ကားလို့အန်ဆယ်လော့တီကို အဲဗာတန်နည်းပြသစ်အဖြစ် ခန့်အပ်နိုင် 

Photo : Carlo Ancelotti
ကားလို့အန်ဆယ်လော့တီကို အခုသီတင်းပတ်ကုန်ပိုင်းမှာ အဲဗာတန်အသင်းရဲ့ အမြဲတမ်း နည်းပြအသစ်အဖြစ် ထုတ်ပြန်‌ကြေညာခံဖို့ရှိနေတယ်လို့   Sky News သတင်းမှာ ဖော်ပြပါတယ်။ အန်ဆယ်လော့တီဟာ အဲဗာတန် နည်းပြရာထူးအတွက် ၄ နှစ်ခွဲစာချုပ်နဲ့ ကမ်းလှမ်းခံထားရတာ ဖြစ်ပြီးတော့ သူ့ရဲ့အဲဗာတန် နည်းပြဘဝ ပထမဆုံးပွဲကို လာမယ့် ဘောက်ဆင်ဒေးမှာ ကန်မယ့် ဘန်လေနဲ့ပွဲမှာ စတင်မယ်လို့ အီတလီ သတင်းတွေမှာ ဖော်ပြပါတယ်။ အန်ဆယ်လော့တီရဲ့ လက်ထောက်နည်းပြတွေအဖြစ် သူ့ရဲ့သားဖြစ်သူ ဒေးဗစ်အန်ဆယ်လော့တီနဲ့ လက်ရှိ အဲဗာတန်အသင်းရဲ့ ယာယီနည်းပြ ဒန်ကန်ဖာဂူဆန်တို့က တာဝန်ယူမှာ ဖြစ်ပြီးတော့ သူဟာ လာမယ့်ဇန်နဝါရီ အပြောင်းအရွှေ့မှာလည်း ကစားသမားသစ် ခေါ်ယူဖို့ ငွေသုံးစွဲခွင့်ပြုမယ်ဆိုတဲ့ အာမခံချက်ကိုလည်း ရရှိထားတယ်လို့ သိရပါတယ်။ အီတလီအခြေစိုက် Sky သတင်းမှာ ဖော်ပြထားချက်အရ အန်ဆယ်လော့တီဟာ နေပယ်ကို သွားရောက်ပြီး သူနဲ့ နာပိုလီအသင်းတို့ကြားက ကျန်ရှိနေသေးတဲ့ စာချုပ်အချက်အလက်တွေကို ဖြေရှင်းမှာ ဖြစ်ပါတယ်။ အဲဗာတန်အသင်းဟာ ရလဒ်တွေ ဆိုးရွားနေမှုကြောင့် နည်းပြဖြစ်သူ မာကိုဆေးဗားလ်ကို မကြာသေးခင်ကပဲ ထုတ်ပယ်ခဲ့ပါတယ်။ ဆေးဗားလ်ကို ထုတ်ပယ်ခဲ့ပြီး မကြာခင်မှာပဲ အန်ဆယ်လော့တီဟာလည်း နာပိုလီအသင်းကနေ ထုတ်ပယ်ခံခဲ့ရပါတယ်။  အဲဒါကြောင့် သူဟာ နည်းပြသစ်တဦးကို ရှာဖွေနေတဲ့ အဲဗာတန်နဲ့ အာဆင်နယ်အသင်းတို့ရဲ့ ပစ်မှတ်နည်းပြ ဖြစ်လာခဲ့ပါတယ်။ ဒါ့အပြင် အဲဗာတန်အသင်းရဲ့  ရှယ်ယာအများစုကို ပိုင်ဆိုင်ထားတဲ့ ဖာဟတ်မိုရှီရီနဲ့ ဥက္ကဋ္ဌ ဘီလ်ကန်ရိုက်တို့ဟာလည်း တခြားနည်းပြတွေထက်စာရင် အန်ဆယ်လော့တီကို သူတို့ရဲ့ ဦးစားပေးနည်းပြအဖြစ် သတ်မှတ်ထားပါတယ်။ အန်ဆယ်လော့တီဟာ ဥရောပဘောလုံးဇာတ်ခုံမှာ လူရိုသေ ရှင်ရိုသေ နည်းပြတဦး ဖြစ်ပြီးတော့ ပရီးမီးယားလိဂ်မှာလည်း အောင်မြင်မှုရရှိထားသူတဦး ဖြစ်ပါတယ်။ သူဟာ ချဲလ်ဆီးအသင်းကို ၂၀၀၉ ခုနှစ်ကနေ ၂၀၁၁ ခုနှစ်အထိ ကိုင်တွယ်ခဲ့ဖူးပြီး ပရီးမီးယားလိဂ်ဖလား၊ အက်အေဖလားနဲ့ ကွန်မြူနတီဒိုင်းတို့ ကိုဆွတ်ခူးနိုင်ခဲ့သူလည်း ဖြစ်ပါတယ်။ သူ့ရဲ့ အောင်မြင်မှုတွေမှာ ချန်ပီယံလိဂ်ဖလား ၃ လုံးအပြင် ပြင်သစ်၊ အီတလီနဲ့ ဂျာမနီလိဂ်ဖလားတွေပါ ပါဝင်နေတာကြောင့် အဲဗာတန်အသင်းကို အမှန်တကယ် ရောက်ရှိလာမယ်ဆိုရင် ဘယ်လောက်အထိ စွမ်းဆောင်နိုင်မလဲဆိုတာ စောင့်ကြည့်ရမှာပါ။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up