Vitor Belfort နှင့် Mike Tyson  အတူပူးတွဲလေ့ကျင့် (ရုပ်သံ) 

ကိုယ်ခံပညာသိုင်းပေါင်းကစားသမား  Belfort နဲ့  ဟဲဗီးဝိတ်လက်ဝှေ့ ချန်ပီယံဟောင်း Mike Tyson တို့ဟာ  ပြီးခဲ့တဲ့ ရက်ပိုင်းက အားကစားရုံထဲက လေ့ကျင့်ရေးခန်မတခုအတွင်း အတူတကွ လေ့ကျင့်ခဲ့ကြပါတယ်။  Mike Tyson ဟာ အသက် ၅၃ နှစ်အရွယ်ရောက်နေပြီဖြစ်ပေမယ့် ဒီဘက်နှစ်ပိုင်းအတွင်း စနစ်တကျနေထိုင်ကာ လေ့ကျင့်မှုတွေကို ပြန်လည်ပြုလုပ်နေလို့ ခန္ဓာကိုယ်ကြံ့ခိုင်တောင့်တင်းမှုက အရွယ်နဲ့မလိုက်အောင် သန်စွမ်းလျက်ရှိပါတယ်။ Belfort ရဲ့ အာရှမြေပွဲဦးထွက်စွန့်စားခန်းက မကြာခင်ထွက်ပေါ်လာမှာဖြစ်သလို သံမဏိမိုက်လို့ တင်စားခံထားရတဲ့ Mike Tyson ကလည်း လက်ဝှေ့ကြိုးဝိုင်းအတွင်း ပြန်လာဖွယ်ရှိနေတယ်ဆိုတဲ့ ကောလာဟလသတင်းတွေ ထွက်ပေါ်နေပါတယ်။ ONE Championship နဲ့ စာချုပ်ချုပ်ဆိုထားတဲ့ ဘရာဇီးလ်အားကစားသမား Vitor “The Phenom” Belfort ဟာ မေလ ၂၃ ရက်က ဖလော်ရီဒါပြည်နယ်၊ ဂျက်ဆန်ဗီးလ်မြို့မှာပြုလုပ်တဲ့ All Elite Wrestling က ဦးစီးကျင်းပတဲ့ Double or Nothing ပြိုင်ပွဲကို တက်ရောက်ကြည့်ရှုခဲ့ပါတယ်။ အသက် ၄၃ နှစ်အရွယ် Belfort ဟာ အ မေရိကန်နိုင်ငံသားအဖြစ်လည်း ခံယူထားပြီး ကိုယ်ခံပညာသိုင်းပေါင်းစုံပြိုင်ပွဲတွေကို ဆယ်စုနှစ် ၂ ခုကျော် ယှဉ်ပြိုင်ခဲ့သူပါ။  အားကစား အဖွဲ့အစည်းပေါင်းစုံရဲ့မစ်ဒယ်ဝိတ်တန်း၊ လိုက်ဟဲဗီးဝိတ်တန်း၊ ဟဲဗီးဝိတ်တန်းစတဲ့ ဝိတ်တန်းစုံယှဉ်ပြိုင်ထိုးသတ်ခဲ့တဲ့ ၎င်းဟာ UFC၊ Cage Rage အဖွဲ့အစည်းတွေရဲ့လိုက်ဟဲဗီးဝိတ်တန်းခါးပတ်ကို ပိုင်ဆိုင်ဖူးသူတစ်ယောက်ဖြစ်ပါတယ်။ ဒါ့အပြင် Belfort ဟာ UFC သမိုင်းတစ်လျှောက် အလဲထိုးနိုင်ပွဲအရဆုံး အားကစားသမားစာရင်းထဲ ထိပ်ဆုံးနားကပါဝင်သူဖြစ်ပြီး ၂၀၁၈ ခုနှစ်၊ မေလအတွင်း အားကစားသမားဘဝကို စွန့်လွှတ်ခဲ့ပါတယ်။ ဒါပေမဲ့ သူဟာ စင်ကာပူအခြေစိုက် ONE Championship ရဲ့ လုပ်ကိုင်ဆောင်ရွက်ပုံတွေကို နှစ်သက်သဘောကျတာကြောင့် ၂၀၁၉ ခုနှစ်အတွင်းက စာချုပ်ချုပ်ဆိုခဲ့ပါတယ်။ Belfort ဟာ လက်ရှိအချိန်မှာ သူအခြေစိုက်နေထိုင်ရာ အမေရိကန်မှာရှိနေပြီး AEW နပမ်းအဖွဲ့အစည်းက ကျင်းပတဲ့ Double or Nothing ပြိုင်ပွဲကို တက်ရောက်ကြည့်ရှုခဲ့ပါတယ်။ ကိုရိုနာဗိုင်းရပ်စ် (COVID-19) ကြောင့် တံခါးပိတ်ကျင်းပခဲ့တဲ့ အဆိုပါပြိုင်ပွဲကို Belfort နည်းတူ ဟဲဗီးဝိတ်ချန်ပီယံ ဟောင်းတယောက်ဖြစ်တဲ့ အမေရိကန်လက်ဝှေ့ကျော် Mike Tyson လည်း ကြည့်ရှုခဲ့ပါတယ်။ သူတို့နှစ်ယောက်ဟာ တိုက်ခိုက်ရေးအားကစားလောကအတွင်း ချန်ပီယံဆုတွေကို အသက်ငယ်ငယ်ရွယ်ရွယ်နဲ့ ရယူထားနိုင်သူတွေဖြစ် သလို သက်ဆိုင်ရာအားကစားနည်းတွေရဲ့ ဂန္ထဝင်အားကစားသမားတွေအဖြစ် သတ်မှတ်ခံထားရသူတွေပါ။ Mike Tyson ဟာ အသက် ၂၀ စွန်းစွန်းအရွယ်နဲ့ ဟဲဗီးဝိတ်ခါးပတ်ကိုရယူနိုင်ခဲ့သလို Belfort ကလည်း ၂၇ နှစ်အရွယ်နဲ့ UFC လိုက်ဟဲဗီးဝိတ်ခါးပတ်ကို ရယူနိုင်ခဲ့ပါတယ်။  ၂၆ ပွဲနိုင်၊ ၁၄ ပွဲရှုံးမှတ်တမ်းပိုင်ရှင် Belfort နဲ့ ၅၀ ပွဲနိုင်၊ ၆ ပွဲရှုံးမှတ်တမ်းပိုင်ရှင် Mike Tyson တို့ဟာ ပြိုင်ပွဲအပြီးမှာ အားကစားရုံထဲက လေ့ကျင့်ရေးခန်မတခုအတွင်း အတူတကွ လေ့ကျင့်ခဲ့ကြတာပါ။  ဘယ်လိုပဲဖြစ်ပါစေ ပရိသတ်တွေကို ဆွဲငင်ဖမ်းစားနိုင်ခဲ့တဲ့ ဂန္ထဝင်ကစားသမားနှစ်ယောက် လေ့ကျင့်မှုအတူပြုလုပ်ခဲ့တဲ့ ဗွီဒီယိုဖိုင်က သူတို့ရဲ့ပွဲတွေကို ငတ်မွတ်နေသူတွေအတွက် စိတ်ဖြေသိမ့်စရာလို့ပဲ ဆိုရပါတော့မယ်။ 

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up