မိုးကုတ်တွင် ရဲ ၂ ဦးနှင့်ဒေသခံ ၁ ဦးကို TNLA ဖမ်းဆီးခေါ်ဆောင်ဟု တပ်မတော်ထုတ်ပြန်
DVB
·
June 14, 2020
မန္တလေးတိုင်း မိုးကုတ်မြို့နယ်အတွင်း မိုးကုတ်မြို့မရဲစခန်းမှ ရဲ ၂ ဦးနဲ့ ဒေသခံ ၁ ဦးတို့ကို TNLA အဖွဲ့က ဇွန် ၁၃ ရက် မွန်းလွဲ ၂ နာရီခွဲခန့်လောက် ဖမ်းဆီးခေါ်ဆောင်သွားတယ်လို့ သိရပါတယ်။
မိုးကုတ်မြို့မရဲစခန်းမှ ရဲတပ်ကြပ်ကြီး အောင်ကျော်ဦးနဲ့ ရဲတပ်သား ခိုင်ခန့်အောင်တို့ ၂ ဦးဟာ မိုးကုတ်မြို့နယ် သဒွတ်ရွာနေ ယာဉ်မောင်း ဦးအောင်ကျော်မိုး မောင်းနှင်တဲ့ HIJET အမျိုးအစား မော်တော်ယာဉ်နဲ့ လယ်ကြီးရဲကင်းစခန်းကို တာဝန်လဲလှယ်ထမ်းဆောင်ဖို့ အရပ်ဝတ်နဲ့ ထွက်ခွာလာစဉ် ညောင်ကုန်း(အောက်)ရွာအရောက်မှာ TNLA အဖွဲ့အင်အား ၅၀ ဦးလောက်က သူတို့ ၃ ဦးကို ဟိုးဝိတ်ကျေးရွာဘက် ဖမ်းဆီးခေါ်ဆောင်သွားတယ်လို့ တပ်မတော်က သတင်း ထုတ်ပြန်ပါတယ်။
လတ်တလောမှာတော့ အဲဒီပတ်ဝန်းကျင်တဝိုက်ကို တပ်မတော်စစ်ကြောင်းတွေက စုံစမ်း စစ်ဆေးတာနဲ့ နယ်မြေလုံခြုံရေးလုပ်တာတွေ ဆောင်ရွက်နေတယ်လို့ ဆိုပါတယ်။
TNLA အဖွဲ့ပြောခွင့်ရသူ ဗိုလ်မှူးမိုင်းအိုက်ကျော်ကလည်း မနေ့က မိုးကုတ်-ကျောက်မဲသွားကားလမ်း ညောင်ကုန်းနားမှာ ရှောင်တခင်စိစစ်နေတုန်း ကားပေါ်ပါလာသူ ရဲတွေကို ဖမ်းဆီးခဲ့တယ်လို့ ပြောပါတယ်။
“တို့ဆီမှာ ရဲယူနီဖောင်းတွေ့တယ်။ သူတို့ကလည်း ရဲလို့ ပြောတယ်။ ရဲတပ်ကြပ်ကြီးတယောက်နဲ့ တပ်သား ၂ ယောက်ပါ။ အရပ်သား မဟုတ်ပါဘူး။ ဘာဖြစ်လို့ဖမ်းလဲ ဆိုတော့ သူတို့လည်း လက်နက်ကိုင်ဖြစ်နေလို့ပါ။ အရင်ကလည်း ရဲဆိုရင်လည်း ဖမ်းဖူးပါတယ်။ အခုကတော့ စစ်ဆေးနေပါတယ်” လို့ ပြောပါတယ်။