အမေရိကန်တွင် နေ့အပူချိန် စံချိန်တင်မြင့်တက်၊ နယူးယောက်တွင် လျှပ်စစ်မီးများ ပြတ်တောက်

အမေရိကန်နိုင်ငံ အနောက်အလယ်ပိုင်းဒေသနဲ့ အရှေ့ဘက်ကမ်းရိုးတန်း ဒေသတွေမှာ အခုသီတင်းပတ်အတွင်း အပူလှိုင်းကြောင့် နေ့အပူချိန် စံချိန်တင် မြင့်တက်ခဲ့ပြီး နယူးယောက်မြို့မှာလည်း လျှပ်စစ်မီးတွေ ပြတ်တောက်နေပါတယ်။ ဇူလိုင် ၂၁ ရက်နေ့က နယူးယောက်မြို့က လူအယောက် ၅ သိန်းနီးပါးရဲ့ အိမ်တွေမှာ လျှပ်စစ်မီးပြတ်တောက်ခဲ့တယ်လို့ Con Edison စွမ်းအင်ကုမ္ပဏီက သူတို့ရဲ့ဝက်ဘ်ဆိုက်မှာ ဖော်ပြထားပါတယ်။ ဒေသခံတွေဟာ အိမ်အပြင်ထွက် ထိုင်နေကြပြီး ရေခဲမုန့်ရောင်းတဲ့ ထရပ်ကားတွေမှာလည်း လူတွေ တန်းစီနေကြပါတယ်။ အမေရိကန်နိုင်ငံမှာ နေ့အပူချိန် ၃၆ ဒသမ ၇ ဒီဂရီ ဆဲလ်စီးယပ်စ်အထိ မြင့်တက်ခဲ့တာပါ။ နေ့အပူချိန် မြင့်တက်နေတဲ့ မြို့တွေမှာ အများပြည်သူဆိုင်ရာ အအေးခန်း စင်တာတွေလည်း ဖွင့်လှစ်ထားခဲ့တယ်လို့ အမျိုးသား မိုးလေဝသအေဂျင်စီက ပြောပါတယ်။ မကြာသေးခင်က နေ့တွေမှာ အမေရိကန်နိုင်ငံ လူဦးရေရဲ့ သုံးပုံတလောက်အပေါ် အပူလှိုင်းရိုက်ခတ်မှုဒဏ် ခံစားခဲ့ရပါတယ်ု ဒါပေမယ့် ဇူလိုင် ၂၂ ရက်နေ့မှာတော့ မိုးသက်လေပြင်းကျပြီး မိုးရွာခဲ့တာကြောင့် အပူချိန် ပြန်လျော့ကျခဲ့တယ်လို့ အမျိုးသား မိုးလေဝသအေဂျင်စီက ပြောပါတယ်။ အမေရိကန်နိုင်ငံ အနှံ့အပြားမှာ အပူလှိုင်းဖြတ်သန်းမှု ဖြစ်ပွားခဲ့ရာ အပူဒဏ်ကြောင့် အနည်းဆုံး လူ ၆ ဦး သေဆုံးခဲ့တယ်လို့ အမေရိကန် သတင်းမီဒီယာတွေမှာ ဖော်ပြထားပါတယ်။

More News
Up