မုံရွာမြို့ခံ သတင်းထောက် ၂၂ ယောက်ကို အခြေခံစားသောက်ကုန်များ အိမ်အရောက်ဝေငှပေး
Aung Ko Latt
·
May 8, 2020
မုံရွာမြို့ပေါ်ရှိ သတင်းထောက် ၂၂ ယောက်ကို စစ်ကိုင်းတိုင်းဒေသကြီး သတင်းသမားများကွန်ရက်ကနေ ဦးဆောင်ကာ မေလ ၈ ရက်က အခြေခံစားသောက်ကုန်တွေ အိမ်အရောက်သွားရောက်ကာ ပထမဆုံးအကြိမ် ဝေငှခဲ့ပါတယ်။
COVID-19 ကပ်ဘေးနဲ့ကြုံနေရတဲ့ လက်ရှိကာလမှာ တခြားသူတွေနည်းတူ သတင်းထောက်တွေနဲ့ သူတို့ရဲ့ မိသားစုတွေလည်း စားဝတ်နေရေးအခက်အခဲကြုံတွေ့ရတာတွေ ရှိနေတဲ့အတွက် အခုလို ဝေငှတာဖြစ်ပါတယ်။
အခြေခံစားသောက်ကုန်တွေဖြစ်တဲ့ ဆန် ၈ ပြည်၊ ဆီ ၁ ပိဿာ၊ ဆား၊ ကြက်သွန်၊ အသားတု၊ ငါးသေတ္တာတွေအပြင် ကိုဗစ်ကာကွယ်ရေးအထောက်အကူပြု ပစ္စည်းတချို့နဲ့ ဖုန်းဘေလ်အတွက် ငွေကျပ် ၅၀၀၀ ဆီကို စစ်ကိုင်းတိုင်းဒေသကြီး သတင်းသမားများကွန်ရက် (Sagaing Region Journalist Network-SRJN)နဲ့ Save Monywa၊ မုံရွာအိမ်ခြံမြေအဖွဲ့တို့ ပူးပေါင်းကာ ပေးဝေခဲ့တာလည်းဖြစ်ပါတယ်။
အခုလိုပေးဝေတာက သတင်းသမားအချင်းချင်း ပိုပြီး စည်းလုံးညီညွတ်မှုတွေ ဖြစ်ပေါ်စေသလို၊ အခက်အခဲတွေကြုံတွေ့လာရင် မိသားစုလို ဝိုင်းဝန်းဖြေရှင်းတတ်တဲ့ အလေ့အကျင့်တွေလည်း ဖြစ်ပေါ်စေတဲ့အတွက် ကူညီပေးသူတွေကို ကျေးဇူးတင် ဝမ်းသာမိတယ်လို့လည်း မုံရွာအခြေစိုက် အလဲဗင်းသတင်းထောက် ကိုကောင်းခန့်လင်းက ပြောပါတယ်။
စစ်ကိုင်းတိုင်းဒေသကြီး သတင်းသမားများကွန်ရက်ကနေ ပြီးခဲ့တဲ့ ဧပြီလအတွင်းကလည်း COVID-19 ရောဂါကာကွယ်ရေးအတွက် သတင်းလိုက်ရာမှာ အသုံးပြုနိုင်ဖို့ PPE ဝတ်စုံ၊ N-95 Mask၊ Hand gel စတာတွေကိုလည်း ပေးဝေခဲ့ပါသေးတယ်။
စစ်ကိုင်းတိုင်းဒေသကြီး သတင်းသမားများကွန်ရက်အနေနဲ့ မုံရွာမြို့တင်မက တိုင်းအတွင်း တခြားဒေသကသတင်းထောက်တွေ ကျန်းမာရေးမကောင်းလို့ ဆေးကုသမှုခံယူရပါကလည်း ငွေကြေးကူညီထောက်ပံ့ပေးတာရှိပါတယ်။
