နာမည်ကျော် အင်းလေးဒေသ ရေပေါ်မီးထွန်းပွဲတော်နှင့် ဂီတပွဲတော် ၅ ရက်ကြာ ကျင်းပမည်
DVB
·
October 4, 2019
မြန်မာပြည်တနံတလျား ဗုဒ္ဓဘာသာဝင်တွေရဲ့ နှစ်စဉ်ကျင်းပမြဲဖြစ်တဲ့ သီတင်းကျွတ်မီးထွန်းပွဲ တော်ဟာ မကြာခင်ရောက်ရှိလာတော့မှာ ဖြစ်ပါတယ်။
ရှမ်းပြည်နယ်၊ အင်းလေးဒေသမှာလည်း ဒီပွဲတော်ကို ခမ်းခမ်းနားနား ကျင်းပသွားမှာ ဖြစ်ပြီး အင်းသူအင်းသားတွေနဲ့အတူ သီတင်းကျွတ်ကာလ မီးမျှောပွဲတော်ကို ရိုးရာတေးသံတွေနဲ့ ပြုလုပ်သွားမှာဖြစ်လို့ လာရောက်လည်ပတ်ကြဖို့ ဖိတ်ခေါ်ထားပါတယ်။
ဒီပွဲတော်ကိုတော့ Dream Vision Company (DVC) နဲ့ Inle Cultural & Heritage Trust (ICHT) အဖွဲ့တို့ ပူးပေါင်းစီစဉ်တာဖြစ်ပြီး အောက်တိုဘာလ ၉ ရက် နေ့ကနေ ၁၃ ရက်နေ့ထိ ၅ ရက်တိုင်တိုင် ကျင်းပသွားမှာ ဖြစ်ပါတယ်။
ညောင်ရွှေမြို့နယ် အင်းလေးဒေသ နန့်ပန်ကျေးရွာမှ ICHT ရေပေါ်အဆောက် အဦး Stage မှာ ကျင်းပတော့မယ့် ပွဲတော်ကာလအတွင်းမှာတော့ ဖိတ်ခေါ်အင်းသား ရိုးရာလှေလှော်ပြိုင်ပွဲ၊ ရေပေါ်မီးထွန်းပွဲနှင့် ဂီတပွဲတော်၊ ရိုးရာယဉ်ကျေးမှုအကပွဲတော်၊ ပေါ့ပ်ဂီတည၊ ရောခ့်ဂီတညစတဲ့ အစီအစဉ်တွေ ပါဝင်မှာ ဖြစ်ပါတယ်။
ဂီတပွဲတော်အနေနဲ့ ရေပေါ်စတိတ်စင်တွေပေါ်မှာ အင်းသွေးသစ်တေးဂီတအဖွဲ့ရဲ့ တီးခတ်မှုနဲ့အတူ မြန်မာပြည်သိန်းတန်၊ ဖြိုးပြည့်စုံ၊ အောင်ထက်၊ ဝိုင်းစုခိုင်သိန်း၊ နီနီ ခင်ဇော်၊ နင်ဇီမေ၊ ပိုးမီတို့ရဲ့ ပေါ့ပ်ဂီတည၊ လှိုင်ဦးမော်၊ သအို၊ ဂျီလတ်၊ သာဒီးလူ၊ တင်ဇာမော်၊ ဖြူဖြူကျော်သိန်း၊ မိုင်းမိုင်ဆိုင်းတို့ရဲ့ ရော့ခ်ဂီတည အစီအစဉ်တွေ ပါဝင်ပါ တယ်။