ရသေ့တောင်၌ ၁ လကျော်ကြာ ဖမ်းဆီးထားသူ ၁ ဦးကို နယ်ခြားစောင့်တပ်ဖွဲ့ ပြန်လွှတ်
DVB
·
June 9, 2020
၁ လကျော်ကြာ ဖမ်းဆီးထားတဲ့ ရခိုင်ပြည်နယ် ရသေ့တောင်မြို့နယ် ဒုံးပိုက်ကျေးရွာနေ ကျေးရွာသား ၁ ဦးကို ဘူးသီးတောင်မြို့နယ်အခြေစိုက် အမှတ် ၃ နယ်ခြားစောင့်တပ်ဖွဲ့ခွဲက ပြန်လွှတ်ပေးလိုက်တယ်လို့ မိသားစုဝင်တွေ ပြောပါတယ်။
“ဘူးသီတောင် နခခ-၃ က ပြီးခဲ့တဲ့ ဇွန် ၆ ရက်နေ့ စနေနေ့မှာခေါ်ပြီး ဖမ်းဆီးထားသူ ကိုမြင့်စိုးကို လွှတ်ပေးလိုက်တယ်” လို့ ဖမ်းဆီးခံရသူရဲ့အဒေါ် ဒေါ်ဦးမေက DVB ကို ပြောပါတယ်။
ဒုံးပိုက်ကျေးရွာရှိ အရက်ဆိုင်တခုအတွင်း မေ ၂ ရက်နေ့ ညနေ ၄ နာရီကျော်လောက်က ပစ်ခတ်မှုဖြစ်ပြီးနောက် ကျေးရွာနေ ဦးမြင့်စိုးကို မသင်္ကာမှုနဲ့ ဖမ်းဆီးသွားတာပါ။
ဒီနောက် ဘူးသီးတောင်မြို့နယ်တရားရုံးမှာ မေ ၈ ရက်နေ့မှ ဇွန်လ ၇ ရက်နေ့အထိ အကြမ်းဖက် ဥပဒေပုဒ်မ ၅၀(က) နဲ့ အမှုဖွင့်လှစ်ကာ ရမန်ကြီး ၂ ပတ် ယူထားတာလို့ ဘူးသီးတောင်တရားရုံးမှ တာဝန်ရှိတဦးက ပြောပါတယ်။
“နခခ-၃ က လွှတ်ပေးလိုက်တာ။ ဒါပေမဲ့ တရားရုံးကို လွှတ်ပေးလိုက်ကြောင်း အကြောင်းကြားစာ အခုထိ မပို့သေးဘူး။ ရမန်ယူထားတဲ့အရ ဇွန် ၇ ရက်နေ့မှာ တရားစွဲတင်ရမှာ ဖြစ်တယ်။ သက်သေအထောက်အထား မပြည့်စုံလို့ တရားမစွဲတင်နိုင်တဲ့အတွက် လွှတ်ပေးတာနေမှာပေါ့” လို့ ပြောပါတယ်။
ရခိုင်ပြည်နယ်၊ ရသေ့တောင်မြို့နယ် ဒုံးပိုက်ကျေးရွာရှိ အရက်ဆိုင်မှာ မေလ ၂ ရက်နေ့ ညနေ ၄ နာရီကျော်လောက်က အရက်သောက်နေကြတဲ့ နယ်ခြားစောင့် ၆ ဦးကို အမည်မသိတပ်ဖွဲ့ဝင်တွေက လာရောက်ပစ်ခတ်ခဲ့တာကြောင့် နယ်ခြားစောင့် ၂ ဦး ဒဏ်ရာရရှိခဲ့ပါတယ်။ ပစ်ခတ်မှုဖြစ်ပြီးနောက် ဦးမြင့်စိုးကို မသင်္ကာမှုနဲ့ ဖမ်းဆီးခေါ်ဆောင်သွားတပါ။
လင်းလက်