ကင်ဂျုံအန်းထံမှ နှစ်လိုဖွယ်ကောင်းသည့် စာတစောင် လက်ခံရရှိဟု ထရမ့် ပြော

မြောက်ကိုရီးယားခေါင်းဆောင် ကင်ဂျုံအန်းဆီက နှစ်လိုဖွယ်ကောင်းတဲ့ စာတစောင် လက်ခံရရှိခဲ့တယ်လို့ အမေရိကန်သမ္မတ ဒေါ်နယ်ထရမ့်က ဇွန်လ ၁၁ ရက်နေ့မှာ ပြောလိုက်ပါတယ်။ မြောက်ကိုရီးယားနဲ့ အပြုသဘောဆောင်တဲ့ကိစ္စ တစုံတရာ ဖြစ်လာနိုင်တယ်လို့ သုံးသပ်ကြောင်း ထရမ့်က အိမ်ဖြူတော်မှာ သတင်းထောက်တွေကို ပြောပေမယ့် အသေးစိတ်တော့ မပြောခဲ့ပါဘူး။ အခုနှစ် ဖေဖော်ဝါရီလက ဗီယက်နမ်နိုင်ငံမှာ ကျင်းပခဲ့တဲ့ အမေရိကန်-မြောက်ကိုရီးယား ဒုတိယအကြိမ် ထိပ်သီးဆွေးနွေးပွဲဟာ ကိုရီးယားကျွန်းဆွယ် နျူကလီးယား ဖြုတ်သိမ်းရေးနဲ့ ပတ်သက်ပြီး သဘောတူညီချက်မရဘဲ ပျက်သွားခဲ့ပါတယ်။ အဲဒီနောက် အမေရိကန်က မြောက်ကိုရီးယားနဲ့ ဆက်ဆံရေး ပြန်တည်ဆောက်ဖို့ ကြိုးစားနေတာပါ။ ဒါ့အပြင် မြောက်ကိုရီးယားခေါင်းဆောင် ကင်ဂျုံအန်းရဲ့ ဖအေတူ မအေကွဲ ညီအစ်ကို တော်စပ်သူ ကင်ဂျုံနမ်ဟာ အမေရိကန် ဗဟိုထောက်လှမ်းရေးအေဂျင်စီ (CIA) အဖွဲ့ဝင်တယောက် ဖြစ်တယ်လို့ Wall Street Journal သတင်းဌာနက ဖော်ပြခဲ့ပြီး နောက်တနေ့မှာ ထရမ့်က အခုလို ပြောခဲ့တာပါ။ ကင်ဂျုံနမ်ဟာ ၂၀၁၇ ခုနှစ်က မလေးရှားနိုင်ငံ ကွာလာလမ်ပူမြို့မှာ လုပ်ကြံခံခဲ့ရပါတယ်။ ထရမ့်ဟာ အခုလနှောင်းပိုင်းမှာ ဂျပန်နဲ့ တောင်ကိုရီးယားကို သွားဖို့ စီစဉ်ထားတယ်လို့ ရိုက်တာသတင်းက ဖော်ပြပါတယ်။

More News
Up