အငြိမ်းစားဝန်ထမ်းများကို မော်တော်ယာဉ်တင်သွင်းခွင့်ပြုမည့်ကိစ္စ ဆိုင်းငံ့ထားဟု ဦးဇော်ဌေးပြော

အငြိမ်းစားဝန်ထမ်းတွေကို ချထားပေးမယ့် မော်တော်ယာဉ်တင်သွင်းခွင့်ပြုမယ့်ကိစ္စ ဆိုင်းငံ့ခိုင်းထားတယ်လို့ ဇန်နဝါရီ ၃၁ ရက် ညနေပိုင်းက နေပြည်တော်မှာ ပြုလုပ်တဲ့ သတင်းစာရှင်းလင်းပွဲမှာ နိုင်ငံတော်သမ္မတရုံး ပြောရေးဆိုခွင့်ရှိသူ ဦးဇော်ဌေးက ပြောပါတယ်။ “ဒီမော်တော်ယာဉ်တင်သွင်းခွင့်နဲ့ ပတ်သက်ပြီး ဆိုင်းငံ့ထားဖို့ ညွှန်ကြားထားပြီးသား ဖြစ်ပါတယ်။ စီးပွားကူးသန်းနေနဲ့ ဆိုင်းငံ့ထားဖို့။ ပြီးရင် လူကြီးတွေအနေနဲ့ ပြန်ပြီးတော့ သုံးသပ်ပါ၊ သုံးသပ်ပြီးတော့မှ အဖြေတစုံတရာ ဘယ်လိုရမလဲပေါ့။ နိုင်ငံ့ဝန်ထမ်းတွေ ပြည်သူ့ဝန်ထမ်းတွေ မော်တော်ယာဉ်တင်သွင်းခွင့်နဲ့ ပတ်သက်ပြီးတော့ ဆိုင်းငံ့ထားပါတယ်”လို့ ဦးဇော်ဌေးက ပြောပါတယ်။ မော်တော်ယာဉ်တင်သွင်းခွင့်ကို ပင်စင်သွားခါနီး ဝန်ထမ်းတွေနဲ့ နိုင်ငံ့ဝန်ထမ်းတွေဟာ အလုပ်သက် ၂၆ နှစ်ရှိပြီး ပြည်သူ့ဝန်ထမ်းကောင်းတွေကို ချထားပေးမယ်လို့ ဆိုပါတယ်။ “တပ်ဘက်မှာ ၂၅ နှစ်ဆို စစ်မှုထမ်းကောင်းရတယ်။ အရပ်ဘက်မှာ ၂၆ နှစ်ဆို ပြည်သူ့ဝန်ထမ်းကောင်းရတယ်။ ပြည်သူ့ဝန်ထမ်းကောင်းရတဲ့သူက မင်နီမရှိရဘူး။ ပြစ်မှုကျူးလွန်တာလည်း မရှိရဘူး။ စည်းကမ်းဖောက်ဖျက်တာလည်း မရှိရဘူး။ အဲ့လိုလူတွေကို ပေးတာ။ စည်းနဲ့ကမ်းနဲ့နေထိုင်တယ်။ ကောင်းကောင်းမွန်မွန် လုပ်ကိုင်လာတဲ့ ဝန်ထမ်းတွေကို နိုင်ငံတော်က တစုံတရာ အသိအမှတ်ပြုတဲ့အနေနဲ့ ချီးမြှင့်ပေးမယ်ဆိုတဲ့ အနေနဲ့ စခဲ့တာ”လို့လည်း ပြောပါတယ်။ ပင်စင်သွားတဲ့ ဝန်ထမ်းဦးရေဟာ ၂၀၁၆ - ၂၀၁၇ ခုနှစ်မှာ ဦးရေ ၄ သောင်းကျော်နဲ့ ၂၀၁၇ - ၂၀၁၈ ခုနှစ်မှာ ဦးရေ ၄၃၀၀၀ ကျော်လောက်ရှိပြီး ၂၀၁၉ - ၂၀၂၀ ခုနှစ်မှာလည်း ပင်စင်ယူမယ့် ဝန်ထမ်းဦးရေ ဆိုရင် ၄၃၀၀၀ ကျော်လောက်ရှိမယ်လို့ သိရပါတယ်။ အဲဒီလို နှစ်စဉ် ပင်စင်သွားတဲ့ ဝန်ထမ်းဦးရေဟာ ၄ သောင်းခွဲလောက်ရှိပြီး အဲဒီအထဲမှာ ဝန်ထမ်းကောင်း လက်မှတ်ရရှိထားတဲ့ ဝန်ထမ်းဦးတွေကိုတော့ စိစစ်မှုတွေ ပြုလုပ်နေတယ်လို့ ဆိုပါတယ်။ ညွှန်ကြားရေးမှူးချုပ်နဲ့အထက် ပြည်သူ့ဝန်ထမ်းတွေနဲ့ နိုင်ငံဝန်ထမ်းတွေအတွက် အခွန်ကင်းလွတ်ခွင့်ရမယ့် ကားတင်သွင်းခွင့်ပေးဖို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ဇန်နဝါရီ ၂ ရက်နေ့ ရက်စွဲနဲ့ ညွှန်ကြားချက် ထုတ်ပြန်ခဲ့ပါတယ်။ အဲဒီထုတ်ပြန်ချက်မှာ ပထမအသုတ်အနေနဲ့ ညွှန်ကြားရေးမှူးချုပ်နဲ့အထက် ပြည်သူ့ဝန်ထမ်းနဲ့ နိုင်ငံဝန်ထမ်းတွေအတွက် မော်တော်ယာဉ်တင်သွင်းခွင့်နဲ့ပတ်သက်လို့ လျှောက်လွှာတွေကို ဇန်နဝါရီ ၈ ရက်နေ့အရောက် ပို့ပေးဖို့နဲ့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှာ လျှောက်ထားဖို့ ထုတ်ပြန်ထားပါတယ်။  ဝန်ထမ်းတွေအပေါ် မော်တော်ယာဉ်တင်သွင်းခွင့် ပြုခဲ့တဲ့အတွက် ပြည်သူတွေကြား ဝေဖန်မှုတွေ ထွက်ပေါ်ခဲ့ပြီးနောက် ပြန်လည်သုံးသပ်မယ်လို့ သမ္မတရုံးက ထုတ်ပြန်ထားတာလည်း ဖြစ်ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up