ကရင်နှစ်သစ်ကူးပွဲတော် ဟင်္သာတနှင့် ဖျာပုံမြို့နယ်တို့တွင် ကျင်းပ
DVB
·
December 26, 2019
အာဇာနည်ခေါင်းဆောင်ကြီး မန်းဘခိုင်ရဲ့ ဇာတိရွာဖြစ်တဲ့ ဧရာဝတီတိုင်း၊ ဟင်္သာတမြို့နယ် ယုန်သလင်းကျေးရွာမှာ (၈၂) ကြိမ်မြောက် ကရင်နှစ်သစ်ကူးနေ့အ ခမ်းအနားကို ဒီကနေ့ မနက်က ကျင်းပပါတယ်။
အခမ်းအနားကို အမျိုးသားလွှတ်တော်ဥက္ကဋ္ဌ မန်းဝင်းခိုင်သန်းက ပေးပို့တဲ့ သဝဏ်လွှာ ဖတ်ကြားခြင်း အပါအဝင် ကရင်နှစ်သစ်ကူးနေ့ ဖြစ်ပေါ်လာပုံကို မြန်မာဘာသာ၊ ပိုးကရင်ဘာသာ၊ စကောကရင်ဘာသာနဲ့ ရှင်းလင်းပြောကြားခဲ့ပြီး ကရင်ရိုးရာ ဒုံးအကတွေနဲ့ ဧည့်ခံဖျော်ဖြေကြပါတယ်။
ယုန်သလင်းတိုက်နယ်မှာ ကျေးရွာအုပ်စု ၉ အုပ်စုရှိပြီး ကျေးရွာပေါင်း ၉၇ ရွာရှိကာ ကရင်လူမျိုးအများစုနေထိုင်တဲ့ တိုက်နယ်ဒေသလည်း ဖြစ်ပါတယ်။
အရင်နှစ်တွေက ကရင်နှစ်သစ်ကူးနေ့အခမ်းအနားကို ယုန်သလင်းကျေးရွာပဲ စုပေါင်းကျင်းပခဲ့ပေမယ့် ဒီနှစ်မှာတော့ တိုက်နယ်အတွင်းမှာပါဝင်တဲ့ သမုဒ္ဒရိုးအုပ်စု ဇီးကုန်းကျေးရွာ၊ လိပ်ခုံးအုပ်စု ဗမော်နဝင်းကျေးရွာ၊ ယုန်သလင်းအုပ်စု ယုန်သလင်းကျေးရွာစတဲ့နေရာ ၃ နေရာမှာကျင်းပခဲ့ကြတာပါ။
အလားတူ ဖျာပုံမြို့က မြန်မာနှစ်ချင်းခရစ်ယာန်အသင်းတော် အားကစားကွင်းမှာလည်း ဒီကနေ့မနက် ကရင်နှစ်သစ်ကူးနေ့ အလံတင်အခမ်းအနား ကျင်းပခဲ့ပါတယ်။
အခမ်းအနားမှာ ကရင်အမျိုးသားအလံတော်ကို တိုင်ထိပ်လွှင့်တင်ခဲ့ပြီးနောက် အလံတော်အား အလေးပြုကာ ကရင်အမျိုးသားသီချင်း သီဆိုခဲ့ကြပါတယ်။
အင်္ဂလိပ်အစိုးရလက်ထက်မှာ ကရင်အမျိုးသားနေ့ သတ်မှတ်ပေးဖို့ တောင်းဆိုခဲ့ကြရာမှာ ၁၉၃၈ ဇန်ဇဝါရီ ၁ ရက်နေ့ မြန်မာသက္ကရာဇ် ၁၂၉၉ ခုနှစ်၊ ပြာသိုလဆန်း ၁ ရက်နေ့ကို ကရင်နှစ်သစ်ကူးနေ့ အဖြစ်သတ်မှတပြီး စတင်ကျင်းပခဲ့တယ်လို့' ကရင်နှစ်သစ်ကူးပွဲတော်ကျင်းပရေး ကော်မတီ ဥက္ကဋ္ဌ ဦးစောအောင်ချစ်ဆွေက ပြောပါတယ်။
နောင်လာနောင်သား ကရင်လူမျိုးတွေ ကိုယ့်ရဲ့ ရိုးရာယဉ်ကျေးမှုကို လက်ဆင့်ကမ်း ထိန်းသိမ်းစောင့်ရှောက်နိုင်ရေးအတွက် အခုလို ပါဝင်ဆင်နွှဲခဲ့တာပါလို့ နော်မူမူဝင်းက ဆိုပါတယ်။
ကရင်သက္ကရာဇ် ၂၇၅၉ ခုနှစ် ကရင်နှစ်သစ်ကူးပွဲတော်မှာ အားကစားပွဲတွေ၊ ပျော်ပွဲ ရွှင်ပွဲတွေ၊ ကရင်ဒုံးယိမ်းအကတွေနဲ့ စည်ကားသိုက်မြိုက်စွာ ကျင်းပနေပါတယ်။
သတင်း-ဌေးလှိုင်၊ ကျော်စိုးမိုး
