စင်ကာပူပြန် ပထမဆုံးအသုတ် ၁၄၀ကျော် ကိုဗစ်-၁၉ ရောဂါပိုးမတွေ့သဖြင့် နေရပ်ပြန်
ညီငယ်
·
May 29, 2020
ပြီးခဲ့တဲ့ မေလ ၇ ရက်နေ့က ကယ်ဆယ်ရေးလေယာဉ်နဲ့ စင်ကာပူနိုင်ငံကနေ ပထမအသုတ်လိုက်ပါလာတဲ့ မြန်မာနိုင်ငံသား ၁၄၄ ယောက်ကို ဓာတ်ခွဲနမူနာယူစစ်ဆေးရာမှာ ကိုဗစ်-၁၉ ရောဂါပိုးမတွေ့လို့ သူတို့နေရပ်တွေကို ဒီနေ့မနက်က စပြန်နေပြီဖြစ်ပါတယ်။
စင်ကာပူပြန် ၁၄၄ ယောက်ထဲမှာ ကိုယ်ဝန်ဆောင်သည် ၄၄ ယောက်အပါအဝင် ကျောင်းသူ/ကျောင်းသားတွေ၊ အလုပ်သမားတွေ ပါဝင်ပြီး သူတို့ကို ပုလဲမြို့သစ်က မြရွှေပင်သဒ္ဓမ္မသုခရိပ်သာမှာ ၂၁ ရက် Quarantine ထားပြီးနောက် မေလ ၁၇ ရက်နေ့ကတစ်ကြိမ်၊ မေလ ၁၅ ရက်နေ့ကတစ်ကြိမ် ဓာတ်ခွဲနမူနာယူစစ်ဆေးရာမှာ နှစ်ကြိမ်လုံး Negative ပြခဲ့တာပါ။
စင်ကာပူပြန် ၁၄၄ ယောက်ဟာ သူတို့နေထိုင်ရာ အနယ်နယ်အရပ်ရပ်ကို ပြန်ရမှာဖြစ်ပြီး မေလ ၂၈ရက်နေ့မှာ Quarantine ၂၁ရက်ပြည့်ပြီးနောက် ဒီနေ့မနက်ပိုင်းကစပြီး သူတို့နေရပ်တွေကို အဝေးပြေးကားဂိတ်တွေ၊ လေဆိပ်တွေကတဆင့် ပြန်ကြမှာဖြစ်ပါတယ်။
သူတို့နေရပ်ပြန်ရာမှာ အခက်အခဲမရှိစေဖို့ Quarantine ၂၁ ရက် ပြည့်မြောက်ကြောင်း လက်မှတ်ကို လည်းထုတ်ပေးထားကြောင်း သိရပါတယ်။
