ပိုလန်နိုင်ငံတောင်ပိုင်း နှင်းလျှောစီးအပန်းဖြေစခန်းတခုမှာ ဒီဇင်ဘာ ၄ ရက်နေ့က ဂတ်စ်ပိုက်ပေါက်ကွဲမှုကြောင့် အဆောက်အအုံတလုံး ပြိုကျခဲ့ပြီး မီးသတ်တပ်ဖွဲ့တွေဟာ အသက်ရှင်သူတွေကို ရှာဖွေနေပါတယ်။
မီးသတ်တပ်ဖွဲ့ ပြောခွင့်ရပုဂ္ဂိုလ်တဦးက ပေါက်ကွဲရာနေရာကို မီးသတ်ကား အစီး ၂၀- ရောက်နေတယ်လို့ ပြောခဲ့ပါတယ်။ အပြိုအပျက်တွေအောက်မှာ ကလေးတွေ အပါအဝင် လူ ၈ ယောက် ရှိနိုင်တယ်လို့ သူက ပြောခဲ့ပါတယ်။
ရှစ်ဇဲနှင်းလျှောစီးအပန်းဖြေစခန်းက ၃ ထပ် အဆောက်အအုံတလုံးမှာ ဂတ်စ်ပိုက်ပေါက်ကွဲမှု ဖြစ်ခဲ့တာပါ။
အဆောက်အအုံ အပြိုအပျက်အောက်မှာ လူဘယ်နှယောက် ရှိမှန်း သေချာမသိရဘူးလို့ ရဲတပ်ဖွဲ့က အစောပိုင်းမှာ ပြောခဲ့ပါတယ်။
ဂတ်စ်ကုမ္ပဏီ တာဝန်ရှိသူတဦးက အနီးဝန်ကျင် ဆောက်လုပ်ရေးလုပ်ငန်းကြောင့် ဓာတ်ငွေ့ပိုက်လိုင်းကို မတော်တဆထိခိုက်ပြီး ပေါက်ကွဲတာ ဖြစ်နိုင်တယ်လို့ ပြောပါတယ်။
