ဓာတ်ခွဲနမူနာ ၆၀၀ ကျော် စစ်ဆေးချက်အရ ရောဂါပိုးမတွေ့၊ ၂ ကြိမ်ဆက် ပိုးမတွေ့သူ ၁၀၈ ဦးရှိ
DVB
·
May 22, 2020
ဓာတ်ခွဲနမူနာ ၆၀၀ ကျော်ကို စစ်ဆေးချက်အရ ရောဂါပိုးမတွေ့ရဘဲ နှစ်ကြိမ်ဆက် ရောဂါပိုး မတွေ့ရသူ ၁၀၈ ဦးရှိပြီလို့ ကျန်းမာရေးဝန်ကြီးဌာနက ဒီနေ့မနက် ၇ နာရီ ထုတ်ပြန်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က မေ ၂၁ ရက်နေ့အတွက် ဒုတိယအသုတ်ဓာတ်ခွဲနမူနာ ၂၇၉ ခုကို ဒီနေ့မနက်အစောပိုင်း စစ်ဆေးပြီးစီးခဲ့ရာ COVID-19 ရောဂါ ဓာတ်ခွဲအတည်ပြု လူနာသစ် မတွေ့ရှိရဘူးလို့ ဆိုပါတယ်။
မြန်မာနိုင်ငံမှာ ဒီနေ့မနက်ပိုင်းအထိ COVID-19 ရောဂါဓာတ်ခွဲ အတည်ပြုလူနာ ၁၉၉ ဦး၊ သေဆုံးသူ ၆ ဦး ရှိပြီ ဖြစ်ပါတယ်။
ဓာတ်ခွဲအတည်ပြု လူနာဟောင်း ၁၀၈ ဦးမှာ (၂) ကြိမ် ဆက်တိုက် ရောဂါပိုးမတွေ့ရှိဘူးလို့ ဆိုပါတယ်။
မေ ၂၁ ရက် နေ့လယ်ပိုင်းအထိ စောင့်ကြည့်လူနာသစ် ၃၈ ဦးရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
မေ ၂၁ ရက်နေ့အတွက် COVID-19 ဓာတ်ခွဲစစ်ဆေးမှုတွေကို ဆေးသုတေသနဦးစီးဌာနက ဓာတ်ခွဲနမူနာ ၁၆၀ ခုနဲ့ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၄၆၇ ခု၊ စုစုပေါင်း ၆၂၇ ခုတို့ကို စစ်ဆေးခဲ့တာလည်း ဖြစ်ပါတယ်။
