ဝမ်းတွင်းမြို့နယ်တွင် တရားမဝင်သစ် ၅ တန်ကျော်နှင့် သစ်ခွဲစက်ဖမ်းမိ
DVB
·
January 29, 2020
မန္တလေးတိုင်း၊ ဝမ်းတွင်းမြို့နယ်၊ ကြွယ်ကန်ရွာမှာ ဇန်နဝါရီ ၂၈ ရက်မနက်က တရားမဝင်သစ် ၅ တန်ကျော်နဲ့ သစ်ခွဲစက် ၁ လုံး ဖမ်းမိတယ်လို့ သစ်တောဦးစီးဌာနက ပြောပါတယ်။
မြို့နယ်သစ်တောဦးစီးမှူးဦးအောင်ထွန်းက “လက်ပံ၊ ထောက်ကြန့်စတဲ့ တခြားသစ်တွေ ဖမ်းမိပါတယ်။ လူနေအိမ်ဝင်းထဲက ၃ တန်ကျော်နဲ့ သစ်ခွဲစက် ၁ လုံး ရွာမြောက်ဘက် လယ်ကွင်း ထဲမှာ ပိုင်ရှင်မဲ့အနေနဲ့ အခြားသားသစ် ၂ တန်ကျော် ဖမ်းမိတယ်။ ၂၀၁၈ ခုနှစ်က ထုတ်ပြန်ထားတဲ့ သစ်တောဥပဒေနဲ့ အရေးယူမှာပါ" လို့ ပြောပါတယ်။
သစ်တောဦးစီးဌာန၊ ရဲတပ်ဖွဲ့နဲ့ ရပ်ရွာလူကြီးတွေပါတဲ့ ပူးပေါင်းအဖွဲ့က အခြားသားသစ် ၅ တန်ကျော်နဲ့ သစ်ခွဲစက် ၁လုံးကို ဖမ်းဆီးမိခဲ့ပါတယ်။
ကြွယ်ကန်ရွာနေ ဦးကြည်သင်း(၆၂နှစ်) နေအိမ်ဝင်းထဲက သစ်ခွဲစက် ၁ လုံးနဲ့ အခြားသားသစ် ၃ တန်ကျော် ဖမ်းမိပြီး သတင်းအရ ကြွယ်ကန်ရွာ မြောက်ဘက် လယ်ကွင်းထဲက အခြားသားသစ် ၂ တန်ကျော်ကို ပိုင်ရှင်မဲ့ ဖမ်းမိခဲ့ပါတယ်။
ဝမ်းတွင်းမြို့မရဲစခန်းမှာ ဦးကြည်သင်းကို သစ်တောဦးစီးဌာနက တရားလိုပြုလုပ်ပြီး အမြင့်ဆုံးပြစ်ဒဏ် ၂ နှစ်အထိချမှတ်နိုင်တဲ့ တရားမဝင် အခြားသားသစ် လက်ဝယ်ထားရှိခြင်း သစ်တော ဥပဒေပုဒ်မ ၄၁(က)နဲ့ အမြင့်ဆုံးပြစ်ဒဏ် ၇နှစ်အထိရှိတဲ့ တရားမဝင်သစ်ခွဲစက်ရှိခြင်း သစ်တောဥပဒေပုဒ်မ ၄၂(ခ) တို့နဲ့ အမှုဖွင့် အရေးယူထားပါတယ်။
သတင်း-မောင်မောင်လင်း