မန္တလေးကျုံးအရှေ့ဘက်တွင် အခမဲ့စားသုံးနိုင်သည့် Food Box ထားရှိ
DVB
·
June 13, 2019
မန္တလေးကျုံးရဲ့ အရှေ့ဘက် ၆၆ လမ်း၊ ၂၂ လမ်းနဲ့ ၂၃ လမ်းကြားမှာ လူမျိုးဘာသာ အဆင့်အတန်းမရွေး မည်သူမဆို အခမဲ့ဝင်ယူ စားသုံးနိုင်တဲ့ Food Box တခုကို ပရဟိတ အဖွဲ့တခုက စီစဉ်ပေးထားပါတယ်။
ဒီ Food Box နေရာမှာ အရင်က အခမဲ့စာကြည့်တိုက်ပုံးရှိခဲ့ပေမယ် ဇွန်လ ၁၀ ရက်က စတင်ပြီး စာအုပ်၊ ဂျာနယ်တွေအပြင် အအေးဘူးနဲ့ အဆာပြေမုန့်တွေပါ ထည့်ပေးထားတာ ဖြစ်ပါတယ်။
ဒီ Food Box မှာ လိုအပ်တဲ့ အအေးဘူးနဲ့မုန့်တွေကို One To One ပြည်သူကူညီရေး ပရဟိတအဖွဲ့က အမြဲလာရောက် ဖြည့်စွက်လှူဒါန်းနေတာဖြစ်ပြီး ပုဂ္ဂလိက အလှူရှင်တချို့ ကလည်း လာရောက်လှူဒါန်းတာတွေ ရှိနေပါတယ်။
One To One ပြည်သူကူညီရေး ပရဟိတအဖွဲ့မှ ဦးဝမ်းက “အခုလို Food Box ပြုလုပ်ပေးတာက လမ်းသွားလမ်းလာတွေ၊ ဈေးသည်တွေ၊ အပန်းဖြေလာသူတွေ၊ ခရီးသွားတွေနဲ့ လုပ်သားပြည်သူတွေ ရေငတ်ပြေသောက်သုံးဖို့နဲ့ ဗိုက်ဆာရင် အဆာပြေစားဖို့ ပြုလုပ်ပေးတာပါ” လို့ ပြောပါတယ်။
အခုလို လူမျိုးဘာသာမရွေး အဆင့်အတန်းမရွေး အခမဲ့ စားသုံးနိုင်ဖို့ ရည်ရွယ် ဖွင့်လှစ်ထားတဲ့ Food Box မှာ မိမိတို့အတွက် ပိုလျှံနေတဲ့အစားအသောက်တွေ၊ စာအုပ်တွေနဲ့ ဂျာနယ်တွေကို လာရောက်လှူဒါန်းကြဖို့လည်း ဖိတ်ခေါ်ထားတယ်။
One To One ပြည်သူကူညီရေး ပရဟိတအဖွဲ့က မန္တလေးကျုံးပတ်လည်မှာ Food Box တွေထပ်တိုးချထားနိုင်ဖို့အတွက် သက်ဆိုင်ရာအဖွဲ့အစည်းတွေနဲ့ ဆွေးနွေးဆောင်ရွက်သွားဖို့ ရှိနေပါတယ်။
အအေးနဲ့ မုန့်တွေ ပါဝင်လှူဒါန်းလိုသူတွေအနေနဲ့ One To One ပြည်သူကူညီရေး ပရဟိတအဖွဲ့ ကို ဆက်သွယ်နိုင်တယ်လို့ သိရပါတယ်။
သတင်း- သော်တာ
