ဖျာပုံဆေးရုံတွင် ဆိုင်ကယ်ကယ်ရီမောင်းသူ ၁ ဦးကို သံသယလူနာအဖြစ် စောင့်ကြည့်
DVB
·
April 24, 2020
ဧရာဝတီတိုင်းဒေသကြီး၊ ဖျာပုံမြို့ရှိ ဖျာပုံပြည်သူ့ဆေးရုံကြီး၊ သံဃာ့ဆေးရုံ ဆေးကုသဆောင်မှာ သံသယလူနာ အမျိုးသား ၁ ဦးကို စောင့်ကြည့်ကုသမှု ပေးနေပြီး ဓာတ်ခွဲနမူနာ ပေးပို့စစ်ဆေးသွားမယ်လို့ ဆေးရုံက သိရပါတယ်။
ဖျာပုံမြို့၊ (၁၇)ရပ်ကွက်မှာနေထိုင်တဲ့ အသက် ၄၀ အရွယ် ဆိုင်ကယ်ကယ်ရီမောင်းသမားတဦးဟာ ဧပြီ ၂၀ ရက်ကစပြီး ချောင်းဆိုးခြင်း၊ ရင်ကြပ်ခြင်း၊ အသက်ရှုမဝခြင်း၊ လည်ချောင်းနာခြင်းတွေ ဖြစ်ပေါ်နေလို့ ဧပြီ ၂၃ ရက်မှာ သံသယရှိသူအဖြစ် သတ်မှတ်၍ ဓာတ်ခွဲနမူနာများရယူကာ အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်)သို့ ပို့ဆောင်ကာ COVID-19 ကူးစက်ရောဂါပိုးရှိ/မရှိ စစ်ဆေးဆောင်ရွက်ဖို့ ဆေးရုံက စီစဉ်နေပါတယ်။
သံသယလူနာဟာ ပြည်ပခရီးသွားခဲ့တာ မရှိဘဲ အဆုတ်ရောင်ရောဂါအခံရှိသူတစ်ဦး ဖြစ်တယ်လို့လည်း သိရပါတယ်။
အဆိုပါ သံသယလူနာမှာ အတူနေ မိသားစုဝင် ၄ ဦးရှိပြီး သူတို့အားလုံးကို Home Quarantine အဖြစ် အသွားအလာ ကန့်သတ်စောင့်ကြည့်နေပါတယ်။
သတင်း- ကျော်စိုးမိုး
