အကြိတ်အနယ်ရှိမည့် ပရီးမီးယားလိဂ် ပွဲစဉ် ၅ ပွဲ သုံးသပ်ချက်

ဒီတပတ် ဒီဇင်ဘာ ၁၄ နဲ့ ၁၅ ရက်နေ့တွေ ယှဉ်ပြိုင်ကစားကြမယ့် အင်္ဂလန် ပရီးမီးယားလိဂ်ပွဲစဉ်တွေထဲကနေ စိတ်ဝင်တစား စောင့်ကြည့်မယ့် ပွဲကောင်းတွေကို ရွေးချယ် သုံးသပ်ပေးမှာ ဖြစ်ပါတယ်။ လီဗာပူး - ဝက်ဖို့ဒ် ပထမဆုံးအနေနဲ့ စနေနေ့ ည ၇ နာရီမှာ ယှဉ်ပြိုင်ကစားမယ့် လီဗာပူးနဲ့ ဝက်ဖို့ဒ်ပွဲ စချင်ပါတယ်။  အမှတ်ပေးဇယားအဆင့် ၁ က အသင်းနဲ့ အောက်ဆုံးက အသင်းတို့ ထိပ်တိုက်တွေ့ဆုံနေတဲ့ ပွဲစဉ်လည်း ဖြစ်ပါတယ်။ လီဗာပူးက ပရီးမီးယားလိဂ်မှာ ရှုံးပွဲမရှိတာ ၃၃ ပွဲအထိရှိနေပြီး ဒီပွဲမှာ မရှုံးဘူးဆိုရင် ၃၄ ပွဲဆက် ရှုံးပွဲမရှိ မှတ်တမ်းရရှိမှာပါ။ ဝက်ဖို့ဒ်ကတော့ ဒယ်လိုဖူ၊ ပါရေယာ၊ ဒူကိုရေး တို့လို ကစာသမားကောင်းတွေ ရှိပေမယ့် ရလဒ်ဆိုးရွားနေပါတယ်။  ဝက်ဖို့ဒ်က နည်းပြသစ် ပီယာဆန်ရဲ့ ပထမဆုံးပွဲစဉ်မှာ ရလဒ်ကောင်းဖို့ ကြိုးပမ်းမှာ ဖြစ်ပေမယ့် လီဗာပူးကွင်းဖြစ်လို့ ပိုပြီးရုန်းကန်ရတော့မှာ ဖြစ်ပါတယ်။ လီဗာပူးကလည်း ပုံမှန်ခြေစွမ်းရနေလို့ အိမ်ကွင်းမှာ ခြေချော်ဖို့ မဖြစ်နိုင်ပါဘူး။ လီဗာပူးပဲ ၂ ဂိုးပြတ်လောက်နဲ့ အနိုင်ယူသွားဖို့ များပါတယ်။ ချဲလ်ဆီး - ဘုန်းမောက် နောက်တပွဲကတော့ စနေည ၉ နာရီခွဲမှာ စတင်မယ့် ချဲလ်ဆီးနဲ့ ဘုန်းမောက်ပွဲစဉ်ပါ။ ချဲလ်ဆီးတို့ ပြီးခဲ့တဲ့တပတ်က အဲဗာတန်ကို ရှုံးနိမ့်ခဲ့လို့ ဒီပွဲမှာ နိုင်ပွဲပြန်ယူဖို့ အာရုံစိုက်မှာ ဖြစ်ပါတယ်။  ဘုန်းမောက်ကတော့ နောက်ဆုံး ၅ ပွဲဆက်တိုက် ရှုံးပွဲတွေနဲ့ ကြုံတွေ့ခဲ့ရပြီး ခံစစ်ပိုင်းကလည်း ဂိုးတွေ အလွယ်တကူ ခွင့်ပြုနေရပါတယ်။  ချဲလ်ဆီးတိုက်စစ်မှာ အေဗရာဟမ် ပြန်ပါလာလို့ ဂိုးတွေပြန်ရနေပြီး ပူလီဆစ်၊ ဝီလီယံ၊ မေဆန်မောင့်တို့ရဲ့ တိုက်စစ်စုဖွဲ့မှုကို ဘုန်းမောက်ခံစစ်က ထိန်းချုပ်နိုင်ဖို့ ခက်ပါတယ်။ ဘုန်းမောက် တိုက်စစ်ပိုင်းမှာ အဓိက ကစားသမားတွေဖြစ်တဲ့ ဝီလ်ဆင်၊ ဂျိုရူအာကင်းတို့ ဒဏ်ရာရနေပြီး ဒနသန်အကီ၊ ကွက်ခ်တို့လို နောက်တန်းကစားသမားတွေလည်း ဒဏ်ရာရနေတာပါ။ အိမ်ကွင်းမှာ ချဲလ်ဆီး ၂ ဂိုးလောက်အကွာနဲ့ အနိုင်ရဖို့များနေပါတယ်။ မန်ယူနိုက်တက် - အဲဗာတန် မန်ချက်စတာယူနိုက်တက်နဲ့ အဲဗာတန်ပွဲစဉ်ကိုတော့ တနင်္ဂနွေည ၈ နာရီခွဲမှာ ယှဉ်ပြိုင်ကြမှာပါ။ မန်ယူက စပါးနဲ့ မန်စီးတီး ထိပ်တန်း ၂ သင်းကို ဆက်တိုက်အနိုင်ကစားပြခဲ့ပြီး ယူရိုပါလိဂ်မှာလည်း  အယ်ခမမာကို ၄ ဂိုးပြတ် အနိုင်ရခဲ့လို့ စိတ်ဓာတ်နဲ့ ခြေစွမ်းပိုင်း အမြင့်ဆုံး ရောက်နေပါတယ်။  အဲဗာတန်ကလည်း ရှုံးပွဲတွေ ဆက်ခဲ့ပေမယ့် ချဲလ်ဆီးနဲ့ပွဲမှာ ၃ ဂိုး ၁ ဂိုးနဲ့ နိုင်ပွဲပြန်ရခဲ့ပါတယ်။ အဲဗာတန်က ရစ်ချာလီဆင်၊ ဆီဂတ်ဆန်တို့နဲ့ ခြေစွမ်းမဆိုးပေမယ့် အဝေးကွင်းပွဲစဉ်တွေမှာတော့ စိတ်မချရတာ တွေ့ရပါတယ်။ အကြိတ်အနယ် ကစားရနိုင်ပေမယ့် အိမ်ကွင်း ခြေစွမ်းကောင်းမွန်ပြီး လက်ရှိ စိတ်ဓာတ်ပိုင်း အမြင့်ဆုံးရောက်နေတဲ့ မန်ယူပဲ နိုင်ပွဲဆက်ဖို့ များပါတယ်။ ဝုဗ်ဗာဟမ်တန် - တော့တင်ဟမ် နောက်တပွဲကတော့ တနင်္ဂနွေည ၈ နာရီခွဲမှာပဲ ကစားကြမယ့် ဝုဗ်ဗာဟမ်တန်နဲ့ တော့တင်ဟမ်ပွဲစဉ်ပါ။ ဝုဗ်က ယူရိုပါလိဂ်ပွဲစဉ်တွေနဲ့ တောက်လျှောက်ပွဲပန်းခဲ့ပေမယ့်လည်း ပြိုင်ပွဲ ၂ ခုလုံးမှာ ခြေစွမ်းတည်ငြိမ်စွာနဲ့ ဖြတ်ကျော်လာခဲ့ပါတယ်။ ပရီးမီးယားလိဂ်မှာ ၇ ပွဲ ဆက်တိုက် ရှုံးပွဲမရှိ ကစားထားလို့ မော်ရင်ဟိုရဲ့ စပါးအသင်း ရုန်းကန်ရဖို့တော့ ရှိပါတယ်။  စပါးက ကြားရက်မှာကစားခဲ့တဲ့ ချန်ပီယံလိဂ်ပွဲစဉ်မှာတော့ ဘိုင်ယန်မြူးနစ်ကို ၃ ဂိုး ၁ ဂိုးနဲ့ ရှုံးနိမ့်ခဲ့ပါတယ်။ ပြီးခဲ့တဲ့နှစ်က ဒီနှစ်သင်း ၂ ကြိမ် တွေ့ဆုံမူမှာတော့ တပွဲစီ အနိုင်ရခဲ့ကြပါတယ်။ အကြိတ်အနယ်ရှိမယ့်ပွဲ ဖြစ်ပေမယ့် စပါးက နားရက်ပိုရခဲ့တာကတော့ အားသာချက်ဖြစ်နိုင်ပါတယ်။ ဝုဗ်ရဲ့ခြေစွမ်းက မာကျောပေမယ့်လည်း ဟယ်ရီကိန်း ဦးဆောင်တဲ့ တိုက်စစ်က ပွဲကို အဆုံးအဖြတ်ပေးသွားဖို့ရှိနေပါတယ်။ အာဆင်နယ် - မန်ချက်စတာစီးတီး နောက်ဆုံးပြောပြချင်တဲ့ပွဲကတော့ ဒီတပတ်ရဲ့ စိတ်ဝင်စားစရာအကောင်းဆုံးပွဲစဉ်ဖြစ်တဲ့ အာဆင်နယ်နဲ့ မန်ချက်စတာစီးတီး ပွဲစဉ်ပါ။ ဒီပွဲကိုတော့ တနင်္ဂနွေည ၁၁ နာရီမှာ ကစားကြမှာပါ။  အာဆင်နယ်က ဝက်စ်ဟမ်းနဲ့ပွဲစဉ်မှာ နိုင်ပွဲပျောက်ဆုံးနေမှုကို ရပ်တန့်နိုင်ခဲ့ပေမယ့် အကောင်းဆုံးခြေစွမ်းတော့ မရသေးတာတွေ့ရပါတယ်။ ဒီလိုချိန်မှာ မန်စီးတီးနဲ့ တွေ့ဆုံနေလို့ အာဆင်နယ် ရုန်းကန်ရဦးမှာပါ။  မန်စီးတီးက တိုက်စစ်မှူး အဂွဲရိုး ဒဏ်ရာရရှိမူနဲ့အတူ နောက်ဆုံး ၅ ပွဲမှာ ၂ ပွဲပဲ အနိုင်ရခဲ့ပေမယ့် အာဆင်နယ်ရဲ့ ခြေစွမ်းကလည်း ယုံကြည်လို့မရသေးတဲ့ အခြေအနေပါ။  အာဆင်နယ်က အိမ်ကွင်းဆိုရင် ခြေစွမ်းပြတတ်ပေမယ့်လည်း စတာလင်၊ ဒီဘရိုင်း၊ ဘာနာဒိုဆေးဗားလ်တို့ရဲ့ မန်စီးတီး တိုက်စစ်ကို ထိန်းချုပ်ဖို့ မဖြစ်နိုင်လောက်တဲ့ အခြေအနေပါ။ ထိပ်တန်းအသင်းတွေနဲ့ ပွဲတွေမှာ ရလဒ် မကောင်းတတ်တဲ့ အာဆင်နယ် ရုန်းကန်ရဦးမှာဖြစ်ပြီး မန်စီးတီးပဲ အနိုင်ရဖို့ရှိနေကြောင်း တင်ဆက်ပေးလိုက်ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up