COVID-19 အတည်ပြု လူနာသစ် ၁၃ ဦး ထပ်မံတွေ့ရှိ
DVB
·
April 19, 2020
မြန်မာနိုင်ငံမှာ ဧပြီ ၁၈ ရက်နေ့ စစ်ဆေးခဲ့တဲ့ ဓာတ်ခွဲနမူနာအရ COVID-19 ရောဂါ လူနာသစ် ၁၃ ဦး ထပ်မံတွေ့ရှိခဲ့ပြီး စုစုပေါင်း ကူးစက်ခံရသူ ၁၀၇ ဦးရှိပြီလို့ကျန်းမာရေးဝန်ကြီးဌာနက ဒီနေ့မနက် ၇ နာရီမှာ ထုတ်ပြန်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) ရဲ့ ဧပြီ ၁၈ ရက်နေ့ ပထမအသုတ်စစ်ဆေးခဲ့တဲ့ ဓာတ်ခွဲနမူနာ ၉၁ ခု အနက် ၂ ဦးမှာ COVID-19 ရောဂါပိုးတွေ့ရှိရပြီး ဒုတိယအသုတ် စစ်ဆေးခဲ့တဲ့ ဓာတ်ခွဲနမူနာ ၉၄ ခုထဲမှာလည်း ၂ ဦး တွေ့ရှိခဲ့တာပါ။ အတည်ပြုလူနာထဲမှာ အသက် ၁ နှစ်နဲ့ ၆ လသားအရွယ်ကလေးငယ်တဦးလည်း ပါဝင်ပါတယ်။
ဧပြီ ၁၈ ရက်နေ့ တတိယအသုတ် စစ်ဆေးခဲ့တဲ့ ဓာတ်ခွဲနမူနာ ၈၇ ခုအနက် ၉ ဦးမှာ COVID-19 ရောဂါပိုး တွေ့ရှိပြီး ကျန် ၇၈ ဦးက COVID-19 ရောဂါပိုးမတွေ့ရှိဘူးလို့ ဆိုပါတယ်။
ဒါကြောင့် COVID-19 ရောဂါအတွက် ဧပြီ ၁၈ ရက်နေ့က ပထမအသုတ်၊ ဒုတိယအသုတ်၊ တတိယအသုတ် ဓာတ်ခွဲစစ်ဆေးမှုတွေအရ လူနာသစ် စုစုပေါင်း ၁၃ ဦးရှိပြီး ကျန် ၂၅၉ ဦးမှာ ရောဂါပိုးမတွေ့ရှိရဘူးလို့ ဆိုပါတယ်။
မြန်မာနိုင်ငံမှာ ဧပြီ ၁၉ ရက် မနက် ၇ နာရီအထိ COVID-19 ဓာတ်ခွဲအတည်ပြုလူနာ စုစုပေါင်း ၁၀၇ ဦး၊ သေဆုံးသူ ၅ ဦးနဲ့ ဆေးရုံမှ ဆင်းခွင့်ရရှိသူ ၂ ဦးရှိပါတယ်။
