A d v e r t i s e m e n t With Us

H1N1 ကြောင့် သေဆုံးသူ ၂ ရက်အတွင်း ၆ ဦး ထပ်တိုးလာ

မြန်မာနိုင်ငံတ၀န်း ရာသီတုပ်ကွေးရောဂါ  H1N1 ကြောင့် သေဆုံးသူဦးရေဟာ ၂ ရက်အတွင်း ၆ ယောက် ထပ်တိုးလာတယ်လို့ ဗဟိုကူးစက်ရောဂါတိုက်ဖျက်ရေးဌာနခွဲက ထုတ်ပြန်တဲ့စာရင်းအရ သိရပါတယ်။ မေ ၁ ရက်ကနေ ဇူလိုင် ၁၄ ရက်အထိ သေဆုံးသူပေါင်း ၄၈ ယောက်ရှိပြီး ဇူလိုင် ၁၆ ရက်နေ့မှာတော့ သေဆုံးသူ ၅၆ ယောက်ဖြစ်လာတာပါ။ ဗဟိုကူးစက်ရောဂါ တိုက်ဖျက်ရေးဌာနခွဲက ထုတ်ပြန်တဲ့စာရင်းအရ မေ ၁ ကနေ ဇူလိုင် ၁၆ ရက်အထိ သေဆုံးသူ ၄၃ ယောက်မှာ ရန်ကုန်တိုင်းက ၄၃ ယောက်၊ ဧရာဝတီတိုင်းက ၄ ယောက်၊ မွန်ပြည်နယ်က ၃ ယောက်၊ စစ်ကိုင်းနဲ့ ပဲခူးတိုင်းက ၂ ယောက်စီ၊ မကွေးနဲ့ ကချင်ပြည်နယ်တို့က ၁ ယောက်စီဖြစ်ပါတယ်။ ရန်ကုန်တိုင်းထဲမှာတော့ လှိုင်သာယာနဲ့ ဒဂုံမြို့သစ်တောင်ပိုင်းက ၅ ယောက်စီ သေဆုံး ခဲ့ပြီး မှော်ဘီနဲ့ သာကေတက ၃ ယောက်စီ၊ သင်္ဃန်းကျွန်း၊ မြောက်ဥက္ကလာပ၊ မင်္ဂလာဒုံ၊ သန်လျင်၊ ရွေပြည်သာ၊ ရန်ကင်းနဲ့ စမ်းချောင်းမြို့နယ်တို့က ၂ ယောက်စီ သေဆုံးခဲ့ပါတယ်။ တွံတေး၊ တိုက်ကြီးနဲ့ ကျောက်တံတားမြို့နယ်တို့ကလွဲရင် ကျန်တဲ့ ၃၇ မြို့နယ်မှာ ဓာတ်ခွဲအတည်ပြု ရောဂါပိုးကူးစက်ခံရသူတွေရှိနေတာပါ။ တနိုင်ငံလုံးအတိုင်းအတာနဲ့ ချင်းပြည်နယ်နဲ့ ရှမ်းပြည်နယ်အရှေ့ပိုင်းကလွဲရင် ကျန်တဲ့ ပြည်နယ်နဲ့ တိုင်းတွေမှာ ပိုးတွေ့လူနာတွေရှိတယ်လို့ ကျန်းမာရေးဌာနက ထုတ်ပြန်ထားပါတယ်။ သေဆုံးသူတွေရဲ့ ထက်ဝက် ၄၉ ရာခိုင်နှုန်းဟာ အသက် ၁၅ နှစ်ကနေ ၆၅ နှစ် အရွယ်တွေဖြစ်ပြီး အသက် ၁ နှစ်ကနေ ၅ နှစ်အရွယ်ကလေးတွေ သေတာကတော့ စုစုပေါင်းရဲ့ ၁၇ ရာခိုင်နှုန်းရှိပါတယ်။ ရာသီတုပ်ကွေးရောဂါ လက္ခဏာတွေကတော့ ဖျားတာ၊ ချောင်းဆိုးတာ၊ လည်ချောင်းနာ နှာရည်ယိုတာနဲ့ ကိုယ်လက်နာကျင်ကိုက်ခဲပြီး ခေါင်းကိုက်တာ၊ ချမ်းတုန်ဖျားတာနဲ့ ကိုယ်လက် မအီမသာတွေ ဖြစ်လေ့ရှိပါတယ်။ ပြီးတော့ အော့အန်တာ၊ ဝမ်းလျှောတာတွေလည်း ဖြစ်တတ်ပြီး ရောဂါဝင်ရောက်ချိန်ကနေ ရောဂါလက္ခဏာ ပြမယ့်အချိန်က ၁ ရက်ကနေ ၅ ရက်အတွင်း ဖြစ်ပါတယ်။ သေဆုံးသူအများစုဟာ နှလုံး၊ ဆီးချိုလို နာတာရှည်ရောဂါအခံရှိသူတွေလို့ ကျန်းမာရေး ဌာန တာဝန်ရှိသူတွေကပြောပြီး ဒီရောဂါဟာ အသက် ၂ နှစ်အောက် ကလေးငယ်တွေနဲ့ အသက် ၆၅ နှစ် အထက် လူကြီးတွေမှာ ပိုပြီး အဖြစ်များတယ်လို့လည်း ဆိုပါတယ်။ အရင်နှစ်တွေက ရောဂါပိုးတွေ့သူတွေကို ကုသနိုင်ဖို့ ဆေးရုံကြီး ၈ ခုမှာပဲ စီစဉ်ထား ခဲ့ပေမယ့် ဒီနှစ်မှာတော့ မြောက်ဥက္ကလာပ၊ အင်းစိန်၊ လှိုင်သာယာနဲ့ တိုင်းနဲ့ ပြည်နယ်အဆင့် ဆေးရုံကြီး ၁၅ ခုမှာ  တိုးချဲ့ ဆောင်ရွက်ထားတယ်လို့ ကျန်းမာရေး ဝန်ကြီးဌာနက ထုတ်ပြန်ထားပါတယ်။  ၂၀၁၇ ခုနှစ်တုန်းက A(H1N1)pdm09 ပိုးကူးစက်ခံရသူပေါင်း ၄၀၆ ယောက်မှာ ၃၈ ယောက်သေဆုံးခဲ့ပါတယ်။ 
Tags
H1N1 ကြောင့် သေဆုံးသူ ၂ ရက်အတွင်း ၆ ဦး ထပ်တိုးလာ
© Copyright 2020 DVB Designed and Developed by Digit X Myanmar.
Up