ပြည်ထောင်စုဝန်ကြီးစီးနင်းလိုက်ပါလာသည့် ရဟတ်ယာဉ် စက်သေနတ်ဖြင့် အပစ်ခတ်ခံရ

၂၀၁၉ ခု အောက်တိုဘာလက အေအေမှ ဖမ်းဆီးခေါ်ဆောင်ခံရသူတွေကို တပ်မတော်က စစ်ရဟတ်ယာဉ်တွေ အသုံးပြုပြီး အမြန်ဆုံး လိုက်လံရှာဖွေကယ်တင်ရာမှ ရဟတ်ယာဉ်ကို သေနတ်ဖြင့်အပစ်ခံရစဉ်
ရခိုင်ပြည်နယ်ဝန်ကြီးချုပ်ဦးညီပုနဲ့ ပြည်ထောင်စုဝန်ကြီး ဒေါက်တာဝင်းမြတ်အေးတို့ စီးနင်းလိုက်ပါတဲ့ ရဟတ်ယာဉ်ကို ဒီကနေ့ မနက်ပိုင်းက ဘူးသီးတောင်မြို့နယ် ညောင်ချောင်းရွာနားမှာ စက်သေနတ်နဲ့ အပစ်ခံခဲ့ရတယ်လို့ ပြည်နယ်အစိုးရဝန်ကြီး တဦးက ဒီဗွီဘီကို  အတည်ပြုပြောပါတယ်။ စစ်တွေကနေ ဒီကနေ့ မနက်ပိုင်းက ဘူးသီးတောင်ကို ပျံသန်းလာတဲ့အချိန်မှာ ပစ်ခတ်ခံရတာဖြစ်ပြီး အခုလို ပစ်ခတ်ခံရမှုကြောင့် ဝန်ကြီးတွေနဲ့ လိုက်ပါလာတဲ့ တာဝန်ရှိသူတွေ တစုံတရာ ထိခိုက်ဒဏ်ရာရတာ မရှိပေမယ့်  ရဟတ်ယာဉ် ပျက်စီးမှုတချို့ ရှိခဲ့တယ်လို့ ပြည်နယ်အစိုးရဝန်ကြီးတဦးက ပြောပါတယ်။ “ဖြစ်စဉ်ကမှန်တယ်။ အဲ့ဒီမှာ စက်သေနတ်တွေနဲ့ ပစ်တယ်။ အချက်ပေါင်းများစွာပစ်တယ်။ ဒါပေမဲ့ ထိခိုက်ဒဏ်ရာရတာ တဦးတယောက်မှလည်း မရှိဘူး။ အခု ဝန်ကြီးချုပ် ဦးညီပုလည်း ပြန်ရောက်နေပြီ။ ဒေါက်တာဝင်းမြတ်အေးကတော့ ရန်ကုန် ပြန်သွားပြီလေယာဉ်နဲ့” လို့ ပြောပါတယ်။ ရခိုင်ပြည်နယ်ဝန်ကြီးချုပ် ဦးညီပုနဲ့  လူမှုဝန်ထမ်း၊ ကယ်ဆယ်ရေးနဲ့ပြန်လည် နေရာချထားရေး ပြည်ထောင်စုဝန်ကြီး  ဒေါက်တာဝင်းမြတ်အေးတို့ဟာ ဘူးသီးတောင်မှာရှိတဲ့ တိုက်ပွဲကြောင့် ထိခိုက်ဒဏ်ရာရတဲ့သူတွေကို သွားရောက်တွေ့ဆုံတဲ့ခရီးစဉ်မှာ အခုလို ပစ်ခတ်ခံရ တာဖြစ်ပါတယ်။  အဲဒီဖြစ်စဉ်နဲ့ပတ်သက်ပြီး တပ်မတော်သတင်းမှန်ပြန်ကြားရေးအဖွဲ့ အတွင်းရေးမှူး ဗိုလ်မှူးချုပ်ဇော်မင်းထွန်းက“စစ်တွေကနေဘူးသီးတောင်အသွားမှာ မနက် ၁၀ နာရီ ၄၅ မှာဖြစ်တာပါ။  ၂ ချက် အပစ်ခံရတာပါ။ စိုးရိမ်မှုမရှိဘူး။ ထိခိုက်မှုမရှိဘူး။ ရဟတ်ယာဉ်က စစ်တွေကို ညနေ ၃ နာရီ မှာပြန်ရောက်တယ်။  ဒေါက်တာဝင်းမြတ်အေးက ဘူးသီးတောင်မှာ ဖွံ့ဖြိုးရေးလုပ်ငန်းတွေလုပ်ဖို့သွားတာ၊ သွားတိုင်း စစ်ရဟတ်ယာဉ်နဲ့ပဲ သွားနေကြပါ။”လို့ ဒီဗွီဘီကို ပြောပါတယ်။ ပစ်ခတ်ခဲ့သူတွေဟာဘယ်အဖွဲ့ကလဲဆိုတာမသိရသေးပေမယ့် အခုဖြစ်ခဲ့တဲ့နေရာက ဖေဖော်ဝါရီ ၁၈ ရက်နေ့က တပ်မတော်နဲ့ အေအေအဖွဲ့တွေ တိုက်ပွဲဖြစ်ပွားခဲ့ တာတွေရှိခဲ့တယ်လို့လည်း ဒေသခံတွေက ပြောဆိုပါတယ်။ သတင်း- ဝဏ္ဏခွာညို- အောင်သူ

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up