မြန်အောင်ရေနံမြေအစမ်းတွင်းက ရေနံနှင့် သဘာဝဓာတ်ငွေ့များစထွက်
DVB
·
June 11, 2019
ဧရာဝတီတိုင်းဒေသကြီး၊ မြန်အောင်ရေနံမြေမှာ မေလ ၃၁ ရက်နေ့ကစပြီး တွင်းအမှတ် ၁၇၄ ကနေ တရက်ကို ရေနံစိမ်း ၆၂ စည်နဲ့ သဘာဝဓာတ်ငွေ့ ၀.၀၉၈ ကုဗပေသန်း ထွက်ရှိနေပါတယ်။
မြန်မာ့ရေနံနှင့်သဘာဝဓာတ်ငွေ့လုပ်ငန်း မြန်အောင်ရေနံမြေ တွင်းအမှတ် (၁၇၄) ကို National 55/4 တွင်းတူးစက်နဲ့ မတ်လ ၃ ရက်နေ့မှာ စတင်တူးဖော်ခဲ့ပြီး သတ်မှတ်အနက် ၅၂၆၀ ပေ သို့ မေလ ၂၂ ရက်နေ့မှာ ရောက်ရှိခဲ့ပါတယ်။
ထုတ်လုပ်မှုစမ်းသပ်တဲ့ လုပ်ငန်းတွေ ဆောင်ရွက်ပြီး မေလ ၃၁ ရက်နေ့မှာ အခုလို ရေနံနဲ့ ဂစ်တွေ ထွက်လာတာဖြစ်ပါတယ်။
မြန်အောင်ရေနံမြေကနေ ရေနံနှင့်သဘာဝဓာတ်ငွေ့ အလားအလာရှိတဲ့ ပေ ၂၂၅၀ သဲကြောကို ဆက်လက်ရှာဖွေ တူးဖော်ထုတ်လုပ်နိုင်ဖို့ တွင်းအမှတ်(၁၇၅) တူးဖော်ဖို့ စတင်လုပ်ဆောင်နေတယ်လို့ မြန်မာ့ရေနံနှင့် သဘာဝဓာတ်ငွေ့လုပ်ငန်း မြန်အောင်ရေနံမြေ အထွေထွေ မန်နေဂျာထံကနေ သိရပါတယ်။
မြန်အောင်မြို့မှာ မြန်အောင်ရေနံမြေနဲ့ ရွှေပြည်သာရေနံမြေ နှစ်ခုရှိရာမှာ မြန်အောင် ရေနံမြေဟာ ၁၉၆၀ ခုနှစ်ကနေ ၁၉၉၀ အထိ ရေနံထွက်ခဲ့ပြီး နောက်ပိုင်း ရေနံ အထွက်နှုန်းလျှော့လာကာ အခုနှစ်မှ ပြန်ပြီး ရေနံထွက် ဖြစ်ပါတယ်။
