ချင်းတွင်းမြစ်ကမ်းပါးပြိုကျသဖြင့် ရေစကြိုမြို့နယ်၌ ကိုယ်ထူကိုယ်ထရေကာတာ အရေးပေါ်တည်ဆောက်နေ
1.1K
ရေစကြိုမြို့နယ်၊ ပေါက်တောကျေးရွာမှာ ချင်းတွင်းမြစ်ရေ တိုက်စားမှုကြောင့် ဇူလိုင် ၉ ရက်ကစပြီး ရေကာတာတခုကို ကိုယ်ထူကိုယ်ထ အရေးပေါ်တည်ဆောက်နေရပါတယ်။
ရေကာတာတည်ဆောက်ရေးလုပ်ငန်း ဦးဆောင်သူ ဦးထွန်းအောင်ကျော်က “ဇွန်လဆန်းလောက်က စပြီး ကျေးရွာကမ်းပါးကို ချင်းတွင်းမြစ်ရေက ပေ ၅၀ လောက် တလအတွင်းပြိုကြခဲ့တာ။ လူနေအိမ်တွေနဲ့ ၇ ပေလောက်အထိ နီးကပ်လာလို့ မြစ်ရေတိုးလာပြီး အချိန်မီ မထိန်းနိုင်ရင် ကျနော်တို့ ကျေးရွာပြည်သူတွေရဲ့ နေအိမ်တွေနဲ့ လယ်ယာမြေတွေ ဆုံးရှုံးရတော့မယ့် အနေအထားရှိလာနိုင်တယ်။ အဲဒါကြောင့် ကျေးရွာလူထု ထည့်ဝင်ငွေ ကျပ်သိန်း ၁၀၀ လောက်နဲ့ အရေးပေါ်ဆောင်ရွက်နေရတယ်။”လို့ ပြောပါတယ်။
ရေကာတာတည်ဆောက်ရာမှာ မြို့နယ် မီးသတ်တပ်ဖွဲ့ဝင်တွေနဲ့ ဒေသခံပြည်သူတွေက ဝါးနဲ့ ပိုင်ချတာ၊ ပိုက်ကွန်တပ်ဆင်တာ၊ သစ်ကိုင်းတွေနဲ့ သဲအိမ်ထည့်တဲ့လုပ်ငန်းတွေကို ဇူလိုင်လ ၉ ရက်မှ ၁၂ ရက်အထိ ၄ ကြာတည်ဆောက်ရမှာဖြစ်တယ်လို့ မြို့နယ် မီးသတ်ဦးစီး ဦးညီညီအောင်က ပြောပါတယ်။
ဇွန်လ ၂၆ ရက်က မကွေးတိုင်းဒေသကြီး အစိုးရအဖွဲ့၊ တိုင်းမြစ်ချောင်းဖြိုးဦးစီးဌာန၊ လွှတ်တော်ကိုယ်စားလှယ်တွေ၊ အထွေထွေအုပ်ချုပ်ရေးဦးစီးဌာနက တာဝန်ရှိသူတွေ ပေါက်တောကျးရွာကို ကွင်းဆင်းစစ်ဆေးခဲ့ပြီး ရေတာကာ တည်ဆောက်တဲ့လုပ်ငန်းကို မြစ်ချောင်းဖြိုးဦးစီးဌာနရဲ့ လမ်းညွှန်ပေးမှုနဲ့ ခုလို တည်ဆောက်နေတာလည်းဖြစ်ပါတယ်။
ချင်းတွင်းမြစ်ရေဟာ ပေါက်တောကျေးရွာမှာ ၂ ရက်အတွင်း ၅ လက်မလောက် မြစ်ရေတိုးနေပြီး မိုးအဆက်မပြတ်ရွာနေတာကြောင့် နောက်ထပ်အတွင်း မြစ်ရေထပ်တိုးလာ ဖွယ်ရှိနေပါတယ်။
ချင်းတွင်းမြစ်ကမ်းပါးပြိုနေတဲ့ ပေါက်တောကျေးရွာမှာ အိမ်ခြေ ၃၇၀ ၊ အိမ်ထောင်စု ၄၅၀ ၊ လူဦးရေ ၂၀၀၀ လောက် နေထိုင်ကြတာ ဖြစ်ပါတယ်။
သတင်း-ကိုလင်း(ချောက်)၊ ဓာတ်ပုံ- ဦးညီညီအောင်/ ဦးထွန်းအောင်ကျော်
