Email This Story :
အစ္စရေးရဲ့ ဂါဇာဒေသစစ်ဆင်ရေးက အဆုံးသတ်ဖို့ နီးကပ်နေပြီလို့ အစ္စရေးဝန်ကြီးချုပ် ဘင်ဂျမင် နေတန်ညာဟုက နိုဝင်ဘာ ၁၄ ရက်နေ့မှာ ပြောပါတယ်။
ဂါဇာဒေသအခြေစိုက် အစ္စလာမ္မစ် ဂျီဟတ်အဖွဲ့နဲ့ အစ္စရေးအကြား နှစ်ရက်ကြာ တိုက်ပွဲအပြီးမှာ ဝန်ကြီးချုပ် နေတန်ညာဟုက အခုလို ပြောလိုက်တာပါ။
ပါလက်စတိုင်းစစ်သွေးကြွ အစ္စလာမ္မစ် ဂျီဟတ်အဖွဲ့နဲ့ အစ္စရေးဟာ ဂါဇာဒေသတလျှောက် အပစ်အခတ်ရပ်ဖို့ နိုဝင်ဘာ ၁၄ ရက်နေ့ ကြေညာခဲ့ပါတယ်။ ဒါပေမယ့် သဘောတူညီချက်တွေနဲ့ ပတ်သတ်လို့ ညှိနှိုင်းနေပုံရတယ်လို့ ရိုက်တာသတင်းဌာနက ဖော်ပြပါတယ်။
နိုဝင်ဘာ ၁၂ ရက်နေ့က အစ္စရေးရဲ့ လေကြောင်း တိုက်ခိုက်မှုကြောင့် အစ္စလာမ်မစ်ဂျီဟတ်အဖွဲ့ရဲ့ ထိပ်တန်းစစ်မြေပြင် တပ်မှူးတယောက် ကျဆုံးအပြီးမှာတော့ အပြန်အလှန် နယ်စပ်ဖြတ်ကျော် တိုက်ခိုက်မှုတွေ အရှိန်မြင့်တက်လာခဲ့တာပါ။
နိုဝင်ဘာ ၁၃ ရက်နေ့ AlMayadeen TV ရုပ်သံနဲ့ အင်တာဗျူးမှာ အစ္စလာမ္မစ်ဂျီဟတ်အဖွဲ့ခေါင်းဆောင် ဇေယက် အယ်နာခ်ဟာလာက အစ္စရေးအနေနဲ့ ပစ်မှတ်ထား သတ်ဖြတ်တာတွေ၊ ဂါဇာနယ်စပ်ဆန္ဒပြပွဲတွေအပေါ် ဆိုးဆိုးရွာရွားကိုင်တွယ် တုံ့ပြန်တာတွေကို အဆုံးသတ်ဖို့အပြင် ဂါဇာဒေသကို ပိတ်ပင်ကန့်သတ်မှုတွေ ဖြေလျော့ပေးဖို့ စတဲ့အချက်တွေကို ပြောခဲ့ပါတယ်။
