အင်္ဂလန်နှင့်အိန္ဒိယက ပြန်လာသူ ၄ ဦးတွင် ကိုဗစ်-၁၉ ရောဂါပိုးတွေ့ရှိ
DVB
·
July 12, 2020
ဇူလိုင် ၁၁ ရက်နေ့အတွက် ဓာတ်ခွဲနမူနာ ၁,၈၉၅ အား နှစ်သုတ်ခွဲ စစ်ဆေးရာမှာ ကိုဗစ်-၁၉ အတည်ပြုလူနာ ၄ ဦး တွေ့ရှိခဲ့တယ်လို့ ကျန်းမာရေးနှင့်အားကစားဝန်ကြီးဌာနက ထုတ်ပြန်ထားပါတယ်။
ဒီနေ့မနက် ဒုတိယသုတ်အဖြစ် ဓာတ်ခွဲနမူနာ ၈၆၇ ခုအား စစ်ဆေးရာမှာ ကိုဗစ်-၁၉ အတည်ပြုလူနာသစ် မတွေ့ရဘူးလို့ ဆိုပါတယ်။
မနေ့ညက ဓာတ်ခွဲနမူနာ ၁,၀၂၈ ခု စစ်ဆေးရာမှာတော့ အင်္ဂလန်ပြန်လာသူ လှိုင်ယာယာမြို့နယ်နေ အမျိုးသား ၁ ဦးနဲ့ အိန္ဒိယက ပြန်လာတဲ့ လှိုင်မြို့နယ်နေ အမျိုးသား ၃ ဦးတို့မှာ ကိုဗစ်-၁၉ ရောဂါပိုး တွေ့ရှိခဲ့ပါတယ်။
လှိုင်သာယာက လူနာအမှတ် ၃၂၇ နဲ့ လှိုင်မြို့နယ်က လူနာအမှတ် ၃၂၈၊ ၃၂၉ နဲ့ ၃၃၀ တို့ဟာ သက်ဆိုင်ရာမြို့နယ်တွေမှာ အသွားအလာကန့်သတ်ထားတာဖြစ်ပြီး ကိုဗစ်-၁၉ အတည်ပြုလူနာတွေနဲ့ ထိတွေ့မှုမရှိဘူးလို့ ဆိုပါတယ်။
လူနာသစ် ၄ ဦးကို တောင်ဥက္ကလာပ အထူးကုဆေးရုံကြီးနဲ့ တပ်မတော် အသည်းရောဂါ အထူးကုဆေးရုံကြီးတို့မှာ ဆေးကုသမှု ခံယူစေမလို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
မြန်မာနိုင်ငံမှာ ဒီနေ့မနက်ထိ ကိုဗစ်-၁၉ အတည်ပြုလူနာအယောက် ၃၃၀၊ သေဆုံးသူ ၆ ဦး၊ ရောဂါပိုးကင်းစင်လာသူ စုစုပေါင်း အယောက် ၂၆၀၊ ဆေးရုံမှ ဆင်းခွင့်ပြုခဲ့သူ ၂၄၇ ဦး၊ စောင့်ကြည့်လူနာအသစ် ၁၇ ဦး ရှိပါတယ်။
ကမ္ဘာတဝန်းမှာတော့ ဒီနေ့မနက်ပိုင်းအထိ ကိုဗစ်-၁၉ အတည်ပြုလူနာ ၁၂ ဒသမ ၈ သန်းကျော်၊ သေဆုံးသူ ၅၆၀၀၀၀ ကျော်နဲ့ ရောဂါသက်သာပျောက်ကင်းသူ ၇ ဒသမ ၄ သန်းကျော် ရှိတယ်လို့ သိရပါတယ်။
