COVID-19 ကြောင့် အလုပ်သမား ၁ ဒသမ ၆ ဘီလီယံ အလုပ်လက်မဲ့ဖြစ်မည်ဟု ILO  ခန့်မှန်း

Reuters
ကိုရိုနာဗိုင်းရပ်စ် ကပ်ရောဂါဘေးကြောင့်  ကမ္ဘာ့လုပ်သားအင်အားရဲ့ တဝက်နီးပါးဖြစ်တဲ့ လုပ်သား ၁ ဒသမ ၆ ဘီလီယံဟာ အသက်မွေးဝမ်းကြောင်း အလုပ်တွေကို ဆုံးရှုံးလိမ့်မယ်လို့ အပြည်ပြည်ဆိုင်ရာ အလုပ်သမားအဖွဲ့  (ILO) က ဧပြီ ၂၉ ရက်မှာ ပြောလိုက်ပါတယ်။  COVID-19 ရောဂါကြောင့် အလုပ်အကိုင်တွေနဲ့ ဝင်ငွေတွေအပေါ် သက်ရောက်မှု မြင့်လာတာကို  ILO ရဲ့ နောက်ဆုံးထုတ်အစီရင်ခံစာက ဟောကိန်းထုတ်ထားပါတယ်။  ကူးစက်ကပ်ဘေးကြောင့် ကမ္ဘာတဝန်း လူပေါင်း ၃ ဒသမ ၁ သန်းကျော် ကူးစက်ခံခဲ့ရပြီး ၂၂၀၀၀၀ ကျော် သေဆုံးခဲ့တဲ့အပြင်  စီးပွားရေး လုပ်ငန်းတွေလည်း ပိတ်ထားရ ပါတယ်။ ဆင်းရဲမွဲတေမှု အလားအလာကိုလည်း မြင်နေရတယ်လို့ ILO ရဲ့ ညွှန်ချုပ် ဂိုင်းရီဒါက ပြောပါတယ်။  ရုံးဝန်ထမ်း မဟုတ်တဲ့ လုပ်သားတွေဟာ ကမ္ဘာ့လုပ်သားအင်အား ၃ ဒသမ ၃ ဘီလီယံ ရှိတဲ့ လုပ်သားတွေကြားမှာ အထိအခိုက် အများဆုံးလည်း ဖြစ်ပြီး လူမှုဖူလုံရေး အကာအကွယ် မရတာ၊ ကောင်းမွန်တဲ့ ကျန်းမာရေးစောင့်ရှောက်မှုကို လက်လှမ်းမမီတာ၊ အိမ်ကနေ အလုပ်လုပ်ခွင့် မရတာ စတဲ့ ဖိအားတွေကို ရင်ဆိုင်နေရပါတယ်။  ကာလကြာရှည် အသွားအလာကန့်သတ်တာ၊ ရုံးတွေ စက်ရုံတွေကို ပိတ် ထားတာတွေဟာ ကမ္ဘာတဝန်း ဘဏ္ဍာရေးနှစ် ဒုတိယ ၃ လပတ်အတွင်း အလုပ်ချိန် စုစုပေါင်း ကျဆင်းမှုကို ပိုဆိုးလာမယ်လို့ မျှော်လင့်ထားပါတယ်။  အထိနာဆုံး ကဏ္ဍတွေက ကုန်ထုတ်လုပ်ရေး၊ စားသောက်ကုန်၊ နေရာ ထိုင်ခင်း၊ လက်ကားနဲ့ လက်လီကုန်သွယ်ရေး၊ အိမ်ခြံမြေလုပ်ငန်း စတာတွေ ဖြစ်တယ်လို့  ရိုက်တာသတင်းမှာ ဖော်ပြပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up