Homeမြန်မာသတင်း
ဧရာဝတီတိုင်း ဝန်ကြီးချုပ်နှင့် တွေ့ခွင့်ရရေး ကန်ကြီးထောင့်အလုပ်သမား ၂၅၀ ကျော် တောင်းဆို
ဧရာဝတီတိုင်း ဝန်ကြီးချုပ်နှင့် တွေ့ခွင့်ရရေး ကန်ကြီးထောင့်အလုပ်သမား ၂၅၀ ကျော် တောင်းဆို
DVB
·
January 12, 2020
ဝန်ကြီးချုပ်နဲ့ ဒုတိယအကြိမ် တွေ့ဆုံခွင့်ရဖို့ ကန်ကြီးထောင့် သပိတ်မှောက် အလုပ်သမားတွေဟာ ဧရာဝတီတိုင်း၊ ပုသိမ်မြို့၊ အမှတ် ၄ ရပ်ကွက်က တိုင်းဒေသကြီးအစိုးရအဖွဲ့ ရုံးမှာ ဇန်နဝါရီ ၁၁ ရက်နေ့ ညနေပိုင်းမှာ လာရောက်တောင်းဆိုခဲ့ကြပါတယ်။
အခုလို တောင်းဆိုတာဟာ ချိုးဖောက်ခံနေရတဲ့ အလုပ်သမား အခွင့်အရေးတွေနဲ့ အလုပ်သမားဝန်ကြီးရဲ့ ကတိမတည်တာတွေကို တွေ့ဆုံပြောပြဖို့ ဖြစ်တယ်လို့ အလုပ်သမားသပိတ် ခေါင်းဆောင်တဦးဖြစ်တဲ့ မစုပုံချစ်က ဒီဗွီဘီကို ပြောပါတယ်။
“ခုလာတာ ဝန်ကြီးချုပ်နဲ့တွေ့ဖို့ပါ၊ ပထမတခါလာတုန်းက ဝန်ကြီး ၃ ပါးနဲ့ တွေ့ပါတယ်၊ ၃ ရက်အတွင်း ထူးခြားတဲ့အဖြေပေးမယ်ပြောလို့ စောင့်ခဲ့ပါတယ်။ ရက်ချိန်းပြည့်တော့ အလုပ်သမားဝန်ကြီးက အားလုံးအဆင်ပြေပြီ၊ ၁၁ ရက်နေ့ကို စာချုပ်ချုပ်ဆိုမယ်လို့ ကတိပေးခဲ့ပါတယ်။ ဒီနေ့ လုံးဝ ဆက်သွယ်မလာလို့ သမီးတို့ ဆရာမက ဖုန်းဆက်မေးတော့ လာမယ်ဆိုတဲ့သူတွေက မလာလို့ပါလို့ ပြန်ပြောပါတယ်၊ အဲဒီတော့ သမီးတို့တွေအားလုံး ဝန်ကြီးချုပ်ကို တွေ့ဆုံဖို့ လာခဲ့တာပါ။”
အလုပ်သမားတွေ ရောက်ရှိလာပြီ ခဏအကြာမှာပဲ အချုပ်ကား ၂ စီးနဲ့ လုံခြုံရေး ရဲတပ်ဖွဲ့ဝင်တွေ၊ မြို့နယ်ရဲတပ်ဖွဲ့မှူးနဲ့ အထွေထွေအုပ်ချုပ်ရေးဌာနက တာဝန်ရှိသူတွေ ရောက်လာပြီး အစိုးရအဖွဲ့ရုံးရှေ့မှာ နေလို့မရကြောင်း ပြောဆိုခဲ့တယ်လို့ ဆိုပါတယ်။
အလုပ်သမားတွေဘက်ကတော့ ဝန်ကြီးချုပ်နဲ့ မတွေ့ရမချင်း အစိုးရရုံးရှေ့က ထွက်ခွာမှာ မဟုတ်ဘဲ အချုပ်ကားနဲ့ ဖမ်းခေါ်ရင်လည်း လိုက်ခဲ့မယ်လို့ ပြောဆိုခဲ့ကြပါတယ်။
ဒီဇင်ဘာ ၉ ရက်နေ့ကနေ စတင်ဖြစ်ပေါ်ခဲ့တဲ့ ကန်ကြီးထောင့်မြို့မှာရှိတဲ့ ဟွာမှုန်အထည်ချုပ် စက်ရုံအလုပ်သမား သပိတ်နဲ့ပတ်သက်လို့ လွှတ်တော်ကိုယ်စားလှယ်တွေ၊ ဒေသခံ အာဏာပိုင် အဖွဲ့အစည်းတွေက ဝင်ရောက်ညှိနှိုင်းခဲ့ပေမယ့် အလုပ်ရှင်နဲ့ အလုပ်သမားကြား အခုထိပြေလည်မှု မရရှိသေးတာလည်း ဖြစ်ပါတယ်။
ဇန်နဝါရီလ ၅ ရက်နေ့ကလည်း သပိတ်မှောက်အလုပ်သမားတွေက အခွင့်အရေး ချိုးဖောက်ခံနေရမှုတွေကို ဝန်ကြီးချုပ်နဲ့ တွေ့ဆုံပြောပြဖို့အတွက် အစိုးရရုံးရှေ့မှာ လာရောက် တောင်းဆိုခဲ့ကြပါသေးတယ်။
အလုပ်သမားတွေ အစိုးရအဖွဲ့ရုံးရှေ့ ရောက်လာချိန်မှာ လူဝင်မှုကြီးကြပ်ရေးနှင့် လူအစွမ်းအား အရင်းအမြစ်ဝန်ကြီး ဒေါက်တာစိုးဝင်း အပါအဝင် အစိုးရအဖွဲ့က ဝန်ကြီး ၃ ဦးက လက်ခံတွေ့ဆုံပြီး အလုပ်သမားတွေရဲ့ တောင်းဆိုချက်တွေကို လက်ခံနားထောင်ခဲ့ကာ ၃ ရက်အတွင်း ထူးခြားတဲ့အဖြေ ပြန်ပေးမယ်လို့ ကတိပေးပြောဆိုခဲ့ပေမယ့် ထူးခြားမှုတစုံတရာ ရှိမလာတဲ့အတွက် ဝန်ကြီးချုပ်နဲ့ တွေ့ဆုံဖို့ လာရောက်တာလို့ အလုပ်သမားတွေက ပြောပါတယ်။
အလုပ်ရှင်၊ အလုပ်သမား သဘောတူစာချုပ်ထားတဲ့ အလုပ်သမားအခွင့်အရေးဆိုင်ရာ တောင်းဆိုချက်တွေကို စက်ရုံပိုင်ရှင်က မလိုက်နာတာ၊ အလုပ်သမားတွေ တောင်းဆိုခဲ့တဲ့ အကျိုးစီးပွားဆိုင်ရာ အချက် ၈ ချက်နဲ့ပတ်သက်ပြီး အလုပ်သမား ခုံသမာဓိရုံးရဲ့ ဆုံးဖြတ်ချက်ကို မကျေနပ်တာကြောင့် ကန်ကြီးထောင့်အလုပ်သမားတွေ ဆန္ဒပြနေတာ တလလောက်ရှိပြီ ဖြစ်ပါတယ်။
မင်းထက်မုန်း (ပုသိမ်)