ ဦးနဲ့ စောင့်ကြည့်လူနာအသစ် ၁၂ ဦးရှိပါတယ်။
ကမ္ဘာတဝန်းမှာတော့ ဒီနေ့ညအထိ ကိုဗစ်-၁၉ အတည်ပြုလူနာ ၁၆ သန်းကျော်၊ သေဆုံးသူ ၆၄၉၀၀၀ ကျော်နဲ့ ရောဂါပိုး ကင်းစင်လာသူ ၉ ဒသမ ၉၅ သန်းကျော် ရှိတယ်လို့ သိရပါတယ်။