ဓာတ်ခွဲနမူနာ ၈၉၆ ခုကို စစ်ဆေးချက်အရ ကိုဗစ်-၁၉ ရောဂါ လူနာသစ်မတွေ့
DVB
·
June 21, 2020
ဇွန် ၂၀ ရက်နေ့အတွက် ဒုတိယသုတ်အဖြစ် ဓာတ်ခွဲနမူနာ ၈၉၆ ခုအား စစ်ဆေးချက်အရ ကိုဗစ်-၁၉ ရောဂါ လူနာသစ်မတွေ့ရှိဘူးလို့ ကျန်းမာရေးနှင့်အားကစားဝန်ကြီးဌာနက ဒီမနက် ထုတ်ပြန်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၈၅၁ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန(မော်လမြိုင်) က ဓာတ်ခွဲနမူနာ ၄၅ ခု၊ စုစုပေါင်း ဓာတ်ခွဲနမူနာ ၈၉၆ ခုအား စစ်ဆေးခဲ့တာပါ။
မနေ့ညက ပထမသုတ်အဖြစ် ဓာတ်ခွဲနမူနာ ၁,၃၄၆ ခုကို စစ်ဆေးပြီးစီးခဲ့ရာမှာတော့ ထိုင်းနိုင်ငံက ပြန်လာတဲ့ လူနာသစ် ၁ ဦး တွေ့ရှိခဲ့ပါတယ်။
လူနာသစ်အမှတ် ၂၈၇ ဟာ မွန်ပြည်နယ်၊ ပေါင်မြို့နယ်က အသက် ၃၉ နှစ်အရွယ် အမျိုးသမီးတဦးဖြစ်ပြီး မော်လမြိုင်မြို့မှာ အသွားအလာကန့်သတ် Quarantine ထားရှိခံနေရသူ ဖြစ်ပြီး မော်လမြိုင် ပြည်သူ့ဆေးရုံမှာ ကုသထားတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
မြန်မာနိုင်ငံမှာ ဇွန်လ ၂၁ ရက် မနက် ၈ နာရီအထိ ကိုဗစ်-၁၉ အတည်ပြုလူနာပေါင်း ၂၈၇ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ ၁၉၆ ဦးရှိပြီး ဒီအထဲက ၁၇၇ ဦးကို ဆေးရုံမှဆင်းခွင့်ပြုခဲ့ပြီး ဖြစ်ပါတယ်။
ကမ္ဘာတဝန်းမှာတော့ ဒီနေ့မနက်ပိုင်းအထိ ကိုဗစ်-၁၉ အတည်ပြုလူနာ ၈ ဒသမ ၉ သန်းကျော်၊ သေဆုံးသူ ၄ သိန်း ၆ သောင်းကျော်နဲ့ ရောဂါသက်သာ ပျောက်ကင်းသူ ၄ ဒသမ ၇ သန်းကျော်ရှိတယ်လို့ သိရပါတယ်။