တရုတ်နိုင်ငံကို ဘယ်လို ရင်ဆိုင်မလဲ

အခုရက်ပိုင်းအတွင်း ထွက်ပေါ်လာတဲ့ သတင်းတပုဒ်ကတော့ တရုတ်နိုင်ငံဟာ ၀ပြည်သွေးစည်းညီညွတ်ရေးတပ်မတော် (ယူဒဗလျူအက်စ်အေ) ကို မြေပြင်ကနေ ဝေဟင်ပစ် ဒုံးကျည်တွေနဲ့ တင့်ကားဖျက် လက်နက်တွေ အပါအ၀င် ခေတ်မီ လက်နက်ပစ္စည်းတွေ ရောင်းချခဲ့တယ် ဆိုတဲ့ သတင်းပဲဖြစ်ပါတယ်။ Jane Defense အဖွဲ့ရဲ့ ထုတ်ပြန်ချက်ကို ကိုးကားပြီး ဖော်ပြကြတဲ့ ဒီသတင်းနဲ့ ပတ်သက်လို့ တိုင်းရင်းသားလက်နက်ကိုင်အဖွဲ့တွေ အကြောင်း ကျွမ်းကျင်သူတွေနဲ့ စစ်လက်နက်ကုန်သွယ်မှုအကြောင်း ကျွမ်းကျင်သူတွေက ထောက်ခံ ပြောဆိုကြပေမယ့် တရုတ်သံရုံးကတော့ ဒီသတင်း အခြေအမြစ် မရှိဘူးလို့ ငြင်းဆိုခဲ့ပါတယ်။ “၀” တပ်ဖွဲ့ကို တရုတ်နိုင်ငံက လက်နက်တွေ တကယ်ပဲ ရောင်းခဲ့သလား၊ တရုတ်နိုင်ငံဟာ နယ်စပ်က တိုင်းရင်းသားလက်နက်ကိုင်တပ်ဖွဲ့တွေကို ဘယ်လို သဘောထားခဲ့သလဲ၊ ဒီ ပြဿနာတွေနဲ့ ပတ်သက်ပြီး အိမ်နီးချင်း တရုတ်နိုင်ငံကို ဘယ်လို ရင်ဆိုင်ရမလဲဆိုတာ ခုတပတ် ဆွေးနွေးသုံးသပ် တင်ပြသွားမှာ ဖြစ်ပါတယ်။ ပြောရရင် မြန်မာနိုင်ငံဟာ လက်ရှိ ခေတ်သစ်တရုတ်နိုင်ငံထက် ၁ နှစ်စောပြီး လွတ်လပ်ရေး ရပါတယ်။ ၁၉၄၉ ခုနှစ် ကွန်မြူနစ်တွေ အောင်ပွဲခံမှုနဲ့ အတူ တရုတ်နိုင်ငံ လွတ်မြောက်ပြီးနောက် တရုတ်ကွန်မြူနစ်အစိုးရကို ပထမဦးဆုံး အသိအမှတ်ပြုတဲ့အထဲမှာ မြန်မာနိုင်ငံ ပါဝင်ပါတယ်။ တရုတ်ပြည်သစ် တည်ထောင်ပြီးနောက် ကွန်မြူနစ်အစိုးရဟာ ငြိမ်းချမ်းစွာ အတူယှဉ်တွဲနေထိုင်ရေး မူ ချမှတ်တဲ့ဆီမှာလည်း ပါဝင်ပြီး နိုင်ငံတကာရေးရာမှာ သူများ ပြည်တွင်း မစွက်ဖက်ရေး မူဝါဒကို ကျင့်သုံးခဲ့ပါတယ်။ ဒီလိုနဲ့ တရုတ်အစိုးရနဲ့ မြန်မာအစိုးရတို့ဟာ ၁၉၆၀ စုနှစ် နှောင်းပိုင်းအထိ ချစ်ကြည်ရင်းနှီးမှု ရှိခဲ့ပါတယ်။ အဲဒီနောက်ပိုင်း တရုတ်ပြည်မှာ ယဉ်ကျေးမှုတော်လှန်ရေး ဖြစ်ပွားခဲ့သလို အဲဒီ ပြဿနာတွေနဲ့ ဆက်စပ်ပြီး မြန်မာနိုင်ငံမှာလည်း တရုတ်-မြန်မာ အဓိကရုဏ်းတွေ ပေါ်ပေါက်ခဲ့ပါတယ်။ အဲဒီ အဓိကရုဏ်းတွေကို တရုတ်ကွန်မြူနစ်ပါတီနဲ့ အစိုးရ တုံ့ပြန်လိုက်ပုံကတော့ တရုတ်ပြည်ထဲရောက်နေတဲ့ ဗမာပြည်ကွန်မြူနစ်ပါတီဝင်တချို့၊ ကချင်တိုင်းရင်းသားခေါင်းဆောင် နော်ဆိုင်း ခေါင်းဆောင်တဲ့ တိုင်းရင်းသားတချို့ကို ရှေ့တန်းတင်ပြီး လူအင်အားနဲ့ လက်နက်အင်အား အပြည့်အ၀ ထောက်ပံ့မှုပေးပြီး မြန်မာနိုင်ငံ ရှမ်းပြည်အရှေ့မြောက်ပိုင်းကို အလုံးအရင်းနဲ့ ၀င်ရောက်တိုက်ခိုက်ခြင်းပါပဲ။ လက်ရှိ ၀ တပ်ဖွဲ့နဲ့ မိုင်းလား အခါတပ်ဖွဲ့တွေဟာ တရုတ်ကွန်မြူနစ်ပါတီနဲ့ အစိုးရရဲ့ မြန်မာပြည်တွင်းရေး ၀င်ရောက်စွက်ဖက်မှုကနေ ကျန်နေရစ်တဲ့ အမွေတခုလို့ ဆိုရင်လည်း မမှားပါဘူး။ အဲဒီ အချိန်က ဗမာပြည်ကွန်မြူနစ်ပါတီ အလံထောင်ထားတဲ့ ခေါင်းစဉ်အောက်မှာ ဗော်လံတီယာတွေလို့ နာမည်တပ်ထားတဲ့ တရုတ်နိုင်ငံသား တပ်ဖွဲ့ဝင်တွေဟာ တရုတ်အစိုးရ လက်နက်တွေနဲ့ပဲ မြန်မာ့တပ်မတော်ကို တိုက်ခိုက်ခဲ့ကြတာ ဖြစ်ပါတယ်။ ပြောရရင် အဲဒီအချိန်က တရုတ်ပြည်ရဲ့ ကူညီမှုဟာ လက်နက် တခုတည်း မကပါဘူး။ တပ်ဖွဲ့ဝင်တွေ၊ စားရေရိက္ခာတွေနဲ့ လက်နက်ကြီးငယ်တွေ အားလုံး ပါဝင်ခဲ့ပါတယ်။ နောက်ပိုင်း မြန်မာအစိုးရနဲ့ ပြေလည်မှုရရှိသွားလို့ အဲဒီ ဗမာပြည်ကွန်မြူနစ်ပါတီကို အကူအညီတွေ လျော့ချခဲ့ပေမယ့် လက်နက်ကိုင်တပ်ဖွဲ့တွေကတော့ တရုတ်နယ်စပ်မှာ ဒီကနေ့အချိန်ထိ တည်ရှိခဲ့တာ ဖြစ်ပါတယ်။ ပြောရရင် အဲဒီ တပ်ဖွဲ့တွေဟာ မြန်မာနိုင်ငံထဲက သယံဇာတ တွေကို တရုတ်ပြည်ဘက် ထုတ်ရောင်း၊ ရတဲ့ငွေနဲ့ ဆန်၊ဆီနဲ့ ဆားကအစ တရုတ်ပြည်က ၀ယ်ယူသုံးစွဲပြီး တပ်ဆင်ထားတဲ့ လက်နက်တွေဟာလည်း အရင်ကတည်းက တရုတ်လက်နက်တွေဖြစ်သလို နောက်ပိုင်း ဖြည့်တင်းတာဟာလည်း တရုတ်လက်နက်တွေချည်းပဲဖြစ်ပါတယ်။ လောလောဆယ် ကချင်လွတ်လပ်ရေးတပ်မတော်(ကေအိုင်အေ)နဲ့ အစိုးရတပ်တွေ တိုက်ကြခိုက်ကြရာမှာလည်း တရုတ်နိုင်ငံရဲ့ ပါဝင်ပတ်သက်မှုကို တွေ့နိုင်ပါတယ်။ ကေအိုင်အေ ဟာလည်း အရင် တချိန်တုန်းက တရုတ်ပြည်ရဲ့ လက်နက် ထောက်ပံ့မှုကို ရယူခဲ့ဖူးတဲ့ တပ်ဖွဲ့ဖြစ်ပါတယ်။ လက်ရှိအချိန်မှာလည်း အင်အားကြီးတဲ့ မြန်မာအစိုးရတပ်တွေကို အချိန်ကာလ ကြာမြင့်စွာ စစ်ပွဲဆင်နွှဲနိုင်တဲ့အထိ စစ်လက်နက်ပစ္စည်းတွေကို တရုတ်ပြည်ကနေပဲ ရရှိနေတာ ဖြစ်ပါတယ်။ ဒီအကြောင်းကို ကချင်လက်နက်ကိုင် တပ်မှူးတွေကလည်း မငြင်းကြပါဘူး။ တိုင်းရင်းသား လက်နက်ကိုင်တပ်ဖွဲ့တွေကို အဲလို လက်နက်ရောင်းချတဲ့ တရုတ်အစိုးရဟာ ပြည်တွင်းရေး ၀င်မစွက်ဘူး ဆိုပေမယ့် ပြည်သူကို ဖိနှိပ်တဲ့ မြန်မာစစ်အစိုးရကိုတော့ နှစ်ပေါင်းများစွာ အပြည့်အ၀ ထောက်ခံခဲ့ပါတယ်။ တပြိုင်နက်တည်း မြန်မာနိုင်ငံဖွံ့ဖြိုးတိုးတက်ရေးအတွက် ဘာရင်းနှီးမြှုပ်နှံမှုမှ မလုပ်ပဲ သစ်၊ ကျောက်စိမ်းနဲ့ သယံဇာတ မှန်သမျှ နည်းပေါင်းစုံနဲ့ ထုတ်ယူ အမြတ်ထုတ်ခဲ့ပါတယ်။ ပြောရရင် တရုတ်ပြည်ရဲ့ မြန်မာနိုင်ငံနဲ့ ပြည်သူတွေအပေါ် ထားတဲ့ သဘောထားဟာ မှတ်တမ်းကောင်းတွေတော့ မဟုတ်ခဲ့ပါဘူး။ ဘယ်လိုပဲဖြစ်ဖြစ် တရုတ်နိုင်ငံဟာ ဒီနေ့ စီးပွားရေး အင်အားကြီးနိုင်ငံဖြစ်သလို မြန်မာနိုင်ငံနဲ့ နယ်နိမိတ် ရှည်လျားစွာ ထိစပ်နေတဲ့ အိမ်နီးချင်းတိုင်းပြည်တပြည်လည်း ဖြစ်နေပါတယ်။ ဒေါ်အောင်ဆန်းစုကြည် ပြောသလို အိမ်နီးချင်းဆိုတာ ပြောင်းပြေးလို့ ရတာ မဟုတ်လို့ သင့်မြတ်တဲ့ ဆက်ဆံရေး ထူထောင်ဖို့ လိုပါတယ်။ မြန်မာနိုင်ငံထဲမှာ ဗမာတွေအချင်းချင်း၊ ဗမာနဲ့ တိုင်းရင်းသား၊ တိုင်းရင်းသားအချင်းချင်း သဘောထားတွေကွဲလွဲ တိုက်နေခိုက်နေကြလို့ကတော့ တရုတ်နိုင်ငံကို ရင်မဆိုင်နိုင်ပါဘူး။ အမျိုးသားပြန်လည် သင့်မြတ်ရေးကို ဖော်ဆောင်နိုင်တဲ့၊ တိုင်းရင်းသားတွေနဲ့ စည်းလုံးညီညွတ်မှုတည်ဆောက်နိုင်တဲ့ အင်အားကောင်းတဲ့ ဒီမိုကရေစီ အစိုးရမျိုး တည်ထောင်နိုင်မှသာ မှန်မှန်ကန်ကန် ရင်ဆိုင်နိုင်မယ် ဖြစ်ပါကြောင်း တင်ပြလိုက်ရပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up